في مباراة الخرطوم الوطني امام المريخ – شفت لي زول حايم في وسط المريخ..قلت (عربية الباسطة) الدخلها شنو وسط المريخ؟. الزول دا منو؟. فرقة اضواء المسرح؟. مجموعة دكان ودالبصير الاذاعية. في زول حايم في الوسط لكن ما عرفتو. الناس ديل فكوا (شيبوب) وجابوا (عربية الباسطة) دي من وين؟. الخازوق (عربية الباسطة) دي يكون (محترف). قدر ما نحت رأسي عشان اعرف (عربية الباسطة) دا منو؟..ما عرفتو. لو بدرالدين بخيت او جمال ابوعنجة او بشرى وهبة بيلعب الى الآن كان سوف يقدم مردود افضل من زولكم المحترف دا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لكن عاوز اعرف الزول دا منو؟…ما عرفتو. سيد البيت؟؟؟. بتاع الفرن؟؟. بتاع الغاز؟؟. لكن بتاع الغاز البجيبو وسط المريخ شنو؟. احسن اشيل الفكرة دي من رأسي…ما معقول كمان المريخ يصل مرحلة (بتاع الغاز). اموت انا واعرف الزول الحايم بلا عدل في وسط المريخ دا منو؟. والله انتوا كتلتو كتلة كبيرة في (شيبوب). الواطة صبحت – طلعت تاني يوم عشان اشوف (عربية الباسطة) دا منو؟. الزول الزي الشريط الفاضي. تقلبو بي جاي تلقاهو فاضي. ترجعو تلقاهو فاضي. تجرو شوية ..برضو ما في حاجة. اها زولكم دا يا ناس المريخ زي (الشريط الفاضي). مشيت عشان اعرف (عربية الباسطة) ..قلت اشوف مزمل ابوالقاسم قال شنو عن الزول الما عرفتو دا. لقيت ليك مزمل كاتب : (فوق ذلك ضاعف مدرب المريخ لوك إيمال معاناة فريقه، عندما أجبره على أن يبدأ المباراة ناقص العدد، بإشراكه للغاني كريم الحسن ..لاعب ثقيل الوزن، عاطل عن الموهبة، ضعيف القدرات، دفع به البلجيكي أساسياً بلا مبرر، فمنح الخرطوم صاحب الوسط القوي أفضلية كاملة على خط المناورة في مطلع المباراة.. استبدال الحسن قبل نهاية الحصة الأولى يشكل اعترافاً ضمنياً من البلجيكي بخطأ إشراكه للغاني المتواضع… نحن لا نعرف سبباً يدعو المريخ للتمسك بأحد أسوأ اللاعبين الأجانب في تاريخ المريخ، ناهيك عن إشراكه في مباراة تجمع الفريق مع أحد أقوى فرق الممتاز… من المحزن حقاً أن نذكر حقيقة أن المريخ سجل هذا الخازوق في خانة الموهوب الإيفواري ديديه ليبري!). دا كريم الحسن. عربية الباسطة لو سمعت الكلام دا بترفع فينا دعوى اشانة سمعة. والشريط الفاضي بقطع نفسو. بتجيه نفسيات. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الطريف في الامر ان مزمل ابوالقاسم …اتجه نحو الاسلوب الكاردينالي …قلنا ليكم الناس ديل اي حاجة يعملها الهلال بطالبو بيها. مزمل ابوالقاسم قال : (نحن لا نعرف سبباً يدعو المريخ للتمسك بأحد أسوأ اللاعبين الأجانب في تاريخ المريخ). يعني شنو؟. يعني اعملوا في (كريم الحسن) نفس الشيء الذي عملو الكاردينال في (ابيكو). الظاهر الكاردينال سوف يبقى صاحب بصمة واسلوب اتجه المريخ الى تقليده. نحن عارفين (الضل)..شغال ب (الفيل). الناس ديل ما عندهم رأي ..الحاجة بعملها الهلال اليوم بطالبوا بيها تاني يوم. مزمل في عموده امس اكد نظرية الضل ..