في (فهم) غريب حايم الايامات دي. في ناس فهمها كدا. عباس الترفاس ...فهمو للفرحة ..هو انك تجيب ليك (طحنية) وتكب فيها (عسل). تلخبط الطحنية بالعسل ..وتضرب على كدا ...الزول الجنبك ما بتديه. عباس الترفاس فهمو كدا (للفرح). ما عندو فرحة من غير (طحنية). عاوز تفرحو جيب ليه (طحنية). في ناس الواحد فيهم يعمل ليك فيها (شاعر)...لو جاءهو تلفون غريب. يعاين للنمرة ويقول ليك دا بتكون (سحر). اي رقم غريب يضرب ليه يقول ليك دي بتكون (سحر). ويندلق ليك على كدا. على الاقل يكتب ليه (قصيدة). ويقعد (يتشعور) فينا للصباح – نحن كنا بنجتهد ..وننفرك عشان نطلعوا من الحالة (الشاعرية) دي. وكان ما بطلع من الحالة دي ..إلا وقت عثمان التوماسني يجيه بالباب عديل كدا ...ويقول ليه ضربت ليك قبل شوية مالك ما بترد. في (شعر) حايم في البيوت بالاحساس دا. ناس المريخ هسع عندهم (اعتقاد) سام ..حايم برضو في الحلة والجرايد. خليتوا لينا الجرايد زي صيوانات البكاء. بكاء شديد. جعري ما بالغ فيه. الناس ديل ما فاضل ليهم إلّا يشيلوا (اعمدتهم) دي ويملوها ملوخية وسلطة اسود ويمشوا بيها على المستشفيات. الزول وقت يكون عندو زول راقد ..بشيل ليه (عمود) ويمشي عليه. اعتقاداتكم دي لكن بندمكم عليها. ادخل جوة واطلع الحوش ....شوفوا (الجو) كيف؟. سممتوا لينا (الاجواء). لو عاوز تعمل ليك حاجة مهمة ، تكتب او حتى تتابع ليك مباراة في الدوري الانجليزي .. اول حاجة بتعملها بتشغل (المكيف) وبتطرد (الشفع) من الغرفة. في ناس بطردوا (الشفع) اول حاجة ..بعدين يشغلوا (المكيف). كل ناس عندها ثقافات براها في الموضوع دا. ما مهم الاول منو ؟..المكيف ام الشفع؟. دا ما موضوعنا. ويمكن تكون حريف – تجيب ليك (جك) موية تخليه قدامك ، بعد ما تشغل (المكيف). ويمكن تعمل نفس الحركة لو كنت عاوز (تنوم) وما عاوز (شافع) يزعجك. بتقفل التلفزيون ..وبتطرد الشفع برضو. يلا ما عاوز اي (شافع) هنا. هسع نحن عاوزين نعمل نفس الشيء. نطبق نفس النظرية. ح نطرد (الشفع) ديل ...ونتفرغ لي (مازمبي). عندنا مهمة اكبر ..المواضيع الفارغة دي ..لا فاضيين ليها ولا حاجة ..ولا عندنا ليها وقت. عندنا مجموعات. المجموعات دي حاجة كبيرة اوي يا مريخاب ...انتوا قايلنها (حوض النيل). دورتكم بتاعة سد اوقات الفراغ دي ..نحن لا فاضيين ليها ..ولا عندنا ليها صبر. نحن في (المجموعات). انتوا يا ناس المريخ ...ما عندكم شغلة ..ح تقعدوا كدا فاضيين (تنقوا) الي ان تنطلق الدورة الثانية للممتاز. بس تنقوا. السنة كلها تنقوا زي (نقاع) الزير. اقعدوا انشغلوا في رقبتكم. اعملوا ليكم (كمينة) طوب. بتتطلع ليكم قروش. واقعدوا اتحاسبوا عليها – طوبة – طوبة. كسروا المقصورة ..ابنوها تاني ..ما عندكم موضوع (ح تعملوا شنو يعني؟). عدم موضوع بس. كسروها على الاقل ح تلقوا ليكم موضوع تكتبوا عنو ..ويمكن كل يوم جمال الوالي تنشرو صوره في الجرايد. ممكن المقصورة تسليكم. تسموها (ماسية) ..تسموها (ذهبية) ..ما تسموها في الاساس ..