كنت أعتقد أن الضنب.. زيادة مافي داعي ليها.. أتاريهو مهم أهمية الليد والكراع.. وخصوصا للحيوانات البتمشي علي أربعة.. وال احيانا تتفلهم وتمشي علي اتنين زي القرود.. كل ذوات الضنب من التي تعايشنا وتعيش بين ظهرانينا للضنب عندها أهمية. البني آدم عشان بيمشي علي كرعيهو.. وكرعيهو قايمات بالمهمة على أكمل وجه ما محتاج لي ضنب.. فهو قادر أن يجري وان يلف بسرعة وأن يتمالك توازنو من غير ضنب.. والذي يعتبر آلة توازن عند الحيوانات المضنبة.. وقد يكون الضنب معيقا للحركة في الزول لو قام ليهو ضنب.. ولذلك انتفى وجوده للمنفعة.. ونحمد الله على ذلك.. الضنب يساعد الكلب لو أخدنا الكلب مثالا.. يساعده في اللف والدوران اثناء الجري وخصوصا لو ساكي ليهو طريدة أرنب أو غزالة.. ودائما الحيوانات ديل بيستعملن سلاح المراوغة لإجهاد الكلب.. والمراوغة تكون في اللفة المباغتة.. التي لولا الضنب في الكلب لكان الكلب فاتها بيهناك وهي جرت وإتدست.. لكن الضنب يعمل زي الدفة يخلي الكلب يلف سريع جدا في نفس اتجاه الحيوانة الزاغت منو دي.. برضو الضنب عند الكلاب مهم في لغة الجسد التي تتعامل بها الحيوانات.. فهو يعتبر الطرف الأهم في هذه اللغة زي ما بتعتبر الليد طرف مهم في لغة جسد الإنسان.. الزول لما يزعل بيستعمل يدو.. لما يفرح بيستعمل إشارة يدو.. لما يهدد بيستعمل إشارة من يدو.. لما يشتم بيستعمل إشارة من يدو لما يخاف برضو.. ولما يكون داير يهاجم برضو.. أوضاع وهزة الضنب عند الكلب تعبر عن حالات معينة.. لما يكون فرحان بيهز ضنبو بالعرض هزات سريعة متقاربة.. مع هز الكرعين .. لما يكون زعلان برضو بهزو سريع جدا.. لكن الفرق شنو هنا؟ الفرق الاضنين.. تلقى الاضنين في الفرح مرخيات.. لكن في حالة الزعل يكونن واقفات.. والكلب لما يهز ضنبو بالعرض وحركات براااحة كدي ويقيف يتلفت معناها محتار وراسو ضارب، كدي أكنك قول لي كلب قدامك "جر" ما بلخعة.. يقيف يعاين ليك ويهز ضنبو بالطريقة دي (يا ربي النضم دا لي، واللاّ لي كلب تاني؟.. إن بقى لي، الزول دا مالو قال لي جر؟ سويت شنو؟).. برضو لما كلبين يشاكلو المهزوم بيحشر ضنبو بين كرعيهو.. يبرك في واطة الله دي (دا الانبطاح البي يقولوهو).. ويقعد يعوّص بصوت واطي.. وكأنو بيقول لخصمو: "خلاص يا اخي! ما قلنا ليك انت راجل.. عليك الله ما تجرسنا اكتر من كدي".. وبرضو ممكن يحشر ضنبو بين كرعيهو ويفك البيرق لكن تاني ما يجي بالغلط ساكت حايم بشارع الكلب دا.. الكلب الضنبو ديمة مرخي دا كلب خوّاااف وان راجيهو يحرس ليك بيتك من الحرامي، الرماد كال خشمك.. يكون راقد، الحرامي يجي مااااشي فيهو يرفع راسو يعاين ليهو ويرقد تاني ويقول (أه.. مالي ومال المشاكل يقوم يضربني بي عكاز واللا حاجة). أما الضنبو منتصب مرفوع شوية دا كلب شديع وموقد نار.. وتغيان.. وعاجباهو نفسو.. وممكن يعضيك بلا غبينة.. بس رجالة كدا!!.. وان سمعت نضمي، خلي ليهو الشارع..!!! الباب البجيب الريح- صحيفة اليوم
