أيها الناس مستوانا الكروي لا يختلف عليه اثنان بشتنة وعدم عرفة قبلنا وحدنا البدوا بعدنا فاتونا بل وصلوا الى مستويات جعلتنا فراجة وبرضو نفخر باننا اسسنا الاتحاد الافريقي لكرة القدم زي الزول البنى بيت وما بصينو بعد سنين ومن الاهمال البيت بقى اقبح بيت في الحي واتهدم واتهردم على رأس صاحبه يا كافي البلا لا طورنا بناء ذلك البيت ولا حافظنا عليه حبة زبالة من غير سقالة كان حافظت لينا على ذلك البيت والقصة ما قصة سقالة القصة قصة ثقالة ناس مصرين يديروا لينا امورنا وهم فاشلين ومكنكنشين في كراسي لا يستحقونها أبداً فمشكلة البلد دي الاساسية انو الزول القاعد في الكرسي ماهو الزول المناسب للكرسي عشان كده بنفقد التلاتة الكرسي والزول القاعد في الكرسي والزول المفروض يقعد في الكرسي ونقعد ساي نقعد في واطات الله دي فوق الدايمة طواااالي ماشين لي ورا واذكر مللوج يوضح اننا ماشين لي ورا تقول كلماته لا لا لا حاربوا عرس المسخرة ام العروس دايرة فلوس بتبني كبري في نهر عطبرة الناس بتمشي لي قدام ونحنا راجعين لي ورا عشان كده بنقول لا لا لا حاربوا كورة المسخرة ما داير ادخل كورة عطبرة الناس بتمشي لي قدام ونحنا راجعين لي ورا أيها الناس الكورة يا ناس علم وفهم وتخطيط وميزانية واستراتيجيات فاذا كان من يديرها لا يعرف ذلك يبقى كرسينا يسلمنا ليهو وعجاج كرعينو وعناصر صناعة الكرة في اي دولة هي ادارة واعية بالتكليف وفاهمة وتعرف كيف تخطط وتنفذ وتنسق مدربين مؤهلين الى درجة كبيرة فكورسات المناسبات وعلوق الشدة دي ما بتخرج مدرب مؤهل فالتدريب هو علم يشمل بالاضافة لفنيات الكرة يشمل النواحي النفسية والعلم بها والنواحي المتعلقة باللياقة البدنية وغيرها من الامور التي تجعل من المدرب مديراً فعلياً للعمل الذي يقوم به اما اهم العناصر فهو التحكيم ونحنا بي حكامنا ديل الله اعلم نمشي لي قدام اذا اعرنا حكامنا للدوري الاسباني موسم صدقوني الدوري الاسباني بي درداقة ما بنقلوهوا لان ابجديات التحكيم التي يعرفها اي زول بتفرج في دافوري نتفاجأ بان حكامنا ما بعرفوها واذا بعرفوها وبصهينوا يبقى اخير يكونوا ما بعرفوها لذا تأهيل الحكام يجب ان يكون من اساسيات العمل الاداري لنهضة الكرة وتأهيل المدربين بالمناسبة زمان لما السعودية بدت الكورة تلقى الفريق الكبير مدربو سوداني او مصري عشان نحنا سابقنهم في الحتة دي لكن الاشبال عندهم كانوا بجيبوا ليهم تلي سانتانا مثلاً ولما صعدوا الاشبال صعدوا معاهم التدريب الفاهم والمتعلم ما خسروا في الكبار لانو البتعلمها كبير ما بوديهم لي قدام لكن خسروا في الصغار تدريب صاح في عمر صغير وبدت انطلاقة الكرة السعودية لعبوا كاس العالم ونحنا لسه ماسكين في اسسنا القصة دايرة وقفة بامانة أيها الناس إن تنصروا الله ينصركم أها نجي لي شمارات والي الخرتوم والينا شمارك شنو لينا السمسار قبض حقو واتقفل ملف القصة الحزينة ولا الحكاية هايجة لسه والمحكمة تفصل لينا ؟؟؟؟؟ حقو يا والينا البايع برضو يشارك معانا، ومن القبضو يدفع لينا ولما المشتري يدفع بسيط على الدفعو البايع بتبقى حسبة سمينة وندخل طلاقات نقبل السمسار ويا دار ما دخلك شر ونقفل بابنا علينا سلك كهربا ننساك كيف وقال مندوب سامي قال ... سامي عزالدين والللللللللللللى لقاء سلللللللللللللللللللك في السلك - بابكر سلك صحيفة الإنتباهة