على كيفكم. مقصورتكم وانتوا (احرار) فيها. السيخ وصل من بورتسودان او ما وصل ..(موضوع). بيسليكم شوية ..بملأ ليكم وقت فراغكم. لو وصل موضوع ..بكتب ليكم عنو مزمل ابوالقاسم. ولو كمان ما وصل ..بكتب ليك عن الموضوع دا معاوية الجاك. ما عندكم اي مشكلة. في الحالتين في موضوع. ما تشيلوا هم ..المواضيع الزي دي راقدة ومتوفرة بالهبل. يمكن تتغالطوا في الحكاية دي اسبوع. اسبوع ما في زول بسألكم. ولا نقول ليكم حاجة. ولا بنقول ليكم (الحيطة) عاوزة ليها كم طوبة؟. ولا قلاب الطوب عمل كم في السوق؟. ان شاءالله تجيبوه من ناس المحلية مجاني. متعودين على الحاجات دي. ما تقعدوا تنططوا لي في عيونكم متل كراسي الخيرزان. اول كراسي الخيرزان بتنطط عيونها. اخدوا راحتكم على الاخر...(بس ما تقربوا على كورتنا دي). انتوا الكورة شن خبركم بيها؟. يمكن تثقفوا نفسكم شوية بالسيخ ..السيخ الاصلي بستوردوه من وين؟. والعمود في المقصورة عاوز ليه كم (سيخة). موضوع. السيخ الصيني ريحتو (فسيخ – فسيخ). على كيفكم. ما بنسألكم. ما بنهببكم. ولا بنقول ليكم حاجة. اكتبوا زي ما عاوزين عن (السيخ). ان شاءالله تطلعوا ليكم (سيخة) هداف الدوري الممتاز. ابوشيبة طبعا بقوم يقول ليك (السيخة) دي (تسلل). اتكلموا عن السيخ زي ما عاوزين. احسن من تقعدوا لينا كدا في الفراغ القاتل دا. بالطريقة دي ح تجيكم نفسيات. ح تروحوا فيها ساكت. شوفوا (الاسمنت) عمل كم؟. اعملوا ندوة عن (الاسمنت) جيبوا ليها عصام مسكين ..ممكن يقعد يحدثكم عن (الاسمنت) دا للصباح. الاسمنت واثره في تطور كورة القدم في السوداني. الاسمنت والبناء الداخلي للروح. ما ح نقول ليكم شيء. بس شنو؟. بس ما تقربوا على (الكورة) حقتنا دي. زي ما عاوزين تقولوا ..قولوا عن (الاسمنت). التكوين الاول ..والنشأة ..وكيف الاسمنت يحتفظوا بجودته اطول مدة ممكن. وهل هناك علاقة بين الاسمنت والحضارة الاغريقية؟. قول في علاقة..يعني شنو؟...كضبوا زي ما عاوزين ..ما بنقول ليكم حاجة. (اتسمتوا) زي ما عاوزين. موضوع. نحن عندنا (مجموعات)..ولو قعدتوا تتابعونا وتقرأوا لينا ..بنعمل ليكم (حوص) في الطوحال. عندنا قضايا اكبر. خلاص (هوسكم) المحلي دا ..نحن ما فاضيين ليه. ولا عندنا ليه وقت. تمطّقوا في عيونكم متل موية الغسيل البدفقوا فيها برة البيت. اول موية الغسيل بتتمطق. فكوا (السور). مالوا – برضو (فكرة). احسن من تقعدوا لينا كدا. او ما تفكوا (السور) انتوا احرار على كيفكم ..سوركم وما في زول بقدر يقول ليكم شيء. السور حقكم دا مركب غلط ..عشان كدا طلعتوا من دور ال (64). كلو من (السور). السبب (السور). انتوا قايلين المشكلة في بلة جابر. المشكلة في (سوركم) الاشتر دا. الزول وقت يكون قاعد فاضي في البيت ..مرات جنو بقوم ..وبقول احسن حاجة افك (الموبايل) اشوف الصوت دا طالع من وين؟. انتوا فكوا (السور)..وركبوه تاني...