* قد يتبادر الي ذهن بعضنا سؤال * ناس الديمقراطية ديل ماعندهم ايمان بالتعيين ولجان التسيير * طيب ليه قاموا باعلان لجنة تسيير للمريخ؟ * طبعا القصة مادايرة درس عصر * لجان التسيير التي تعينها امانة الشباب والوالي والوزير والمفوض الذي يصرح بخروج الامر من يدو * دي الماحبابها * لانها تعبر عن التدخل الحكومي في ابشع صوره * ولا دخل لارادة اعضاء الجمعية العمومية بها * بل هي لا تعتبر الجمعية العمومية من اساسو * تسوقها كالقطيع بالعصا وبدون لجام كمان * اما اللجنة التي كونتها لجنة الانتخابات فهي غير * لانها خيار الجمعية العمومية ولا شأن لها بامانة الشباب والتدخل الحكومي البتكرهوا الفيفا * وهي خيار الجمعية العمومية لانها فوضت لجنة الانتخابات بذلك الدور حسبما ورد بالنظام الاساسي * عشان كدة من تعوزه المقدرة لادراك ذلك يعتبر الامر استهبال * قدراتو كدة مامنو *هذا الشرح بفتح الباب علي اسئلة من شاكلة * هي وينها الجمعية العمومية؟ * النصاب تامي والنصاب ماتامي * كورة شيبوب عبرت ولا ماعبرت * لندخل في جدل بيزنطي جديد لايفيد المريخ بشئ * المهم * حتي قناعات البعض اضحت موقوفة التنفيذ الي حين الفصل في الامر المطروح امام الفيفا * لا لشئ سوي ايجاد مبرر يتمسكون به في مواجهة الريموت كنترول * وياليت القرارات تكون وليدة الانفس التي ترددها * غايتو جنس غايتو * حتي موظفو النادي حزبو انفسهم * موش قلنا ليكم زماااااان الحتة دي بتفرق مابتجمع؟؟؟ * والنملة لما تقرص الزول بتفتكر انها حاتكتلو وتاكلو * قرصتها مابتسوي شي * ولكن نيتها حاتكتلها * لانو الزول ساهل يكتل النملة * المهم * نحلم جميعا بالبطولات القارية ووصول منتخباتنا للنهائيات * ولم نسأل انفسنا سؤال مهم * هل بالطريقة التي تدار بها الرياضة في البلد دي بنتطور؟ * بالتأكيد مابحصل * اذا كانت اكبر انديتنا تنتظر سيد الحيشان التلاتة الشيخ سيرو ليسير امرها اليوم فقط دون التفكير في باكر * سيد الحيشان التلاتة ياناس بزرع برسيم واب سبعين ويقطع ويحش سريع * لكن مابزرع اشجار مثمرة تخرج ثمارها بعد سنين وتواصل في الاثمار * لان ذلك سيكون في عهد آخر غير عهد الشيخ السيرو * والشيخ سيرو مابحب كدة * ماحانتطور مدام عقلياتنا لسة كدة * مدام بنكيل بمكيالين * مدام بننزل بمشكلاتنا الشخصية لارض الكيان نهريها بيهو * ماحانتطور مدام بلدنا رياضيا ماعندها خطط * مدام اتحاداتنا تتصارع عليها نفس الوجوه * مدام بعثاتنا الرياضية الاداريين فيها اكتر من اللاعبين * وهل عدلت لجنتنا الاولمبية نظامها ليوافق ميثاق اللجنة الاولمبية الدولية ؟؟؟؟؟ * عشان نتطور لازم نتمرد علي الواقع وعلي التاريخ * والوسط الرياضي محتاج صراحة وتفكيك * حتي يعود الاصل * بعدها بنتطور * ايها الناس * ان تنصروا الله ينصركم * اها * نجي لي شمارت والي الخرتوم * كان شفت ياوالينا * مشيت جبت علبة بوهيه من المغلق باتنين مليون ونص قال لينا * جيت البيت النقاش قال لي مابتكفي دايرين وحدة تانية يا اخينا * رجعت المغلق يا والينا * قال بقت بتلاتة وميتين بتلاتة ابي يدينا سلك كهربا ننساك كيف والكلب قال اسي الرقابة علي الاسواق دي دايره ليها مكون عسكري ومكون مدني ودول محور؟ والي لقاء سلك