مفروض لوائح الاتحاد العام تغيروها …وتضعوا مادة جديدة تقولوا (وصيف) الممتاز هو الذي يمنح كاس المنافسة السنة دي ما تقولوا (بطل الممتاز) – قولوا بطل (لجنة الاستئنافات) ونحن بنفهم الباقى انتوا عارفين لو ناس علي جعفر ديل ما لحقوهم بي صحن زلابية النتيجة كانت وصلت الخمسة المهم شوفوا لي (بونية) – ناس اسامة عطا المنان ..لو جبتوا ليهم (بونية) في فيلم هندي بطلعوكم من الخسارة دي يا ربي (المناقل) امس فيها (مطر). علي جعفر والريح علي (الزهور والورد) جابوهم ليك في (اخر ظهور) – زي الناس البجيبوهم شايلين (صواني السماية). زي الناس البشيلوا (صواني الخبيز). او البمسكوا (الكشف). تقول بفتشوا ليهم في (رصيد). تقول جايبين ليهم خبر بكا. الناس ديل بيلعبوا في عام 2015 بي كورة 1810. كورة قديمة شديد. عليكم الله ديل يستاهلوا يشيلوا ليهم (بطولة). ديل مفروض طوالي يودوهم يشتغلوا ليهم في (كمينة طوب). الريح علي وعلي جعفر تقول جايبنهم من (دار فلاح) ..كورتهم (شعبية) خالص. منتهى (البلدية). الناس ديل شغالين في (البلدية). في الصحة. في دحر الملاريا. النفس ينزل من علي جعفر ويطلع من الريح علي. ينضرب الريح علي …يتحرق علي جعفر. الزهور والورد الله يديهم العافية ممتعننا ب (كلماتشي) بتاعتهم دي. المريخ دا فريق (ممتع). غايتو نحن الهلالاب قاعدين نتمتع بيه. بيسعدونا الجماعة ديل. بفرحونا. بضحكونا. المناقل امس فيها شنو؟. فيها لاعب ضرب ليه حكم (بونية) قبل اربع سنوات. في القضارف او كسلا ما مشكلة. الدمازين. الكدرو…اي (بونية) في اي حتة ما مشكلة. المهم شوفوا لي (بونية) – ناس اسامة عطا المنان ..لو جبتوا ليهم (بونية) في (فيلم هندي) بطلعوكم من الخسارة دي. المناقل امس فيها شنو؟. فيها لاعب اتسجل بورقة طالعة من محلية (ابيي). الاكيد …والشيء الذي لا شك فيه – هو ان المناقل امس ما فيها (زلابية). ولا حبة. فيها ازمة (زلابية) حادة. لو فيها (لقيمات) – الموضوع ما بصل (التلاتة). يضربوكم (تلاتة) بعد (زلابيتكم) دي. بمنحوكم (الكاس) قبل البطولة ما تبدأ. وبجيبوا ليكم (لجنة استئنافات) شغالة معاكم هدايا واعادات. انتوا عارفين وقت الشوط الاول انتهى والمريخ مغلوب صفر/ 1 مزمل ابوالقاسم لقيتو في شارع 15 بفتش في (الزلابية). وقت النتيجة وصلت تلاتة …(بابكر سلك) كان واقف في الشارع بقول ناس علي جعفر ديل ألحقوهم سريع ب (صحن زلابية). فضحتونا فضيحة. فقد (الزلابية) ظهر. اسامة ونسي دا ما بتابع (زلابية). المريخ كانت شايلهو (زلابية) جمال الوالي. انتوا عارفين لو ناس علي جعفر ديل ما لحقوهم بي صحن زلابية النتيجة كانت وصلت الخمسة. في شندي ..قالوا لينا (نمور) المك نمر ديل لا بتقدروا عليهم ولا حاجة..(شندي) دي اعفونا منها. اسماعيل باشا ديل شندي …طلع منها (فحم). شندي ما بنقدر عليها. لجنة الاستئنافات ذاتها ما بتمرقهم من شندي. لجنة الاستئنافات تقول شنو؟. تقول اسماعيل باشا (اتخدع). في (حريقة) بتعيد ليها مباراة. ما عندهم اي طريقة. قلنا شندي صعبة عليهم …ما مشكلة. شندي …القطن الكاميروني ما مرق منها – يمرق المريخ. مشينا عطبرة. عطبرة مسكهم ليك (رزاق) ..