سمعنا بي كذبة ابريل برغم انو مطلع ابريل ليس مبرراً للكذب جاتنا كمان كذبات نوفمبر الكذب في فترة التنقلات كتير كترة قدر الشباب امام السفارات بالكوم والردوم ورسولنا الكريم عليه افضل الصلاة والتسليم قال في معني الحديث المؤمن بعمل اي حاجه الا الكذب ايكذب المؤمن يا رسول الله؟؟؟ قال لالالالالالالا المهم ابريل كضبتو واحده لكن نوفمبر كضاب كضب الشهر كلو كضب اسي البرازيلي وينو ؟؟؟؟ في السفارة ولا في العمارة ولا في السفارة الفي العمارة ؟؟؟؟ خليهو البرازيلي الاستغناء عن عمر بخيت ومهند والمعز لأن الاستراتيجية الجديدة الاعتماد على صغار السن ومهند يصرح في لقائه الصحفي بأن عماد اتصل به ليجدد العقد معه وهو الذي رفض. وتاني يوم صدر القرار بعدم التجديد لمهند. وجمعة من ابيي دي نوفمبر ذاتو مافكر فيها والجوهرة الزرقاء كضبة السنه كلها دي كضبه شهر ما بشيلها براهو الا سنة كاملة ده بهناك تعال شوف بي جاي الغيني يصل الفلبيني يتصل العاجي يناجي الفلبيني غادر القروب الجابوني قال ما قابلت الجابوني ورجع التايواني احتمال يرجع تاني تسويق الاناني الاناني يرجع تاني الاناني يعرض فكرة الرحيل الفلاني يتفق مع الاناني الاناني يقوم فوق ويبقي سنة تاني احتمال عودة الالماني نوفمبر يا عمك ايها الناس ورد من الرشيد ان نجماً كبيراً يستعين بالدجل للعودة لناديه السابق وضحها يا روشا السابق ولا الاسبق !!!!! وبعدين حكاية الفلس يضرب مريخ جمال دي نوفمبريه يا روشا وقصة مهاجم جنوي الايطالي ده حقيقية ولا نوفمبرية يا روشا ؟؟؟ تسليم اللاعبين الذين تم الاستغناء عنهم استحقاقاتهم قبل تلاتين نوفمبر اللهم اجعلها آخر النوفمبريات ايها الناس ان كانت الاندية في العالم تدير ملفات الاحلال والابدال كما نديرها نحن في سودان العزة صدقوني العالم كلو زول بشيل كأس مافي كأس العالم احسن زول يطلع التاني كأس اوروبا للاندية حدو دور الاربعة كأس آسيا زول يشمو مافي خليجي ده كان قطر ما شالتو كان شالو الحكم ومشى ملفاتنا نديرها بطريقة تشبه شراء الخرفان ما محددين دايرين شنو ولا منو ولا عارفين قروشنا كم دايرين نعزل البهيمة ونتفق حتى بعد داك نكوس لينا دين نمشي الزريبة نجس ده ونجس ده ونجس ده نخلي ده قروشو كتيرة اتنين مليون ليه؟ العربي ده جنَّ وداك قرج بحتاج فحم هو وينو الفهم اقصد وينو الفحم وده ما بخت لحم ولما نتضايق والعيد يكبس نخم لينا حمل بأردب قروش نعزلو عزل ليل دفن الليل اب كراعا بره ونجي نتورط بيهو لا بضحي لينا ولا عندنا طريقة نجيب غيرو نتبالي بيهو كده بس الله يكون في عوننا الانتقالات عندنا عنتريات ونتمها نوفمبريات ونتخارج بدري من كل البطولات اللهم حلنا يا رب ايها الناس ان تنصروا الله ينصركم أها نجي لي شمارات والي الخرتوم كان شفت يا والينا تاني قصص لحم الحمير رجعت لينا أمس في الواتس رسلوا لينا منتجات حميرية كانت في طريقها لتسوق الينا شي بريقر وشي مارتديلا يا والينا بالله الحمار بعرف مارتديلا يا والينا ؟؟؟ وشي كفتة جاهزة تتحمر لينا وسجوك شدة ما احمر بحمر لينا ومن لحم الحمير اظننا اتملينا بس الخوف يا والينا هوت دوق ضنب الحمار يكون في حشا لينا وضنب الحمار طويييييل يا والينا كان عملوهو هوت دوق كلنا بكفينا هوت دوق ضنب الحمار ده البودينا سلك كهربا ننساك كيف وهوت دوق ضنب الحمار ميتة وخراب ديار. والللللللللللللى لقاء سلللللللللللللللللللك في السلك - بابكر سلك صحيفة الإنتباهة
