ما قلت ليك يا حب.. أدينى فرصة أخيرة أعرف حقيقة الشوق.. وأفهم معانى الغيرة وأرسم سماء الريد.. صافية، ونجومها منيرة وأكتب خواطر البوح.. وقصص طويلة قصيرة فيها المعانى تطول.. وفصولها صاخبة مثيرة وأمشى الدروب بالود.. مهما يقولوا طويلة ما قلت ليك يا حب.. علمني معنى الحيرة.. ولا تاني أكتب لي.. أحزان وقصة مريرة هل يعني ما بتفهم.. ولا المهمة كبيرة؟!! ولا الغرام مفروض.. دايماً حكايتو خطيرة؟ كل الفرص يا حب.. ضاعت وصبحت سيرة لا شفت فيها نجاح.. لا عرفت نورها وخيرا ولا جاني فارس الريد.. بقاني ياخي أميرة وهسع خلاص يا حب.. أقفل قلوبنا.. وشيلها ***** ما قلت ليك يا زول.. أنا ياخي محتاج ليك ووصفت ليك حالي.. وكان عشمي دايماً فيك وريتك أحزاني.. ورميت حمولي عليك وكتبت ليك عمري.. من ساعتو ديك في شيك وأنا من وريد الحب.. كان قصدي جد أسقيك لكن أظنو الريد.. يا غالي ما بكفيك وانا زول فقير عدمان.. ما عندى شان أهديك غير بس قلب ولهان.. وكتبتو ليك تمليك ***** ما قلت ليك الناس.. ما ليها أي أمان تضحك أمام عينيك.. ووراك تمدوا لسان. تنسى الجميل الكان.. سويتو مرة زمان ولا تطرى يوم الحب.. والصدق والتحنان بس فالحه تتكلم.. وترميكا بالبهتان ترميك في سجن الظن.. وتكون عليك سجان ***** ما قلت ليك البوح.. في بلدى عمرو قصير لازم تكون حنّاك.. وتجيد فن التطبيل وتبيع تلج في السوق.. ألواح بدون تكسير علشان تعيش مبسوط.. ما تخلي أي ضمير على قدر ألوانك.. باكر بجيك الخير وتكون عظيم الشان.. ومقامك يبقى كبير لكن بموت جواك.. كل معنى سامي جميل تلويح: قولوا وقولوا قالوا.. ما رايحين تنالوا.. مني ومن حبيبي اندياح: صحيفة اليوم التالي