مرة اشترينا لينا (خروف)..لقينا لا فيه كبدة – ولا قلب – ولا كلاوي – ولا مرارة…قلنا للزول الاشترينا منو الخروف – انت خروف (آلي) مؤتمر ما عملو وزير الصحة (في السخانة دي) ..تعملو انت يا تراوري. قادر الله..و الله عالم • الدنيا اتغيرت. • اصلو ما عاوزين نتغالط. • ما تغالطوا ساكت. • بثبت ليكم الكلام دا بالورقة والقلم. • زمن كراس (الحساب) مربعات – مربعات..تلقاهو كلو غلط. • الصاحات بتتعد فيه بالعدد. • وكراس (الانجليزي) ..الواحد كان قدر ما يلكزوه بنزل من السطر. • نحن من زمان شفوت. • بنطلع من (النص) ..وبننزل من (السطر). • وكراس (الرسم البياني) … وعلبة الهندسة ما بشتروها ليك لو كسرت رقبتك إلّا لمن تصل سنة سادسة. • كنا بنشوف (علبة الهندسة) متل (كأس العالم). • ولمن تعمل ليك (برجل) في الصف الخامس …ترفع نخرتك – الطلبة المعاك في الفصل في الحلة ما بتسلم عليهم. • كمان شحدة (البرجل) دي اسوأ شحدة في التاريخ. • عشان كدا كنا الواحد من يعمل ليه (برجل) بقطع علاقاته الدبلوماسية كلها. • البرجل زمان كان زي (الجلاكسي) هسع دي. • وكراس (الرسم) …كسر رقبة ترسم …ما في حاجة اسمها ما بتعرف ترسم. • الرسم كان عندنا زي التاريخ – ما بنلعب فيه. • هسع (جنيات) الزمن دا …كراستهم كلها واحد…كراس العربي من كراس الرياضيات ما بتعرفو. • ما في اي اختلاف. • الدنيا اتغيرت. • وبقت صعبة. • زمان تمشي تشتري (خروف الضحية) بيدوك معاهو هدية (عتود). • العتود في ضنب (الخروف). • تتخيلوا في الزمن الصعب دا…هسع لمن تشتري خروف الضحية ..بيدوك ليه ناقص (كراع). • مرة اشترينا لينا (خروف)..لقينا لا فيه كبدة – ولا قلب – ولا كلاوي – ولا مرارة. • قلنا للزول الاشترينا منو الخروف – انت خروف (آلي). • خروف معفش كلو. • رفرف ما فيه. • الزمن اتغير. • والدنيا بقت صعبة. • زمان الدنيا بي خيرها. • بي خيرها – كان (الدافوري) في الحلة بنتهي 9 / 7 او 10 / 6. • كان فيه كترت اقوان. • دي غير الما بعدوها – والبتغالطوا فيها. • والبتجي فوق (الكوم). • هسع تعال شوف (دافوري) الزمن دا – بنتهي بي فد قون. • ومرات بنتهي بي التعادل السلبي. • نشفت. • قطت. • من الله خلقكم ..سمعتوا زمان (دافوري) بنتهي بالتعادل السلبي. • الكلام دا زمان ما كان عندنا. • ولا كنا بنسمح بيه في الحلة. • عشان كدا البلد بقى ما فيها مهاجمين. • وناس (تراوري) لقوا سوقهم في البلد ..بقوا يعملوا في (المؤتمرات الصحفية). • مؤتمر ما عملو وزير الصحة (في السخانة دي) ..تعملو انت يا تراوري. • قادر الله. • و الله عالم. • زمان وقت يكون عندكم عرس – الحنة تدور (21) يوم. • الحنة الصغيرة. • والحنة الكبيرة. • وحنة عاملها الخالة. • وحنة عاملها العمة. • وحنة من الاصحاب. • يا زول (الحنن) دي تدور في الحلة زي (الكوتشينة). • تعال شوف هسع دي. • العريس اول حاجة يلاقيك في السوق ويثبتك ..ويقول ليك : (و الله ما عاملين اي حاجة)…ح اعرس واسوق (المرا) واسافر. • ما بقعد. • الزمن اتغير. • والدنيا بقت صعبة. • ضيقوها شديد. • الله يسألني ..زمان (لوح التلج) الحلة كلها تشرب فيه. • سبعة يوم ما بتكون في حاجة للتلج. • تعال شوف الان …لمن يكون عندكم مناسبة (بوكسي التلج) كل ساعة والتانية يقيف ينزل ليه (15) لوح. • ما عارف الحصل شنو؟. • اتغير (التلج)؟. • وإلّا اتغيروا الناس؟. • زمان الحفلة تبدأ من تمغرب. • الفنان يغني لمن يبقى ضعيف. • ويفقد ليه تلاتة اعضاء من فرقتو. • الطبلة يغيروها اربع مرات. • الفنان يقعد يغني في الحفلة لمن يجيبوا ليك (شاي الصباح) وانت قاعد في حفلتك ..تنوم وتصحى في الكرسي. • وكل فاصل تخش تبشر في العريس وترجع عشان تثبت وجودك ..وتؤكد وقفتك مع العريس. • شوف هسع دي. • الفاصل الاول ..الفنان يعملوا لينا كلو اف ..واحد – اتنين – اف…ثري. • لمن العدة يضبطوها …الساعة حداشر يكون باقى ليها ربع ساعة. • الفنان يغني ليه غنيتين تلاتة ..واول ما يخش في الرابعة يجوا ناس ينزلوا (الساوند)..يقولوا الميعاد دخل. • عربية (هايس) تشيل العدة في لحظة وتتخارج. • انت وقت بتنزلوها في لحظة ..