(9) (جمال سالم – باسكال – على جعفر – ضفر) بتختوا (نفسيكو) في مواقف بااائخه طلعوا نظارة (القراية) – وألبسوا نظارة (الفهم) عشان في حتة صعبة شوية في الحتة دي يلاقيك يوم (11) – عشان يشفقك يقول ليك : (والله الشهر دا طويل طول) بدون مناسبة يقول ليك الكلام دا بكري المدينة (ولدنا) دا ذاتو جاب ليك قون في جمال سالم – جدع ليك كل (جنسية) في بلد ناس المريخ ديل براهم بتشوبروا. في زول حصل عمل ليه (عصير) ليمون – وقبل ما يشرب العصير – (ادفق). احساس مشين. جربوا معاي الاحساس دا – عشان تعرفو موقف المريخ من مباراة اليوم. نحن فصاحتنا اصلو ما بنخليها – ثقتنا في الهلال ما بتحدها حدود. بندفق (ثقة) لي بي غادي. محمد وردي من كلمات محمد علي ابوقطاطي غني في المرسال (براي سويتها في نفسي قلبي الحب ما راعه). من التاريخ داك وانا بفتش عن العلاقة بين ما قاله ابوقطاطي وما سيحدث ان شاءالله في المريخ اليوم. افتح ليك شباك واقعد – الموضوع دا ح يطول شوية. وانتوا براكم يا ناس المريخ بتسوه في نفسكم – وبعدين الموضوع ببقى ليكم صعب. البطلعكم منو ما بتعرفو. القال ليكم فاوضوا بكري المدينة منو؟. القال ليكم فاوضوا بشه منو؟. بتختوا (نفسيكو) في مواقف بائخة. متخيلني ح اقول ليكم (بامية مفروكة) – وشنو كدا (طحنية) – وما عارف شنو؟. ولا ح اجيب سيرة للكلام دا. قبل ما نجي للموضوع دا – عندنا كلام تاني. طلعوا نظارة (القراية) – وألبسوا نظارة (الفهم). عشان في حتة صعبة شوية في الحتة دي. اول حاجة ح نحسمها في مباراة اليوم – ح نفتح ملف (النتف) سلك عربة التلفزة منو؟. ح نفتح الموضوع دا – ونحقق فيه من الدقيقة التالتة للمباراة. بشه بحب (النتف) دا. ح نخليه في المباراة دي يشوف لينا حكاية (النتف) دا وصل وين؟. بمناسبة (النتف)...قالوا ليك في واحد عندو خالو (نتاف). جاء في الدنيا دي بس عشان (ينتف). زول (نتاف) – طبعو كدا...ما تزعلوا. نخرتو من (النتف) بقت زي باقي شاي اللبن في الكباية. البقابلو كلو (بنتفو) ليك...يقعد يحكي ليك (قصة حياتو) لمن يلتقى في جدو الخامس عشر ب (عبدالرحمن النجومي). يطلع ليك عبدالرحمن النجومي (جدو) – وهو ما عندو اي علاقة بالبطل عبدالرحمن النجومي. علاقتو بالنجومي زي علاقة (الحرجل) بالكاستر- ما في اي رابط. في ناس عندهم فتمينات زايدة في حكاية قصة الحياة دي. الواحد من تجيب ليه السيرة – يقعد يحكي ليك في قصة حياتو. والقصة في حد ذاتها ما فيها اي معنى او فحوى. لكن اي زول وقت يحكي ليك قصة حياتو – بطلع نفسو (بطل). اصلو ما غلطان. وخالو داك كان زول (نتاف) بس. شغلتو كدا. يلاقيك يوم (11) – عشان يشفقك يقول ليك : (والله الشهر دا طويل طول). بدون مناسبة يقول ليك الكلام دا. أها دا ما (نتف). تجيب ليك (كرسي) وتقعد قدام عشان تحضر المسلسل يقوم يقول ليك ( هسع الكهربة تقطع). الكهربة لو ما عاوزة تقطع – بتقوم تقطع. اصلو في السودان الحاجات بتمشي كدا. الليلة يا متوكل احمد علي