* أيها الناس * سيكافا تهمنا شديد جداً * لأن غيرنا عجز عن التحليق ملكاً عليها ولو مرة واحدة فى عمره * بل غيرنا أدمن التحليق بعيداً عن منصاتها قائداً لسرب الطيور المغادرة * لذا نجد غيرنا يسخر منها تغطية لعجزه وفشله فيها * وسيكافا تهمنا * لأنها وجه الخير الذى أعدنا من قبل لمنصات التتويج الأفريقية * فأن كانت منصات التتويج الأفريقية جامعة * فقد دخلناها من مدرسة سيكافا الثانوية * اما الذين رسبوا فى الثانوى * ويعيدوا الف سنه * مبرراتهم واهية لن تخدعنا * زى الطالب البعيد العمر كلو ويقول داير يدخل الطب * من بدا يمتحن والى الآن * فى أمراض إنقرضت * وظهرت أمراض جديدة * وهو لسه بمتحن عشان يدخل الطب * وسيكافا تهمنا * لأننا هبنا إليها ولنا أهداف ندركها جيداً * وتحقيقها يحتاج الى مثابرة وصبر وقناعه * فنحن نقتنع بما حققناه وبما نحققه مستقبلاً * نقتنع ولكن لن نقنع مثل غيرنا * وسيكافا تهمنا * لأن من يهمنا يشارك فيها * فإن كانت السياسة قد فصلتنا * فإن الوجدان يصهرنا * والوجدان ما زال على اتصال وإنصهار بالأخوة فى الجنوب * وأطلع بره بيهمنا ونشجعه وبحرارة * أطلع بره جوبا * وجوبا مالك عليا * وعلى ما أظن أن آخر مباراة لأطلع بره جوبا ضد الهلال كانت تعادل * ومفروض اطلع بره يكون غالب * لكن الله غالب * نتمنى للأشقاء فى اطلع بره ان يوفقوا فى مشاركتهم فى سيكافا * فهم اهلنا وعشيرتنا ومننا ولينا * أيها الناس * اول جنوبى يطلع بره ويتمردغ فى الواطه دى عو جمعه جينارو * الكورة ماشه على جمعه * ساكنها أتير ومهاجم مازيمبى * جمعه خايف من اتير اكتر من مهاجم مازيمبى * اتير قال ليهو اطلع بره يا جمعه * جمعه طلع بره خط طمنتاشر * وأتدردق فى واطات الله الفى الكنغو دى * فى مشهد يدعو للشفقة ويبكى العيون * ايها الناس * التحيه الخالصه للأخوة فى دولة جنوب السودان على وجه العموم * وللأخوة فى اطلع بره على وجه الخصوص * المهم * بمناسبة اتير دى * أسمه اتير توماس * مره رجعه لى ساكواها ساكواها كتلهم بيها * ومرات جابه براهو * ومرة تراورى عكسها * اتير دخلها * اتير توماس * انا ما بعرف لغة اهلنا الدينكا ولا لهحة خيلانى النوير ولا لغة نسابتى الزاندى ولا لغة اخوانى الشلك * اسى الشلك والسلك فرقها شنو * ياها التلاتة نقاط دى * التلاتة نقاط الفقدها الهلال فى الكنغو فى اسبوعين مرتين دى * انا ذاتى لو عملت لى نقط فى جبهتى زى الشلك * ببقى بابكر شلك * اخوانى ونور عيونى * المهم انا ما بعرف لغات أخواتنا الجنوبيين * لكن اتير ده بى كرمو ده بكون اسمه معناهو ليهو علاقة بالكرم * اتير توماس * تكون زى عبدالكريم كده * أقول ليكم * جنسوهوا وعربوهوا بيبقى عبدالكريم * أيها الناس * نقابل فيتالو * فيتالو دى بتذكركم شنو؟ * دققوا شويه؟؟ *دحين ما بتشبه فيتا؟؟؟؟ * يبقى لازم ننتقم للشقيق ابوالهل * بس ابوالهل ينستر وم ايتغلب من الزمالك هنا ويحرجنا مع الأجانب * المهم * قالوا الجماعة قالوا دايرين يسرحوا الكبار * غايتو نحن حاجزين خليفه * لازم يا ريس تجيب لينا خليفه * خليفه ده لاعب فلته * فى كاس العالم ما شفنا لاعب زى خليفة * والله العظيم مافى * ده لاعب فريد * لازم يا ريس تجيبوا لينا * ايها الناس * ان تنصروا اله ينصركم *أها * نجى لى شمارات والى الخرتوم * أكان شفت يا والينا * مشيت مع صاحبى جوازات المغتربين * الزحمة الفيها ما لقيتها لما مشيت جوازات الما مغتربين * مالنا يا والينا بقينا بره اكتر من جوه!!! * مالنا يا والينا نسينا الوطن والخوة! * مالهم يا والينا المرقوا ساعين يمرقوا الجوه! * مالها يا والينا مواهينا ما بتجيب سلطة بى دكوة! * مالكم يا والينا قاعدين فوق رغوة * وما جايبين خبر التحت الشايلاهم غفوة سلك كهربا * ننساك كيف والمسافة كبيرة بين الناس الرغوة وناس الغفوة الفقدوا الدكوة والللللللللللللى لقاء سلللللللللللللللللللك في السلك - بابكر سلك