(موضوع). موضوع (السور) دا ممكن يشغلكم شهر. شهر ما في زول بسألكم. ولا بنقول ليكم حاجة. ولا بنهببكم. ان شاءالله تبقوا (السور) بطل لدورة حوض النيل. نحن مالنا. بس شنو؟. بس ما تجوا على كورتنا دي. المجموعات دي ما تقربوا ليها. ممكن كمان تعملوا ليكم اسبوع ثقافي في حكاية (السور) دا. فاضيين ما عندكم اي موضوع. بابكر سلك ممكن يتكلم ليكم عن السور (7) ساعات متواصلة بدون فواصل اعلانية. ما عندو مشكلة. سلك بتكلم. السور ..احسن ليكم من الغلاط البتعملوا فيه دا. فاضيين وما عندكم موضوع. ح تقعدوا تتكلموا لينا (8) سنوات عن هدف نزار حامد الصاقعة. ما عندكم موضوع. وقاعدين ساي. وطلعتوا من دور ال (64). عشان كدا ممكن هدف نزار حامد دا تعلموه زي (مرحلة الاساس) في السلم التعليمي الاخير العاوزين يغيروه الان. ح يكلمونا عن الهدف وانو (تسلل) 8 سنوات. تسلل. بالله. اصلو ما ممكن. اصلو ما بنصدق. متين الكلام دا حصل. انتوا المباراة دي شفتوها في الف ليلة وليلة. انتوا بالغلط حضرتوا ليكم ندوة عن مكافحة الملاريا ..قامت الحكاية اتلخبطت عليكم. دخلتوا غلط. مامون ابوشيبة ح ينتظر احفاده يتخرجوا من كلية الطب جامعة الخرطوم ..وكلية الهندسة ..ويجتمع بيهم بعد (50) سنة لو مد الله في الاعمار ويقول ليهم تعالوا هنا عندي وصية عاوز اقولها ليكم – هدف نزار حامد في المريخ (تسلل). بالله. الوقت داك طبعا مامون ابوشيبة بتكون اتقدمت بيه السن شديد وبتكون لو جبت ليه سيرة (بشه) ساكت بقول ليك هدف وليد طاشين في المريخ سنة 1986 ذاتو (تسلل). وما بعيد في مقرر التاريخ بتاع سنة خامسة يدخلوا ليك في المقرر هدف نزار حامد الاخير. ويقولوا (تسلل). وابوه تسلل كمان. الحكم محمد الفاتح السمؤال نقض للهلال هدف صحيح ..واعتبر (بشه) متسلل. عليكم الله اسرع لاعب في السودان ممكن يتسلل. بشه دا بتحرك ما شاءالله زي (الليزر) – ممكن يقع ليه في (تسلل). الحكم نقض للهلال هدف صحيح. ناس المريخ زعلوا ..قالوا الحكم مفروض ينقض هدف نزار حامد ايضا. متعودة دائما. الحكاية دي زي الناس الكانوا بفتشوا في هلال العيد. في واحد شاف الهلال ..قال ليهم اهو ..الهلال يا هو داك. الجماعة صفقوا ليه ..واعطوه جائزة. قام بعد شوية قال ليهم داك تاني (هلال). هسع ناس المريخ نقضوا ليهم هدف بشه ..قاموا قالوا هدف نزار حامد ذاتو مفروض ينقضوا لينا. هدف باثر رجعي. متعودة دايما. لاقين (التكية) دي ..وعاوزين اي هدف ينقضوا ليهم. يعني الهلال اصلو ما يسجل ليه هدف في المريخ. اي هدف يجيبوا الهلال (تسلل). سيحة خرب ليكم طبعكم. بدل النقة ..والكلام البقينا حافظنوا من اعلام المريخ ..شوفوا ليكم موضوع. اعملوا ليكم اي حاجة ...انشغلوا بيها ..بدل ما تقعدوا لينا كدا. اقول ليكم حاجة ..خلوا المقصورة ...(الموضوع دا بقى قديم – وبقى ما جايب حقو كمان؟). الناس نقشوه. السور ذاتو ما تشتغلوا بيه. شوفوا ليكم فكرة جديدة. اعملوا ليكم (سينما) في شارع النيل. وجيبوا فيها جمال الوالي. السينما موضوع ما كعب. موضوع كويس. ممكن تشغل الناس شوية..وتطلعهم من حكاية الطلوع من دور ال (64). لو السينما ما اشتغلت ..