عام 1930 متفرجخ في الواطا ومنهمك.. في نساجة عنقريب وقفت مسافة مترين.. ولابسة قرباب.. تأشر بايديها وتكورك ليهو: "هوي.. هوي يا دا".. مايرد.. تقول في سرها: "يبقى ما سمعني" عام 1970 برضو متفرجخ فوق برش قديم.. ومفرتق مكنة عربية ومنهمك في الشغل.. واقفة مسافة متر ونص لابسة فستان مشّدر.. بحمالات.. مضمر.. يجسد كرشا.. ولدت لمن فترت.. تكورك ليهو: "هوي يا أبو صلاح.. أبو صلاح.. هي يا يمه حليلو هو.. أبو صلاح". ما يرد.. تقول في سرها: "خلاس.. قام علي غتاتو" عام 1990 منهمك ومادي رقبتو وراسو قرب يدخل في شاشة التلفزيون متابع برنامج باهتمام شديد.. تقف مسافة متر.. حفيانة.. لابسة قميص بيت.. مشدّر برضو.. شايلة شافع في صفحتا.. وتكورك ليهو: "يااااااا عماااااد.. عماد.. أنا ما بنضم معاك؟؟؟!!!" ما يرد.. ثم بأعلى صوت".. عماد ؟.. طرشتَ؟.. أجي يا اخواني.. شفتو غتاتة الراجل دا؟" عام 2005 مرة يكوّع ومرة يقعد علي حيلو كرعيهو مدلدلات، ومرة يصنقر في نص السرير يشاهد في مباراة في كرة القدم.. ماتش مهم جدا في التلفزيون.. تقف مسافة نص متر منه.. لابسة بجامة كحلية.. مدخلة إيديها الاتنين في جيب قميص البجامة.. وبنطلون البجامة ضارب سيستم.. وتناديه بقليل من الدلع: " عطوفي.. عطوفي.. عاطف.. عاااااااطف". ما يرد: "يا اخي ما ترد علي، انا ما بنضم معاك.. عااااطف رد على الحيطة البتنبح دي يا اخ.. ينعل ابو الكورة لابو اليوم الجابها" * هذا الطناش التاريخي لا يقصده الزوج.. حيث ثبت علمياً أن الرجل لا يمكن أن يركز في اكتر من حاجة.. عكس المرأة التي تستطيع أن تركز في اكتر من شي في وقت واحد.. يعني ممكن تكون في التكل وأضانا مع شافعتها النايمة في الاوضة وتسمع في الرادي وتنضم مع صاحبتها في الموبايل وفي نفس الوقت داخلة واطساب ومتابعة برنامج في التلفزيون تسمع فيهو وخاتة بالا الباب يدق عشان شفعها جايين من المدرسة.. أما الرجال فما بيقدروا يركزوا في أكتر من حاجة واحدة.. عشان كدي ديمة تلقاهم منشولين في المواصلات.. الواحد يقيف يكابس ويكون مركز في إنو يركب.. ويخلي جيوبو في الصقيعة.. وقد اكتشفت قبيلة النشالين هذه الخاصية الإلهيه واستثمروها لمصلحتهم.. أما المرا لو دايرة تركب مواصلات.. بتكون مركزة تركب وتعاين لكرسي محدد ومركزة في شنطتها وفي كرعيها مافي زول يعفصن.. لو نشال هبش الشنطة ساكت تحس بيهو.. وذلك نتيجة للفوارق بين خصائص مخ الرجل وخصائص مخ المرأة.. والمرأة تريد ان يكون الرجل بنفس طريقتها.. !!!.. وهي خاصية وهبها لها ربنا سبحانه وتعالى دونا عن الرجل، وحقو تحمد الله وتقرّط علي كدا. عشان كدي عزيزتي الزوجة لو طنشك الزوج وهو مشغول بي حاجة تانية اتأكدي إنو ما قاصد.. وانت عزيزي الزوج ما تتكل علي نضمي دا وتطنش حين مصاريف!! الباب البجيب الريح- صحيفة اليوم التالي