الأهلة فرحانين بالكشافات الجديدة محمد عبد الماجد قرب يعمل «دي. جي» الجديد في الكرو حلو والكشافات الحديثه جديده على ناس البرج الشمالي الغربي بتاعهم بولع ويطفي براهو البشوفو بكنتك يقول الاستاد لافي الجديد في الكرو حلو يا حماده والكرو بالنسبه لاولاد ميكي هو دبرة الحمار تحدث محمد عن ان كشافاتهم الجديده مكتوبه بالالماني مواصفاتها وقال عشان كده المريخاب ما عرفوها مالكم ومال الالماني يا حماده الالماني نحنا اسيادو اسأل البايرن وشالكا ودورتموند انتوا الالماني شفتوهوا وين؟ انتوا غير امل عطبره وامل سوسه بتعرفوا شنو يا حماده؟ قلت لي كردنه لما نزل من الطياره في عطبره نزل ساي بدون كاس كاس من طياره الطيب عبد الله ما نزل بيهو ينزل بيهو اب كسكته! الطيب عبد الله شنو كلارك الخواجه المستعمر الكان رئيس نادي الحركه الوطنيه اب عيون خضر وكسكته جد جد ما نزل بي كاس من طياره يا محمد البنزلوا بالكاسات من الطيارات معروفين والبنزلوا بالكسكته ساي من الطياره برضك معروفين الكشافات الجديده وفرحتكم بيها بتذكرني دخلة الكهربا للمسح الاجتماعي لما جاتم الكهربا فرحوا زيكم كده كانوا بقولوا للضيف نديك شربات ولا نولع ليك النور انا جاي ابارك ليكم يا محمد ادوني شربات يا اخوي ايها الناس الطوابق نحنا ناسا والكشافات نور طويل ونور قصير نحنا ساسها وما تنسوا خالتي الصلت الضهر بالليل حاضر الوكت داك اسلام في الروضه اسي اسلام ممتحنه الشهادة يا حماده تقول لي نور! نورنا قبل مهند ونور بي سنين وشهور غايتو الزول لما يكون مستجد نعمه بموت بالصدمه الحضاريه المهم شيبوب يمشي تونس يمشي بقدونس الا يلعب كوتشينه ولا تسجلوهو شيبون بالبون ايها الناس قطاع المراحل يكرم جميع من عمل به خلال الحقب المختلفه جميعهم من جيل ابو الاشبال وحتي جيل بجبج جميعهم الاحياء منهم والاموات مباراه استعراضيه بين اولادنا والمنتخب باستادنا المفخره يوم الخميس المغرب نجي كلنا الاحياء منا والاموات المهم أكرر نحتاج لموظفين مؤهلين ومدير قدرها للمكتب التنفيذي القصه قصة احتراف وعمل منظم وعمل المكتب التنفيذي لا يحتمل الغاء الحجوزات عشوائياً ولا يحتمل عدم تجديد الجوازات ولا يحتمل نسيان كروت الحمى الصفراء عمل المكتب التنفيذي عمل احترافي تنسيقي يدير جميع دواليب ساقية العمل في نادٍ كبير مثل الزعيم ايها الناس ناس محمد فرحانين بالكشافات زي الشفع الجابوا ليهم هدوم العيد ادوها صنه وبطلوا خلعه يا حماده استاد الابيض فيهو اضاءه آخر موديل لكن عين ناس الابيض المليانه ما خلتهم يهضربوا الصباح الصباح بالكشافات ناس محمد بقوا زي محمد ود ناديه اختي جابوا ليهو موبايل جديد بقي يرسل ليك رسالة ويضرب بعدها طوالي يقول ليك وصلتك؟ وصلتنا يا محمد عاد هي جنس خلع!! اسكت بس امال لو جبتوا كاس من بره تعملوا شنو؟ ادونا الشربات ماتولعوا لينا النور اقعدوا مع أمل عطبره وامل سوسه تلقوا المحاوله التمنيه وتمنين انتهت ما جابوا ليكم كاس جوي يا محمد؟ اها نجي لي شمارات والي الخرتوم كان شفت يا والينا السنه انتهت علينا كانت سنه حزينه فقدنا الغاز يا والينا وفقدنا عباس الكان لامينا وافتقدنا الكتير يا والينا اخونا خالد البفرق الهم لينا وآخر يوم فيها يا والينا فقدنا عزيز لدينا دفنا مستشفى الخرطوم العريق يا والينا وانتهى العزاء بانتهاء مراسم الدفن يا والينا سلك كهربا ننساك كيف والكلب قال لينا… خلاص… سبلتوهو!! وإلى لقاء. سلك
