* أولادنا سافروا بالسلامة * هنالك أهداف من المشاركة فى سيكافا لا تخفى على الناس * أسباب ودوافع منها الجهرية ومنها السرية * ولكن النجاح يكمن فى تحقيق تلك الأهداف بشقيها * وسيكافا سوق لإكتشاف مواهب صغيرة فى السن كبيرة فى الموهبة متطلعة وزهيدة الثمن * وفى سيكافا فرصة للإحتكاك وإكتساب الخبرات والإنصهار * وفى سيكافا براح لإكتشاف الثغرات بهدوء * وفى سيكافا فرصة للإنسجام وتقوية العلائق الشخصية بين اللاعبين * فالأنسان مهما عرفتو * بتعرفو اكتر لو سافرت معاهو * وفى سيكافا فرصة لإجترار إنجازات الماضى وتبصير الجدد بها * ونقطة إنطلاق نحو تلك الآفاق * وهناك الدوافع السرية * وسرنا فى بير * المهم * على ذكرى سيكافا نذكركم * أبو الهل فشل فى الوصول لمنصات التتويج فيها * كان طوال قريب العشرة مشاركات ضمن وفود التفويج * عرف التفويج عشرات المرات * ولم يعرف التتويج فيها * فالهلال أمى جوياً * ومحو الأمية الجوية يجب ان يكون شعار الهلال * ولن يتحقق للهلال ذلك الشعار إلا إذا إتبع خطوات محددة * أول حاجه يضع إستراتيجيه * يشوف روحو وين * وداير يصل وين * يبقى زى منو * وليه * وكيف يصل * والأجابة على سؤال يشوف روحو وين * هى انه خارج لوح الشرف الأفريقى * ضمن مجموعة الأمية الجوية * داير يصل وين؟ * الإجابة داير يدخل لوح الشرف الأفريقى * يبقى زى منو * من غيرنا أهدى لهذا الشعب معنى ان يعيش وينتصر * يبقى زى المريخ * ليه؟؟ * ليمحو الأمية الجوية * أول حاجة يعترف بإنجازات الناس * يعترف بى سيكافا وسيكافا ودبى والشارقة ومانديلا القاطع قلبو ده * بعد داك يسأل مجرب * يسألونا * كيف قدرتو تجيبوا البطولات الجوية دى؟ * نقول ليهو اول حاجة إشتغلنا بى روحنا * لأنو من إشتغل بالناس مات هماً زى موتتكم دى * تانياً جلب المواهب القلبها حار * تالتاً التخلص من إحساس الدونية والإعتماد على الثقة فى النفس * بعد داك مرحلة النزاهة واللعب داخل الملعب وترك اللعب خارج الملعب * وأهم مرحلة هى مرحلة تطمين الحكام وعدم ضربهم بالبونية والنكران بعد ذلك * وعدم سكهم نهاراً جهاراً أمام العالم أجمع * فمثلاً أسى بدل تشتلوا شتلكم ده عن وانغا * وتقولوا شتلاً أن كينيا حاسبت من ضم وانغا للمنتخب الوطنى * كان تحاسبوا إنتو من ضم الماسورة سيرجيو ليكم * ومن قبل بذلك الضم * ومن طول بالو على الضم * وتعتذروا لجمهوركم الذى دفع الثمن * لاعب أكبر من الفوال يلعب كيف بس؟ * أكبر من الفوال براهو! * أكبر من مبارك البلال * واكبر من رمضان احمد السيد * ويجيب اتنين محمد عبدالماجد * أيها الناس * أفضل تتحروا عن سيرجيوا ولا تشتلوا فى وانغا؟؟؟ * مريخابى شفت * أطلق على وانغا لقب منصة صواريخ القسام * سجم تل أبيب * المهم * السرير التاى برد شديد * والأحد جاية مطرة حسب كلام ناس الإرصاد * الأتنين خلوها * التلات لو ربنا أحيانا سنكتب * نكتب تحت عنوان * من السرير للحاف * ونهديها لمحمد عبدالماجد * غايتو يا محمد عبدالماجد * يوم الأحد من الدقيقة خمسة وتمنين لحدى نهاية الكورة لو فى بلنتى * تكونوا بالغتوا * تبقى حقيقة الفترة من الدقيقة خمسة وتمانين لحدى نهاية الكورة معاكم زى البرق العبادى * بتمطر بتمطر * بس ما تتبلبلوا شديد * السرير التانى برد * البلبيل الشديد فى الهمبريب الضارب السرير ده بجيب الإلتهاب * أيها الناس * إن تنصروا الله ينصركم *أها * نجى لى شمارات والى الخرتوم * أكان شفت يا والينا * قاعدين والطين حوالينا * بنتكلم عن الحال الفينا * عن البلد المطينة بى طينها * بعد سيول شرق النيل بسبب الزلط القفل البلد وقفل مجارينا * برضو قفله تانية لقينا * أبوروف يا والينا * مبنية جالوص وطينة * من ولدونا وتبينا وربينا * ماشفنا حيطة وقعت فى ابوروف علينا *السنة دى يا والينا * قفلتوا الشارع القفل الخيران علينا * ووقعت ابوروف الحزينة * وقالوا خطأ هندسى قفل المجارى علينا * البلد دى يا والينا * الموت بقى لما يجبنا * سببوا يا خطأ هندسى يا خطأ طبى يا والينا * والغريبة أغلى كليتين بالنسبة للمصاريف المفروضة علينا * أقول ليك يا والينا * قفلوا الطب والهندسة * وكتروا كليات القانون عشان يبقى القانون هو الحاكم فينا *وكتروا كليات الآداب عشان نحافظ على باقيها الفضل فينا * ودرسونا معنى الإستقالة وأدب الإستقالة يا والينا سلك كهربا * ننساك كيف والموت يا خطأ طبى يا خطأ هندسى وعجبى والللللللللللللى لقاء سلللللللللللللللللللك في السلك - بابكر سلك