اعملوا ليكم مشروع تاكسي تعاوني. جيبوا ليكم باصات. موش عندكم (والي) زي والي الخرطوم. خلاص اعملوا ليكم باصات ..عشان تبقى باصات الوالي. وعلى كدا ..اعملوا ليكم مكتب. عشان يبقى مكتب الوالي. وبعد كدا ..شوفوا الجماعة ..نادوهم واحد ..واحد. العاوز يتحلل ..يتحلل قدام الناس كلها. والما عاوز يتحلل بي طريقتو. موضوع. الموضوع دا ممكن يشغلكم للموسم الجديد. اصلو الموسم دا ما عندكم فيه اي حاجة. (كبريتة) السنة دي ما بتطلعوا بيها. طلعتوا من دور ال (64). وهسع انتوا في مركز (الوصافة) في الدوري الممتاز. وصافة ساكت. عشان كدا قعدنا نفكر ليكم في موضوع. لو قعدتوا لينا كدا ..ح تملونا (فقر). ونحن والله لا فاضيين ولا حاجة. هسع دا ..يوم الجمعة دي ..ح نلعب مع مازمبي في مرحلة المجموعات. وبعد ما نلعب مع مازمبي ح نطلع نلعب مع الزمالك. ونرجع نلعب هنا. ونسافر نلعب برة. وانتوا قاعدين ساكت. وبعد ما نرجع من برة ..ح نتفرج في بطولة كاس العالم..ونحن في المجموعات. يعني حتى فرجتنا في كأس العالم ..فرجة ونحن بنلعب في المجموعات. انتوا ح تعملوا شنو؟. ما تقولوا لي ح نعمل دورة حوض النيل. الضحك بشقنا. حوض النيل ..إلّا دورة لصيد الاسماك. حوض نيل شنو؟. الناس ماشي المجموعات. الناس ماشي كأس العالم. انتوا ح تقعدوا هنا ..وتلعبوا في دورة حوض النيل. غايتو ناس المريخ ديل بخترعوا ليهم جنس (دورات). الفراغ بعمل اكتر من كدا. ملحوظة : شعور (الوصافة) دي شعور قاتل. هوامش هسع ناس المريخ ح يقعدوا يتابعوا كاس العالم دا كلو وهم (وصفاء). وصافة مجمدة شهرين. تلعبوا في دورة حوض النيل. ما تلعبوا. المريخ هو (الوصيف). شوفوا ناس الهلال ديل حقارين كيف؟. اتصدروا الدورة الاولى ..ومشوا يلعبوا في المجموعات. انتوا يا ناس الهلال وقت عندكم (مجموعات) وما تفكوا الصدارة دي شوية للمريخ. يعني في داعي تسيطروا داخليا وخارجيا على البطولات. فيصل موسي ما بستحق الطرد – وهدف الهلال الاول (تسلسل) – وهدف الهلال التاني برضو تسلل – ومساوي مفروض يطرد – واتير توماس برضو مفروض يطرد – وقون المريخ مفروض يحسبوه بي تلاتة اهداف ..(دي تحليلات سيحة يوم الجمعة القادمة). انتوا تعالوا هنا علاءالدين يوسف دا جاري (اسبوع) كامل وراء بكري المدينة ...وتمنحوه نجومية المباراة. اكيد يمنحوه (جائزة) بعد المسافة التى قطعها وراء بكري المدينة. يا فييرا انت (الكابتنية) رفض يمنحها ليك ناس بلة جابر وموسى الزومة ..ما بكري المدنية. الطريف المريخاب بعد (الجرية) دي كلها ..قالوا ليك بكري المدينة تسلل. يا جماعة دي حصلت في الدنيا. القون يجيبوا نزار حامد ..ويقولوا ليك بكري المدينة (متسلل). بكري دخلو شنو؟. علما ان بكري المدنية لم يهبش الكورة إلا بعد ان تجاوزت خط المرمى ..كما انه لم يموه على الحارس او المدافع ..عشان الجماعة ديل ان قد حسم امرهم نزار حامد (الصاقعة). المريخاب اتعودوا على (التسلل). بقي اي حاجة يقولوا ليك (تسلل). التسلل عندهم زي (التحلل). خلاص بكري المدنية (اتحلل). المشكلة شنو؟. انتوا مشكلتكم كلها في بكري المدينة. فلاحتكم في بكري المدينة. شيلميس مسكين ..