ايوا حضرتك .. كل يوم في مصر في مصيبة جديدة .. دولة عساكر يوليو العجوزة البائسة تحتضر ومش قادرة حتى توفر الخبز للشعب .. كانوا بيتفرجوا زيهم زينا إمبارح على العرض العسكري إللي عملوه الدواعش في شوارع العريش .. – مظاهرات وقطع طرق وإيقاف قطارات في القاهرة والإسكندرية وبعض المحافظات .. لأن الدولة مش قادرة تصرف على أكتر من 3 أرغفة .. والوزير اللواء علي مصيلحي قال محدش هيقدر يلوي دراع الحكومة . – الدولار النهاردة إرتفع في البنوك ووصل 17 جنية ونص .. ويا خسارة هري الأوستاذ محمد نجم والأستاذ علاء حلبسة عن تحسن الإقتصاد المصري إللي كان أهم أعراضه تحسن قيمة الجنية . – دفعة جديدة من المواطنين اللي بيتهجروا من العريش وسط عروض عسكرية بالأسلحة الثقيلة في شوارع العريش – اه والله بالأسلحة الثقيلة – بتقوم بيها داعش في عز النهار .. مصحوبة بعمليات تصفية لأفراد أمن وموظفين محسوبين على الدولة . – شعبة المستوردين بتقول إن الأسعار زادت بنسبة 100% عن السنة اللي فاتت .. وأدمن الصفحة الرسمية لهيئة حماية المستهلك بيشير في أذكار الصباح والرقية الشرعية . – ورغم ازمة الدولار والعيش والفقر واتبرعوا لمصر بجنية .. مصر بتدفع ملايين لشركات متخصصة في تلميع الأنظمة عند الإدارة الأمريكية .. ايوا امريكا اللي بتتأمر علينا دي إحنا بندفع فلوس لشركات علشان تعملنا دعاية علشان تحبنا ???? .. طب أقولك .. عارف زاهي حواس ايقونة الاثار المصرية لدولة الجنرال عبدو .. طلع مع احمد موسى وقال على ميسي ” أهبل ” … اه والله قال عليه أهبل .. والفيديو اترجم والجرايد الانجليزي والاسبانية ترجمته . دا يوم عادي جدا من أيام مصر … يوم يليق بدولة المماليك الميتة المتعفنة المتقيحة .. وما سبق هي أحداث يوم واحد بس وبيجاوبنا على السؤال بتاع يا ترى يا مصر هتفضحينا في إية النهاردة . الإجابة مصر هتفضل كدة مسخرة لمسخرة ومن جنان لجنان .. هنفضل كل يوم في سفر السقوط … سفر النهايات .. وكل ما يعدلوها من حتة هتضرب من حتة تانية .. لأنها بتموت .. بتمووووت محمود حجازي