*تحذير نتمسك به. *برغم تداولنا لحكاوي المساطيل كناس نكتة وسريعين بديهة. *لا للمخدرات. *لأنها تذهب العقل. *وذهاب العقل يفقد التمييز. *وفقدان التمييز يقتل البديهة. *لذا لا للمخدرات. *الله لاجاب عقابها. *وعلى ذكر المخدرات. *قالوا كان في مسطول. *بدري الكلام ده. *بدري شديد. *أظنو في الخمسينات. *المسطول ده مشى القصر الجمهوري. *ومشى على الباب عدييييل. *الحرس الجمهوري البدق البندقية في الواطة وفي البوت وبي يدو في نصها وبي يدو في الدبشق ويختها في كتفو. *شاف المسطول. *قام دق البندقية في الواطة وفي البوت وبي يدو في نصها وفي الدبشق وختاها في كتفو وقال للمسطول. *ماشي وين يازول؟. *المسطول قال ليهو خاشي القصر. *الحرس دق البندقية في الواطة وفي البوت وبي يدو في نصها وبي يدو في الدبشق وختاها في كتفو وقال للمسطول. *خاشي القصر داير شنو؟. *المسطول قال ليهو داير أبقى رئيس. *الحرس خت البندقية في الواطة وقال للمسطول أنت عوير يازول؟. *المسطول قال للحرس الشرط ده ضروري يعني؟. *الله يقطع البنقو ويقطع سنينو. *وألف لا للمخدرات. *برغم أن المساطيل ديل مرات بقولوا حكم. *الله لاجاب عقاب المخدرات. *المهم. *الليلة والليلة . *الليلة يوم سطاشر. *باقي تلاتة يوم للنقة باقي تلاتة يوم للنقة . *الليلة والليلة . *أيها الإخوة الثوار الأحرار . *إن ثورتكم ما ثورة زول. *ثورتكم أنتوا ديل بس. *عشان كده ماتبققوا زول منها. *لأنو الناس الزمن ده كان بققوهم بكرطعوا. *وكان كرطعوا حاتموتو عطش. *ظمأ يا ولدي. *ماتبققوا زول. *ولا نقطة . *الله لاجاب عقابهم. *المهم. *إدارات الأندية عندنا معظم أعضائها فهمهم أنو مايزرعوا زرع حصاده يتم في عهد المجلس الذي يعقبهم. *عشان كده كان عملوا بعملوا قدر مدتهم. *بجيبوا الموية قدر ماتكفي عهدهم. *وبعدهم ياريت لو العطش قتل الكيان زاتو. *إذا في موهبة شابة تحتاج للرعاية والتأهيل تلاتة سنوات. *ثم يقوى عودها وتصبح نجماً أساسياً بالتشكيلة بعد تلك السنين *بفكوا الموهبة دي طوالي تأسيساً على قناعتهم بأنهم مابتعبوا ليجهزوا (التيم) للمجلس البعدهم. *عشان كده بنقول الكيان لا الكيمان. *أيها الناس. *كاس الجميلة. *في زول شافها؟. *طيب في زول من ناسها؟. *طيب في زول بعرف زول في كاس؟. *طيب زالنجي بتعرفوها؟. *شفت مرة جبل مرة؟. *الجمال والبهاء بتاع جبل مرة بظهر ليك من تصل كاس . *اللهم وحد قلوب الناس لخدمة وطن وااااحد ديمقراطي. *أيها الناس. *إن تنصروا الله ينصركم. *أها . *نجي لي شمارات والي الخرتوم. *والينا المكلف علينا. *يوم الأحد معانا ولا مع الخيانة ياوالينا؟. سلك كهربا ننساك كيف والكلب قال الليلة والليلة الباص أبو رجيلة وإلى لقاء. سلك صحيفة الانتباهة صحيفة الانتباهة