يجيب ليه (5) اهداف في النسور ..ويقعد (كنبة) امام الهلال. اوليفيه بعد استبداله ..قالوا سلموه (الجواز). اهلك طوالي يا كابتن. اجمل ما في مباراة القمة ...ان مدرب المريخ كان كل مرة يطلع ليه مهاجم ..ويدخل ليه مدافع. الجماعة لاعبين في ملعبهم ..وبضيعوا في الزمن. طيب انتوا كنتوا بتتفاصحوا لينا في شنو؟. فصحاتكم طلعت فصاحة جرايد ساكت. قرار رفض لاعبي المريخ منح علاءالدين يوسف شارة الكابتنية ..قرار سليم. عارفين ليه؟. عشان لو المريخ منح فييرا شارة الكابتنية ...فييرا ما بكضب وبمنحها لهيثم مصطفى. ناس بلة جابر عرفوها. قالوا ليك اتخندقوا طوالي في (الشارة). مع هجوم اعلام المريخ المتسمر والدائم ..إلا ان كل كتاب المريخ طالبوا بشطب اكثر من (10) لاعبين في التسجيلات القادمة. انتوا يا جماعة وقت مقتنعين ان الخلل في (الحكام)..ناس بلة وموسى وضفر شاطبنهم ليه؟. ذنبهم شنو؟. حالتها دي بي مجدي مرجان. كامبوس في المقصورة عمل فيكم كدا. طيب وقت ينزل يعمل فيكم شنو؟. نجم المباراة الحقيقي هو اللاعب سيسه. سيسه قدم مباراة كبيرة ..صال وجال في الملعب ..وقدم مستوى راقي ..وانعش كل المساحات التى وصل اليها. سيسه مكسب كبير للهلال. ولو لم يخرج الهلال بلاعب غيره في التسجيلات الماضية لكفاه ذلك. وينتظر الكثير من سيسه. مستوى الهلال الذي قدمه امام المريخ ..جعلنا نقول ان الهلال لا خوف عليه امام مازمبي الجمعة القادمة. الهلال قادر ان شاءالله على الانتصار على فريق مازمبي. جمهور الهلال في مباراة القمة كان اكثر من رائع ..ساند وشجع ..وجعل اللون الازرق هو الغالب في استاد الخرطوم. في حضرة هذا الجمهور العظيم ...لا خوف على الهلال. كل حاجة مية المية. ننتظر اضافات قوية ومؤثرة لكشوفات الهلال في التسجيلات التى سوف تبدأ بعد غد ان شاءالله. سجلوا صاح ..تشيلوا كاس الاندية الافريقية. مجاهد فاروق لاعب الاهلي شندي ..جوكر يلعب في الدفاع والارتكاز والهجوم ..وهو لاعب صغير في السن يحتاجه الهلال. ونحتاج كذلك لفارس. ورغم عدم مشاركتهم افريقيا مع الهلال ..إلا ان نبحث عن التميز في المستقبل. خاصة وان الهلال لن يضيف افريقيا غير ثلاث لاعبين. لذلك الاضافة لكشوفات الهلال افريقيا يمكن ان تكون للاعبين الاجانب. وهذا يجب ألا يجعل الهلال ينسى امر الاضافات المحلية. مازمبي يصل للخرطوم غدا بطيارة خاصة. قولوا ليهم الطيارة الخاصة عملت شنو ليوبار. درمة الشجاع اكد صحة هدف بشه. وقال ان الحكم اذا احتسب الهدف الاول لنزار حامد فلا غبار عليه فهو صحيح. تاني يعملوا ليكم شنو اكتر من كدا؟. الهلال قبل كاس العالم هو متصدر للممتاز. وقبل ان تأتي بطولة كاس العالم سوف يتصدر الهلال مجموعته في البطولة الافريقية. صدارة محلية وافريقية ان شاءالله. ...... عاجل : التسجيلات يوم الاربعاء ..عشان خاطر الهلال ..نحن عندنا (مجموعات) انتوا بتسجلو على شنو؟..(دورة حوض النيل!!).
