في مريخابي لقيتو طالع في كبري النيل الازرق. عاوز يقع. عاوز ينتحر. ظاهر عليه متغدي بي (قرع). القرع بيظهر في (النخرة). المريخابي الحياة مرقت من نفسو. والموية دي بيبلع فيها بلع. زي الدواء. مجبور عليها. قلت ليه يا زول قول باسم الله..مالك ؟…الحاصل عليك شنو؟. الدنيا طارت. ما في حاجة بتخليك تعمل كدا. ما في شيء بتستاهل. الكهربة بتجي – كان على الكهربة. المريخابي قال لي نحن (سادومبا) واحد مجهجهنا كمان تسجلوهم اتنين. واحد معذبنا. واحد منشف ريقنا. ناس سلك سادومبا واحد بخليهم يشطبوا الدفاع كلو. جمال الوالي يمشي ويرجع. ومزمل ابوالقاسم بقى مركز مع الاهلي شندي اكتر من المريخ. اتنين. اتنين يا مفترين. ليه البلد دي ما فيها قانون. ما فيها اتحاد. ما فيها سجلات. ما فيها رقم وطني. اتنين سادومبا. سادومبا واحد ما بنعرف نتصرف معاه كيف ..تسجلوا لينا سادومبا (تربيع). وفي فرد يوم. انتوا يا ناس الهلال جنيتوا؟. سادومبا واحد قاطع نفسنا. انتوا ما بتعرفوا المريخاب ديل فيهم ناس عندهم سكري. وفيهم ناس عندهم ضغط. وفيهم ناس كبيرة في السن وما بتتحمل البيعملوا فيهم سادومبا ..جايبنهم اتنين يا مفترين. اتنين. انتوا ما عندكم رأس؟. المريخاب ديل فيهم ناس من تجيب ليهم سيرة (سا سا) ساكت بقوموا جاريين. كمان تجيبوا ليهم سادومبا اتنين. عليكم الله البلد دي فيها شنو راقد كدا؟ ..عشان تجيبوا ليكم اتنين سادومبا. غايتو الزول وقت يكون عندو قروش كتيرة ..بجيبهم اتنين. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). البلد كهربة ما فيها ..وانتوا يا الهلالاب جايبنهم اتنين. سكر ما في. انتوا جايبنهم اتنين. ديل يثبتوهم كيف؟. الغريبة الاتنين (صلع). يعني تاني ما عاوزين لنا كورة فوق. والله كمان (الصلع) دي لمن تتقابل. ما في زول بقدر يثبتها. صلعة تلاقى صلعة. الهجمة وقت تبدأ من الطاهر سادومبا لي ادوارد سادومبا ..المعلق بقول في (صلعة مرتدة). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ناس ضفر بيستوعبوا لينا الكلام دا كيف؟. الكلام دا ما بقع ليهم. ولا بفهموه. ديل سادومبا واحد ما واقع ليهم. ولا فاهمين فيه شيء. تاني مدرب المريخ وقت يقول لي (ضفر) اقفل (سادومبا)…ضفر بشوف (سادومبا) الاسهل. سادومبا البفهم كلامو. القريب فيهم. ود حلتهم. بقوم يعمل شنو؟. بقوم يقفل (الطاهر سادومبا) والمدرب قاصد ليه منو؟. المدر قاصد ليه (ادوارد سادومبا) – يا جماعة ركزوا معاي شوية. ما بتشابهوا وكدا. ديل يفرقوهم كيف مع (الصلع) ديل. صلعة لبسوها 11. وصلعة لبسوها 24. عشان الصلع تبقى واضحة…وما تحصل اي لخبطة. احسن تشلخوا لينا (صلعة). ظللوا لينا صلعة من الصلع ..عشان الصورة تبقى لينا واضحة. نحن ذاتو خايفين نتلخبط. خايفين نكون عاوزين نصفق لي ادوارد سادومبا ..نلقى نفسنا بنصفق لي الطاهر سادومبا. لو صفقنا لي الطاهر سادومبا نمشي وين عاد؟. نعمل شنو؟. عليكم الله وضحوا لينا (الصلع) ديل. صلعة الطاهر ممكن تركبوا فيها (اريل). صلعة ادوارد بنعرفها برانا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). المشكلة ..