ح نجيبك ونجيب العربية والسلك ونشوف (النتف) دا حصل كيف؟. ونتفو ذاتو كان ليه؟. وبتنتف انت من الاساس ليه؟. واصل (النتف) في اللغة الصينية. واصلها في الروسية. الروس ديل جنهم وجن النتف. هي البلد ناقصة (نتف) – عشان تقعد تنتف لينا (السلك). هي ناقصة. بشه قال جيبوا لي (النتف) دا وابعدوا لي بعيد. انتوا بتختوا نفسكم في مواقف بائخة – وبعدين ما بتعرفوا تتخارجو. اصلو الليلة ما بنفوت حاجة. ح نبدأ ليكم المباراة من موضوع (النتف). نتفة – نتفة الليل نعدو. بعد موضوع (النتف) ح نجيب بكري المدينة واكرم الهادي سليم ومزمل ابوالقاسم. انتوا موش قلتوا بكري المدينة دا (ولدكم). بتتكلموا ساي. ورونا الزول دا ولدكم كيف؟. جيبوا لينا ورقة وقلم – واقعدوا احسبوا لينا الموضوع. اصلو نحن ما بنخلي حاجة. تصوروا في ولد الناس – وتوزعوا في الصور. فرحانين بالصور. الواحد فيهم يتصور ليك مع لاعب من الهلال ويقول ليك (ولدنا). خلوا اولادهم ناس علي جعفر وضفر وقبلوا على اولاد الهلال. عندهم عقدة في الحتة دي. ما قادرين يستوعبوا الفرق. اها الليلة بكري المدينة ح يحسم ليكم الموضوع دا. ح تشوفوا براكم بكري المدينة دا بعمل شنو؟. ما بتقدروا على الموضوع. بكري المدينة دا قالوا ليه بالغلط ناس الزمالك قالوا بكري المدينة (ولدنا). بكري المدينة قال اصلو ما بصدق. قلنا ليه : قالوا كدا يا بكري المدينة كمان عاوز تغالط. بكري المدينة قال جيبوا لي (الزمالك). جبنا ليه الزمالك في الخرطوم. بكري المدينة دور ليك (لفح) في الزمالك لمن فهموا حاجة. ناس الزمالك ديل بكري المدينة جاري بيهم من (القلابات) لمن وصل بيهم استاد الخرطوم – جاب قونو ورجع. عارفين دا كلو ليه؟. عشان بس قلنا لي بكري المدينة – ناس الزمالك قالوا بكري ولدهم. بكري المدينة ممكن يسامح في اي حاجة. إلا حكاية (ولدنا) دا. انتوا عارفين بكري المدينة جاب (قون) في المنتخب النيجيري كيف؟. ما عارفين. لو كنتوا عارفين ما بتختوا نفسكم في الموقف البائخ دا. بكري المدينة دا – قالوا في ناس سربوا ليه معلومة. في ناس قالوا لي بكري المدينة ناس نيجيريا قالوا بكري المدينة (ولدنا). بكري المدينة قال قالوا كدا. قلنا ليه : ايوا. قال جيبوا لي المنتخب النيجيري دا وابعدوا لي بعيد. دردقنا ليك المنتخب النيجيري في استاد الخرطوم – وفكينا ليك فيهم (بكري المدينة). انتوا قايلين المنتخب النيجيري بنجوم الدوريات الاوروبية فهموا حاجة؟. بكري جاب ليك قون في المنتخب النيجيري – ناس نيجيريا الى الان (فارشين) وعاملين المشكلة من (الايبولا). والمشكلة هي من هدف بكري المدينة. انتوا يا ناس المريخ بتجوا تكرروا نفس اخطاء الزمالك ونيجيريا. بتكرروا نفس الاخطاء. وبقولوا بكري المدينة (ولدنا). انتوا جنيتوا....