ما خلى فيهم شيء. ريحتهم بقت طير – طير. طوالي رجعوا يفتشوا لي عمك (سمير فضل) بتاع لجنة الاستئنافات. قالوا ليه (عمر عثمان) دا حصل قبل كدا ضرب ليه حكم بونية…تعيد لينا المباراة. عمك سمير فضل ..شيء يسمعها وشيء ما يسمعها. وبعد دا بعيد المباراة. قلنا ما مشكلة ..نقاط عطبرة دي يجيبها ليكم (سمير فضل). اصلو ما قضية. انتوا عارفين الكلام دا ما يطلع من العمود دا – ناس المريخ قالوا وقت مشوا عطبرة للاعادة …رجعوا من هناك خسرانين. خسرانين كرامتهم ..وسفرهم لي عطبرة في (البرد) دا. مشينا كادوقلي. كادوقلي …اتعادلوا. قالوا (نونغ) دا ..ما سوداني. الاستئنافات قالت ليهم اصلو ما عندكم مشكلة – ما سوداني ما سوداني. غايتو جنس محن. المريخاب ديل الاجنبي في 15 ساعة يبقوه (سوداني) يطلعوا ليه (جنسية) في (5) دقائق. والسوداني ..المولود في (ابيي) يقولوا ليك دا ما (سوداني). طيب انتوا الحضري دا مواليد (الباوقة)؟. جمال سالم دا …جبتوه من (ام بدة)؟. شندي عرفناها. عطبرة عرفناها. كادوقلي عرفناها. كمان حصلت (المناقل). انتوا عارفين (المناقل) بتبعد كم كيلو من الخرطوم؟. بتستغربوا ليه ؟..اذا كان جماعتكم ديل في استادهم اتغلبوا امام (مريخ الفاشر). طلعوا ليهم (الشرطة). ومنحوهم (ضربة جزاء). وطردوا ليهم لاعب من مريخ الفاشر. تتخيلوا بعد الكلام دا كلو المريخ طلع مغلوب صفر / 1. الحاجات دي لو شيلتوها ومشيتوا بيها على (لجنة الاستئنافات) بتعيد ليكم المباراة. قطع شك. مباراة ما فيها (شرطة) مباراة ما قانونية. الموضوع يا ريت لو وقف هنا. جماعتكم من هلال الابيض اتغلبوا في استادهم – تقولوا لي (المناقل). (5) هزائم غير التعادلات …والهلال ولا خسارة في الدوري الممتاز – مع ذلك لجنة الاستئنافات منحت المريخ (الممتاز). عليكم الله دي قابلتكم كدا. مفروض لوائح الاتحاد العام تغيروها …وتطعوا مادة جديدة تقولوا (وصيف) الممتاز هو الذي يمنح كاس المنافسة. الوصيف هو (البطل). طلعوا قانون. بطل (لجنة الاستئنافات). السنة دي ما تقولوا (بطل الممتاز) – قولوا بطل (لجنة الاستئنافات) ونحن بنفهم الباقى. الموضوع واضح. واضح ان جمال الوالي عاوز يحرج المريخاب. جمال الوالي (قطعهم) ليكم في حتة ..تسجيلات ..ونهاية موسم ..ومعسكرات. والجماعة قرش ما عندهم. انتوا عارفين ..يا مريخاب ..اصلو ما تلوموا لجنة التسيير. لوموا جمال الوالي الذي وضعكم في هذه الحتة. جمال الوالي عود ليك ناس اسامة عطا المنان على (الزلابية) وعود ليك ناس بكري المدينة على (ضربات الجزاء). يختاروا حكامهم. ويطلعوا شرطتهم. ويجيبوا لجنة استئنافاتهم. طبيعي جدا بعد ما يفوت جمال الوالي تظهر هذه (الكوارث). جمال الوالي بكون الآن سعيد ..يقول خلى المريخاب يشوفوا فرقي. مرة مشى من المريخ قطعوا (الكهربة) من النادي. وهسع بقوا يسافروا دنقلا بالباصات. يعني عبر الميناء البري. هذه الوضعية ..وضعكم فيها جمال الوالي. اي زول يجي في هذه التوقيت لازم يتصدم بمثل هذه (العقبات). تمرد بين اللاعبين. تذمر في الجهاز الفني. ولعيبة مطلقى السراح. ومباريات في نهاية الموسم. ومرتبات. وحوافز. غايتو يا اسامة ونسي …لو شيلتوا بطولة الممتاز ما عندكم (حافز) للاعبي المريخ. اول هم عملوا شنو؟. الحوافز طوالي تمشي للجنة الاستئنافات. ورطة وضعكم فيها جمال الوالي. مفروض المريخاب يعرفوا ..