ولم يكتف بالتخلص من كريم الحسن حالا زي الهلال وانما كتب : (اللافتات التي ظهرت في مدرجات المريخ أمس أزعجتنا… المريخ ليس الهلال لترتفع في مدرجاته لافتات تحمل عبارات مزعجة.. جماهير المريخ عودتنا على أن تشجع فريقها في كل الأحوال، ولا تشغل نفسها بالأمور الإدارية). اللافتات لاحقننا فيها. الطريف ان مزمل الذي دعا في نفس العمود للتخلص من كريم الحسن على الطريقة الكاردينالية قال المريخ ليس الهلال. بالله.. انتوا بتحلموا حلم تكونوا زي الهلال. يكفى ان نص تشكيلة المريخ التى لعبت امام الخرطوم الوطني (مشاطيب) للهلال. يعني بقت على (اللافتات). جمهور الهلال لو دخل المباراة بي (قلابات) – تاني يوم ناس المريخ بشوفوا ليهم (قلابات) عشان يدخلوا بيها المباراة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المضحك ان اعلام المريخ يتحدث عن الارهاق في الوقت الذي لعب فيه كريم الحسن حتى الآن (40) دقيقة في اكثر 20 مباراة. والمريخ الذي يتحدث عن الارهاق وعن تعب اللاعبين ..في كشفه لاعب اسمه (عطرون) لم يشارك حتى الآن. في راحة اكتر من كدا. وخالد النعسان. والمعز محجوب. التحكيم عرفناه. المطر عرفناها. سوء ارضية الملعب عرفناها. الارهاق كمان شنو؟. وضغط شنو البتتكلمو عنو ومباريات المريخ المحلية والافريقية في 4 شهور ما بتتجاوز ليها 20 مباراة؟. الجرسة في الكبر شينة. ممكن نقبل جرسة النسور. جرسة مريخ الفاشر. لكن جرسة من المريخ بتبقى شينة في حقو. جرسة بعد العمر دا. الهلال مشى عطبرة في خمسة يوم لعب ليه مباراتين. وجاء راجع ب (6) نقاط. المجموع الكامل. الهلال الحمدلله غلب الامل وغلب الاهلي في عطبرة. 6 نقاط قافلة. عارفين دي زي شنو؟. زي الطالب البقفل الرياضيات والانجليزي. الرياضيات 60 من 60. الانجليزي 60 من 60. انتوا عارفين الهلال فاضل ليه شنو؟. فاضل ليه (الجغرافيا). عارفين الجغرافيا منو؟. الجغرافيا (المريخ). وطالب بقفل الرياضيات والانجليزي اكيد ما بقيف في (الجغرافيا). الجغرافيا دي مع ناس (ثلعبونا) بنحلها في 5 دقائق. نجمع الورقة ونطلع. الكلام الناس العندها امتحان كيمياء يوم الخميس. وعندها فيزياء في كادوقلي. واحياء في شندي. امشوا كملوا امتحاناتكم دي – نحن في انتظار (الجغرافيا). الجغرافيا لي ناس (ثلعبونا) بتعتبر (موية). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الاتحاد العام امس طبعا قام بتأجيل مباراة المريخ امام هلال الابيض الى يوم الخميس. زي كأنو الخميس ما بجي. وقام الاتحاد (المطموس) دا بوضع عبارة (تلعب لاحقا) امام مباريات المريخ امام هلال كادوقلي والاهلي شندي. شغل (جرسة) عديل كدا. هروب لكن بي طريقة ظريفة. الاتحاد العام لو عاوز يطلع من هذا الحرج ..افتكر من الافضل ان يضع مباراة المريخ امام هلال كادوقلي امام (الامير) البحراوي لتلعب في استاد المريخ. انسوا موضوع هلال كادوقلي نهائي. اما مباراة المريخ امام الاهلي شندي فاننا نقترح ان يلعبها المريخ امام (رديفه) عشان نتخلص من الهلع دا. هسع بكرة القى الفكرة دي منفذة في الاتحاد العام. لو نفذتوها عليكم الله يا اسامة عطا المنان احفظوا لينا حقوقنا. احفظوا لينا حقوق الطبع. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………………. و عشان يعملوا الحكاية بي ظرافة ..الاتحاد قام بتأجيل مباراة الهلال امام الخرطوم الوطني. القال ليكم نحن عاوزين تأجيل منو؟. نحن كورتنا بنلعبها ان شاءالله يوم العيد. العقيد حسن محمد صالح – الايامات دي مفروض يكون في جوبا. مفروض كدا. وقفلو كويس في تونس. ……….. السيدة (ل) – الصبر الباقي لينا (مسكول) ما بعملو لينا. وقرّط على كدا.