بكري المدينة دا مع فورتو دي في زول بقول ليه (ولدنا). الغريبة ان بكري المدينة حصل قدم ليهم انذار. لكن ما بسمعوا الكلام. بكري المدينة (ولدنا) دا ذاتو جاب ليك قون في جمال سالم – جدع ليك كل (جنسية) في بلد. الجنسية اليمنية في حتة – واليوغندية في حتة. عشان تقولوا (ولدنا). بتختوا نفسكم في مواقف بائخة. الليلة استحملوا البحصل عليكم. .... ملحوظة : اخراج وسيناريو وحوار بشه وبكري. هوامش اشرف الكاردينال حقق خبطة كبرى وهو يقوم باعادة قيد بكري المدينة ومحمد أحمد بشه وعبداللطيف بويا. هذا انجاز يحسب للكاردينال. كما يحسب له اختيار التوقيت المناسب لحسم ملف بكري وبشه وبويا. كدا الكاردينال ماشه مية المية. شغلك ونضيف – وما في اي كلام والله. سوف نعود لنتحدث عن هذا الانجاز العظيم الذي اسعد كل الهلالاب. ناس المريخ قنعوا من تراوري ووانغا ..قاموا قالوا نشوف شكوى الخرطوم الوطني. للاسف الشديد – كما قال نائب رئيس نادي الهلال ورئيس نادي الامل ورئيس نادي النيل مع حسن فاروق في اذاعة هلا 96 عبر برنامجه الرياضي اليومي (زمن اضافي) ان هذا الموسم – هو الاسوأ على الاطلاق...موسم للتواطؤ. تواطؤ على اعلى مستويات. تواطؤ في الملعب وتواطؤ بالشكاوي. تواطؤ ملاعب وتواطؤ مكاتب. والسبب الرئيس في ذلك هو اتحاد كورة القدم – الذي يدعم (التواطؤ) بشكل مخجل. فضائح حصلت في الدوري هذا العام. يجب التحقيق في هذا الموسم وإلغاء كل النتائج التى حامت حولها شبهات التواطؤ. اذا لم يكن هنالك عقاب – الموسم القادم الدوري الممتاز سوف يفتح مكاتب البيع فيه من الاسبوع الاول. مجلس ادارة نادي الاهلي الخرطوم لو بحترم نفسو يقدم استقالتو طوالي. وكذلك مجلس ادارة نادي الاهلي شندي. الحكاية واضحة وباينة زي الشمس. المشكلة ان التواطؤ هذا الموسم حدث حتى في الدوري التأهيلي. وبرعاية عليا من اتحاد الكورة. ألحقنا يا شداد. شوفوا الدكتور كمال شداد وين ورجعوه سريع. الموضوع ما بستحمل. الكورة عاوز تبوظ. الفساد دخل حتى كورة القدم. والسبب الرعاية التى تأتي من بعض المؤسسات الوطنية الكبري لبعض الاندية. والدعم الذي تجده بعض الاندية من بعض الولاة ايضا (كارثة) اخرى. هذه الملفات يجب ان تفتح. ويجب ان يستمر النقاش والبحث. سوف نعود لاحقا. خلونا الليلة في مباراة الهلال والمريخ. والله يستر على الهلال من (الحكام). هذا الموسم كارثي في كل الاشياء. نسأل الله ان ينتصر الهلال اليوم ..وان يرضي جماهيره في الاداء والنتيجة. ركزوا في نتيجة المباراة. والاداء الجميل في الهلال طبع. شوفوا (النتيجة). المدرب البليجكي ساعدوه بالاتفاق حوله. الآراء السلبية فيه اتركوها الآن. لا يعقل ان نهاجم اي مدرب يأتي للهلال ونخلق حالة من الغضب على المدرب. طيرنا النابي. وطيرنا كاموبس. وعاوزين نطير البلجيكي حتى قبل ان يبدأ. اعطوه الفرصة كاملة – من غير ان نصدر عنه حكم مسبق. والجماهير انطباعية تحكم على المدرب من خلال ما يكتب. امنحوه الفرصة كاملة. .... عاجل : الكاردينال واضح عليه – ناوي على كأس العالم للاندية – البعمل فيه دا شغل (كأس عالم) عديل كدا. وإن طال السفر - محمد عبد الماجد صحيفة قوون
