نحن كنا فاكرين (روشنة) عنكبة في الميدان فقط ...زولكم طالع بتروشن بالعربية في الاحياء يلا اشطب برضو """"""""""""" الشطب في المريخ طايل اي لاعب عدا هيثم مصطفى ..(لم ينجح احد) """""""""""""""""""""""""""" بنسمع ان التسجيلات بتتم بتقارير (فنية) ..تقارير (نفسية) دي اول مرة نسمع بيها عندكم يا ناس المريخ """""""""""""""""""""" . يتهم دائما اعلام الهلال انه وراء الكثير من الاخبار السلبية التى تخرج عن المريخ. . والجماعة ديل ما عندهم اي ذنب. . ويحسب جمهور المريخ ان (العلة) في المريخ سببها اعلام الهلال وما يكتبه عن المريخ. . وبقولوا اعلام الهلال بزيد الحكاية شوية. . بقنبلها يعني. . وفي حقيقة الامر ..العلة في المريخ سببها اعلامه ..وما يقدم اعلام المريخ من (حقائق) تضرب المريخ في مقتل. . لذلك فان السخرية سببها اعلام المريخ نفسه ..واعلام الهلال له في ذلك فقط اجر المناولة. . ديل بقدموا لينا (هدايا) وبقولوا لينا يلا اكتبوا. . نحن قاعدين نعلق ساكت – ما عندنا اي ذنب. . في الغراء (الهدف) امس جاء خبر في الصفحة الاولى تحت عنوان (المريخ ينهي تعاقده مع الطاهر وعنكبة). . هذا الخبر لو جاء في صحيفة هلالية لقلت انه خبر (كيدي)..وهو لا يمت للواقع بشيء. . لكن الخبر جاء في صحيفة مريخية ذات توجه احمر صارخ وهيتقدم خدمة صادقة لفريق المريخ. . والهدف ذات مصادر موثوق منها ..والتقارير التى تنشرها هي تقارير صادرة من المجلس والجهاز الفني للمريخ. . يعني ما بكضبوا ..ولا عندهم مصلحة في ذلك ...بل يحركهم الي ذلك فقط مصلحة المريخ. . جاء في خبر صحيفة (الهدف) محور حديثنا اليوم الخبرالاتي : (بات في حكم المؤكد ان يتم انهاء التعاقد مع الثنائي عنكبة والطاهر الحاج وتحصلت (الهدف) على الاسباب الرئيسية لشطب الثنائي حيث لم يلعب الاول في الدورة الاولى من الدوري الممتاز بسبب اصاباته الكثيرة وعدم انسجامه واستجابته لنصائح الجهاز الطبي بالفريق (الخلود للراحة) حيث ظل اللاعب يطوف كل احياء الخرطوم بسيارته ويتواجد في كل المباريات التى تقام في المناسبات الاجتماعية ، اما الطاهر الحاج فقد تقدم اللاعب بطلب لانهاء التعاقد معه بالتراضي بسبب الحالة النفسية التى يعيش فيها اللاعب منذ خروج الفريق من دوري الابطال والهتافات التى تعرض لها من قبل الجماهير التى تسببت في توتر العلاقة بينه وبين الجماهير). . الكلام دا نازل في جريدة الهدف. . يعني المريخاب براهم قالوا كدا. . والي الان يا جماعة ..انا ما علقت وما قلت اي شيء ..(لكن كلامي بجيكم تحت). . اصبروا ..(تفتكروا هدية زي دي بنفوتها). . ثبتوا لي اول حاجة ما جاء في صحيفة الهدف ..(عشان المريخاب بعدين ما ينكروا لينا الكلام). . انتوا براكم قلتوا كدا. . قالوا شنو؟. . قالوا ان المريخ سوف يشطب الطاهر الحاج لانه عنده (حالة نفسية). . دا ملخص الخبر. . ودي الحاجة البتهمنا في الخبر دا. . نختها ليكم واضحة كدا. . تاني. . الطاهر الحاج عنده (حالة نفسية) بسبب الخروج من دور ال (64)..نتيجة لهتافات جماهير المريخ ضده...لذلك هو سوف يشطب من المريخ. . نحن بنسمع لاعب بشطبوها عشان عنده رباط صليبي. . وبنسمع بي لاعب يشطبوه عشان اصابة في (الانكل). . لكن لاعب يشطبوه عشان (الحالة النفسية) ..دي اول مرة نسمع بيها في المريخ. . ما حصل في العالم دا ..