ان جمال الوالي قصد يوريكم مكانتو. قصد ان يضع لجنة التسيير في هذا الموقف. حتى لاعبي المريخ اثبتوا انهم (اجرة). بيلعبوا فقط بالقروش. قروش موجودة في (نشاط). قروش ما في ..ما في منشطات. معقولة انتماء لاعبي المريخ لجمال الوالي اكتر من المريخ. ديل بيلعبوا لي جمال الوالي ما بيلعبوا للمريخ. بعدين والله هم ليهم حق يظهروا بهذا المستوى ..طالما ..انتوا علمتوهم ان يخسروا ويجيب ليهم الانتصار لجنة الاستئنافات. ليهم حق يلعبوا بدون روح ..وبدون حماس. المريخ بدون جمال الوالي ..ما عندو اي فرق من (النسور). يا ناس المريخ شوفوا ليكم (راعي). ان شاءالله تجيبوا صلاح ادريس. كلموا صلاح ادريس يكمل معاكم فترة التسجيلات دي ورجعوه اهلي شندي. اصلو حالتكم واحدة. شيلوا صلاح ادريس (اعارة). احسن ليكم من لجنة التسيير. ولو جينا للجد ..جمال الوالي مفروض يبقى (راعي) للمريخ. يعني ما معقول يرفع ايدو بالطريقة دي. الزول دا قال متكفل بي امير كمال. وطلع كلام ساكت. وقال متكفل بي كوفي. وطلع كلام ساكت. ولجنة تسيير المريخ ما عارفة تعمل اي شيء. اقول ليكم حاجة شوفوا ليكم صحن زلابية من الميناء البري ..(عندهم زلابية كويسة) مشوا بيها اموركم دي. ……….. ملحوظة : امير كمال سعرو نزل (مليار). هوامش على جعفر والريح علي مفروض يسلموهم خطابات شطبهم في الميناء البري. يشطبوهم في (مناقلهم). غايتو قطع شك المناقل دي (اخر ظهور) ليكم في المريخ. امير كمال ذاتو بعد الحالة دي ما بقعد ليكم تاني. يا زول المريخ دا بدون جمال الوالي ..بنزل الدرجة الاولى من غير (انسحاب). والله لو كان انسحبتو كان احسن ليكم. لجنة التسيير بلة جابر ما قادرة تعيد تسجيله. الزلابية قطعت. وقت ما عندكم قدرة للزلابية – اعملوا ليكم (فطير). فطير ساكت ان شاءالله. منتظرين نشوف (كسكتة) الكاردينال. طولنا من الموضوع دا. عاوزين لينا (فرحة) حايمة. عشان ننتهى ليكم من (الزلابية) دي. لاعب الامل عطبرة حمدي ..مفروض يسجله الهلال عبر التفاوض مع الامل. بس عشان الجماعة ديل يتعلموا ليهم حاجة. النعسان موضوعو وصل وين؟. والله ناس ام بدة والاهلي مدني عرفوها. لو ولاءالدين وابوعاقلة مشوا المريخ في الظروف دي ..كانوا قروش الاهلي مدني وام بدة إلا يحولها ليهم (رصيد). ديل حالتهم صعبة. تلاتة ..وفي نهاية الموسم. انتوا البطولة الافريقية دي كنتوا بتلعبوا فيها كيف؟. كانوا شايلينكم (الحكام). بكري المدينة قالوا بفتش ليه في طريقة يمشي بيها الاهلي شندي. صاحبكم (الفلس) دا ما بنفع معاهو. زولكم ح يبيع الجماعة. اتذكروا كلامي دا. اذا كان اللاعب المحترف بطلب 400 الف دولار في الموسم الواحد اي حوالي 4 مليارات جنيه …يبقى ما كتيرة 3 مليارات على امير كمال في 3 مواسم. يا جماعة احسبوها. والله الموضوع دا ما كعب معاكم. يا الكاردينال ألبس (الكسكتة) لي امير كمال. النعسان (طاقية) كتيرة عليه. ……….. عاجل : شوفوا (الركشة) دي لاقتني امس في مواقع التواصل الاجتماعي.