الحكم يكون عاوز يمنح الطاهر سادومبا (كرت اصفر) يقوم يعمل شنو؟. يقوم يمنح ادوارد سادومبا الكرت الاصفر. ما بتشابهوا وكدا. الاتنين صلع. ديل يعملوا ليهم شنو؟. خايف على بشه. خايف بشه يجيب ليه قون ..يقوم يقول عاوز احتفل مع ادوارد سادومبا ..يقوم يلقى نفسو بحتفل مع منو؟. مع الطاهر سادومبا. ركزوا معاي شوية يا جماعة. ما بتشابهوا وكدا. الاتنين صلع. صلعة سادومبا هي الاصل ..صلعة اصلية ..ما بتتمسك. لكن صلعة الطاهر صلعة صناعية ساكت. صلعة تقليد. والله تاني ح تتعبوا جنس تعب مع الصلع دي. امير كمال ..في المباراة ما بعرف ليكم صلعة ادوارد سادومبا من صلعة الطاهر سادومبا. الاتنين بيلمعن وبتشابهن. نجومية المباراة يفوز بيها الطاهر سادومبا ..تقوم اللجنة الفنية تمنح الجائزة ادوارد سادومبا. ناس سوداني ذاتهم ح يتعبوا معانا. الهلال بقى زي القلم (المبرؤ) ..سادومبا في الدفاع..وسادومبا في الهجوم. واحد بيلعب ورا. وواحد بيلعب قدام. (سندمبة) ساكت تاني. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الكاردينال ذاتو غتيت. عندو الغتة. الكاردينال عمل الجوهرة تلاتة طوابق. وعمل سادومبا (اتنين). تتخيلوا عندنا سادومبا في الرديف. 3 سادومبا. يعني سادومباتنا قدر طوابق جوهرتنا. شفتوا النظام دا كيف؟. عندنا بشه الكبير. وبشه الصغير. حكاية سادومبا وسادومبا دي بتذكرنا ليك بالقصة الشهيرة. القصة ديك. مدرب المريخ ح يجتمع ليك بلاعبي المريخ في المحاضرة التى تسبق المباراة. ح يقول ليهم اوعكم من ادوارد سادومبا ..زول سريع ..وطيارة بس ..ما بتمسك بي صلعتو دي. علي جعفر ح يقول ليه والطاهر سادومبا. المدرب ح يقول ليه والطاهر سادومبا برضو. المدرب ح يقول ليهم الطاهر سادومبا خطير في الضربات الرأسية وفي التقدم من الخلف. ضفر ح يقول ليه وادوارد سادومبا. المدرب ح يقول ليه وادوارد سادومبا برضو. لكن المدرب تاني برجع يحذرهم من سادومبا ..يقول ليهم امسكوا لي ادوارد سادومبا. امير كمال بقول ليه والطاهر سادومبا. المدرب ح يقول ليه والطاهر سادومبا برضو. حالتكم ح تبقى صعبة عليكم. وضعيتكم خطيرة. 2 سادومبا في مباراة واحدة ممكن تشتكوا عديل فيها. مباراة ما قانونية. السرعة فوق المعقول. ما في زول بيستحمل ليكم الكلام دا. بالطريقة دي الهلال وقت يكون لاعب مع المريخ الفاشر ..ناس سادومبا ديل بجيبوا القون في مريخ ام درمان. ديل ما بتفاهموا. جنهم وجن المريخ الكبير. لو الهلال لاعب مع مريخ نيالا ..انتوا يا ناس امير كمال شيلوا شيلتكم. ناسنا ديل ما بفرقوا بين مريخ ام درمان ومريخ نيالا. ولا بجاملوا في الحتة دي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… و الليلة سطر عن شييوب ما عاوز اكتبو. بكرة بكتب ليكم عن شيبوب. الليلة قلنا اليوم العالمي للسندمبة في الهلال. سندمبة شديد. سندمبة في الدفاع. وسندمبة في الهجوم. اول مرة اشعر ليك ان (الصلع) جميلة. وانو ما في اجمل من الصلعة. الصلعة دي عبقرية. الصلعة دي (جري ساكت). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. السيدة (ل) – الواحد لو سمع محمد الامين في الحب والظروف ما احسن ليه من (البندول). وقرّط على كدا.