شفنا او سمعنا بي لاعب تم شطبه بسبب الحالة النفسية التى اصابته بسبب خروجه من مرحلة التمهيدي. . دي شنو (الرومانسية) دي؟. . دي شنو الشاعرية الفيها الطاهر الحاج دي؟. . شاعرية مبالغ فيها. . نحن شابكين الجماعة ديل التمهيدي ..التمهيدي والخروج من دور ال (64) لمن الجماعة جاتهم (نفسيات). . الناس ديل طلعوا بتحسسوا. . طلعت مشاعرهم (مرهفة). . كنا فاكرين الجماعة ديل ما عندهم (احساس) ..طلعوا بشعروا وبحسوا. . الطاهر جاتو (نفسيات). . يا الطاهر الحاج انت جيت للمريخ دا من (روما). . يا الطاهر انت جيت للمريخ من فريق الموردة ..يعني حكاية الخروج من دور ال (64) مفروض ما تعمل ليك (نفسيات). . الموضوع عادي يا كابتن. . يمكن عشان الطاهر الحاج (جديد) في المريخ ما متعود على الطلوع من (التمهيدي). . ناس بلة جابر ديل قلبهم بقى زي الحجر ...(10) مرات بطلعوا من دور ال (64)..ولا بتأثروا. . عادي. . ولا عليهم..زي كأنو الفريق الطالع من التمهيدي دا فريق تاني غير المريخ. . الواحد يطلع من دور ال (64) العصر وتلقاه المساء بضرب في (السمك). . كأنو الفريق الطلع من دور ال (64) دا ...فريق وادي دجلة وليس المريخ. . خسارة (سمك) ساكت. . نحن ما قايلين (التمهيدي) دا مؤلم الى هذا الحد ..الذي يجعل الطاهر سادومبا تصيبه حالة نفسية. . والله انتوا يا ناس (بويا) في نعمة. . في نعمة عديل كدا ..بتلعبوا في (المجموعات). . ما في اجمل من كدا. . بالمناسبة المريخ لو اعتمد على (الحالة النفسية) دي ح يشطب الكشف الحالي كلو. . ما في لاعب بيفضل في المريخ. . قالوا ليك علاءالدين يوسف بعد (الجرية) الجراها برضو جاتو (حالة نفسية). . حالة نفسية خفيفة كدا. . وبلة جابر عندو (حالة نفسية) بسبب الكابتنية. . اما اكرم الهادي سليم وموسي الزومة وسعيد السعودي فحالتهم النفسية ...جعلتهم خارج المشاركة مع المريخ منذ بداية الموسم. . سعيد السعودي عنده حالة نفسية من (الكنبة). . وضفر بسبب الحالة النفسية نال كرت احمر في مباراة المريخ وهلال الفاشر. . وامتدت (الحالة النفسية) الي فيصل موسى الذي نال كرت احمر في مباراة القمة الاخيرة. . احمد الباشا ..واضح عليه انو عندو (حالة نفسية)...كورتو البعلبها الان ما كورة زول (نصيح). . بسبب هذه الحالات ..نطالب ألا يعتمد مجلس المريخ الحالات النفسية في الشطب من الفريق. . بعدين نحن بنسمع ان التسجيلات بتتم بتقارير (فنية) ..تقارير (نفسية) دي اول مرة نسمع بيها عندكم يا ناس المريخ. . حالة نفسية شنو؟. . دا فريق وإلّا حالة حب؟. . قال حالة نفسية قال. . الطلوع من دور ال (64) بقى زي (الشاكوش) بعمل طوالي حالة نفسية. . المسكين جاتو نفسيات ..(بقى لا بياكل ولا بشرب). . الطاهر الحاج سوف يغادر المريخ بسبب (الحالة النفسية) كما جاء في خبر صحيفة الهدف. . تعالوا شوفوا محمد عبدالمنعم عنكبة سوف يغادر كشوفات المريخ ليه؟. . حسب خبر صيحفة الهدف فان شطب عنكبة سوف يكون لهذا السبب : (بسبباصاباتهالكثيرةوعدمانسجامهواستجابتهلنصائحالجهازالطبيبالفريق (الخلودللراحة) حيث ظلال لاعب يطوف كل احياء الخرطوم بسيارته ويتواجد في كل المباريات التى تقام في المناسباتالاجتماعية). . دا شنو اللاعب (الجوال) دا. . عنكبة سبب شطبو من المريخ بسبب (الحوامة بالعربية). . دا كلام يا جماعة. . دا يبقى محترف. . لو عنكبة بعمل (الحوامة) البعملها في الميدان بعملها بالعربية في الاحياء يبقى الزول دا ما قاعد ينوم. . نحن كنا فاكرين (روشنة) عنكبة في الميدان فقط ...