ليه كنتوا بتربطوا فيها في (7) ساعات. • الفنان يشيل ليه (16) مليون ويتخارج. • اسم فنان. • اسم حفلة. • العريس ما بتلحق تبشر فيه. • يمين زمان ..من (الرقيص) لو لابس ليك قميص ابيض يبقى (بُني). • اسبوع بتكون فتران وعندك فلايت من (الرقيص). • الدنيا اتغيرت. • واي حاجة بقت صعبة. • الحاصل شنو ما عارف؟. • عشان كدا مفروض تحصل (تحديثات) في معلومات الزول وفي الحكم والامثال والشغل النظري. • زمان كانوا بقولوا لينا السمك مع اللبن بعمل تسمم طوالي. • وكانوا بقولوا لينا الطحنية مع الشطة بتجيب (الحمى). • كنا بنعمل الخلطة دي لمن يكون عندنا (اختبار) في المدرسة. • هسع الموازين اختلفت. • الامور اختلطت شوية. • حسب البيئة والتكنلوجيا دي ..افتكر الواتساب بعمل (تسمم) مع السواقة. • لاحظت كتير من السواقين ..بدخلوا في (العمود) او بقعوا في الخور ..او بنزلوا من الكوبري في البحر ..وقت الواحد يكون سائق وشغال بالواتساب. • حادث اكيد. • التسمم اختلف هسع دي…ممكن نسمى الحادث البكون سببه (الواتساب) حادث (تسممي). • انتوا ما لاحظتوا ناس حركة المرور بقوا زي (الدكاترة)..الحِكم والمعلومات الشغالين بها (دكاترة) ما بيشتغلوا بيها. • يقولوا ليك ما تستعجل اولادك في انتظارك. • الموت اسرع. • ويقولوا ليك ما تستعمل الهواتف (السيارة) وانت في (السيارة) عشان سيارة مع سيارة حادث اكيد. • شفتوا العلم دا كيف؟. • الدنيا اتغيرت. • في حاجات جديدة حصلت. • في علوم حديثة. • زمان رمضان دا وقت يجي تشم ريحة (الحلومر) قبل اربعة شهور. • اي شارع تمشي فيه تشم ريحة (الابري). • هسع رمضان لمن يصل للتلت الاخير ما بتشم ليك ريحة (حلومر). • ما عارف الحصل شنو؟. • اتغيروا الناس. • وإلّا اتغير (الحلومر). • الخريف ذاتو بقى يجي (فجأة). • بدون مقدمات. • لا هبوب. • لا برق. • لا رعد. • فجأة كدا تلقى ليك شوارع الخرطوم غرقانة. • تقول ليهم يا جماعة الحاصل شنو؟. • يقولوا ليك الخريف بقى يجي (بدري). • رغم انو في كل سنة بجي في شهر يوليو. • انا ما عارف (بدري) دي بقصدوا بيها شنو؟. • الدنيا اتغيرت. • والمناخ اختلف. • والفصول تداخلت. • زمان كانوا لمن يقولوا ليك في حادث حركة حصل في شارع مدني كانوا بقولوا ليك ماتت (مرا) واحدة …والمصابون اتنين. • هسع وقت يقولوا ليك حصل حادث حركة بقولوا ليك ماتوا في الحادث (21) راجل والمصابة (مرا) واحدة بس. • اشمعنا. • الدنيا اتغيرت. • والحوادث ذاتها اتغيرت. • ……….. • ملحوظة : الكهربة مالها الايامات دي؟. هوامش • المنتخب وسيرليون. • مازدا ما خلي لينا شيء نقولها. • مع ذلك ..المنتخب قادر على الانتصار ان شاء الله اليوم. • الرهان على جاهزية لاعبي الهلال. • معسكر تونس ..سوف يكون جهز لاعبي الهلال بصورة نموذجية. • الحمدلله المباراة الليلة ما عاوزة ليها لفت طبق. • لا بنلف طبق ولا حاجة. • افضل (التشفير) من لفة الطبق. • مساوي جاهز للتسجيل اليوم. • وبشه موجود. • اصلو ما في مشكلة. • وفي حضرة الجماهير ما في خوف على المنتخب. • وان كانت المدرجات في مباريات المنتخب بتكون شغالة بالواتساب اكتر من الكورة. • خلوا الواتساب يا جماعة. • ركزوا في كورتكم. • عطلوا الواتساب (90) دقيقة. • اطلعوا من الخدمة. • ان شاء الله اول تلات نقاط سوف يضعها المنتخب في رصيده. • بنقول كدا ..رغم انف مازدا. • اوعك (التلاتة) تفهمها لينا غلط يا مازدا. • قلنا تلات نقاط – ما تلاتة اقوان. • جميل ان مدرب المنتخب الاولمبي الديبة ضم للمنتخب الاولمبي عمر الكسمبر وعبد الله بابو من شباب الهلال. • الله يستر الليلة من المطر. • ناس الارصاد ليهم اسبوع بتكلموا ساي. • كلامهم الساي دا ما بصدق إلّا مع المباراة. • مازدا لو جاتو (مطرة)…بلقى ليه عذر جاهز. • عدم اعداد ..ومعاهو مطرة كمان. • الله ينصر المنتخب. • عاوزين نصل النهائيات. • افتقد الهلال والمنتخب اللاعب القوي ..والحماسي عبداللطيف بويا. • في انتظار عودة بويا. • عشان ينعش الطرف الشمال في الهلال وفي المنتخب كمان. • …………. • عاجل : في جماعة كدا محتاجين يعملوا دورة تدريبية في اعلام (المجموعات) قبل ما تبدأ المجموعات.