زولكم طالع بتروشن بالعربية في الاحياء. . لافي اليوم كلو. . عنكبة زول مجامل ..بتواجد كمان في المناسبات العامة. . يعني ما قاعد يقصر مع زول. . اها يا عنكبة مشاركاتك الاجتماعية دي سوف تكون سبب في شطبك من المريخ. يلا اشطب برضو. . الحكاية كدا شكلها ح تصفي على هيثم مصطفى. . الشطب في المريخ طايل اي لاعب عدا هيثم مصطفى ..(لم ينجح احد). . ملحوظة : السنة دي شطب شديد ...العندو حالة نفسية بشطبوه. هوامش . مازمبي في الخرطوم. . وبي طيارة خاصة كمان. . نحن اتعودنا اي طيارة خاصة تدخل البلد دي قاعدين نضربها. . ما عندنا طيارة مرة. . اي طيارة بنضربها. . ناس مازمبي بجوا بي طيارة خاصة ..ناس مازمبي بصلوا بي طيارة خاصة. . وكلو بنضربو. . البجينا بي قطر ..والبجينا بي طيارة....كلو بنضرب امام الهلال. . سيرجو وصل. . غايتو شكلو ..شكل زول عندو كورة ..من الدقيقة الخامسة بحسم المباراة. . شكلو كدا. . وشكلو كمان بقول البرازيلي سيرجو دا في المباراة الواحدة بجيب تلاتة اهداف. . شكلو كدا. . اغشكم يعني. . اهم ما في هذا البرازيلي اللون الاسمر ..يعني البرازيلي دا من ناس كاريكا وبكري المدينة ما بفرزوه. . شكلو (افريقي). . وهذا يعني انه لاعب قوى ..وبنيته الجسمانية جيدة ..ولونو اسمر زي لون مدثر كاريكا. . جيتنا وفيك ملامحنا. . اللاعب الابيض ..فرص نجاحه قليلة في الملاعب السودانية. . لا بقدروا على طقسنا هذا ..ولا بقدروا على سوء ارضية ملاعبنا دا. . سيرجو كان بيلعب في (روما)...وهذا وحده يجعل ليك سيرجو يمكن ان يكون هداف مرحلة المجموعات من اول مباراة. . الهلال يحتاج الي مهاجم قناص ..يترجم الفرص الكثيرة التى تتاح لهجوم الهلال. . نتمنى ان تكون تلك المواصفات موجودة في البرازيلي سيرجو. . الانتصار على مازمبي بعد غد ان شاءالله سوف يكون هو خطوة كبيرة للتأهل. . المهم هو الانتصار على مازمبي. . الحصول على نقاط مباراة مازمبي ..هي الفيصل في مجموعة الهلال. . واضح ان الزمالك المصري سوف يكون اضعف فرق المجموعة. . الهلال مطالب ايضا الانتصار على الزمالك في القاهرة. . خاصة ان الزمالك يلعب بدون جمهور. . وهذا امر سيمكن الهلال من الانتصار على الزمالك ان شاءالله. . لاعبو الزمالك اغلبهم صغار في السن ..وتنقصهم الخبرة ..وهذا ما يجعل نقاط الزمالك متاحة لكل اندية المجموعة. . لذلك الحصول على نقاط مباراة الزمالك في القاهرة امر في غاية الاهمية. . مثلما انتصر منتخب الشباب المصري على المنتخب السوداني في الخرطوم ...يمكن للهلال ان ينتصر على الزمالك في مصر. . الزمالك امس كاد ان يخسر امام وادي دجلة بعد ان ادرك التعادل في الزمن البدل الضائع بعد ان كان الزمالك خسران في الشوط الاول صفر / 2. . لم يعد هناك فرق بين مريخ الفاشر ومريخ ام درمان ..بعد ان يسجل المريخ العاصمي ثلاثة لاعبين من مريخ الفاشر. . تاني الفرق ح يكون شنو؟. . لو جبتوا محسن سيد كمان بتكونوا كملتوا الناقصة. . .... . عاجل : الاهلي شندي عليه تسجيل سعيد السعودي ..سوف يحقق اللاعب نجاحات عريضة في شندي. وإن طال السفر - محمد عبد الماجد صحيفة قوون
