منذ مغيب شمس هذا اليوم الجمعة الثاني من ديسمبر الجاري حاولت احصاء الاخبار والتصريحات و(التهويمات) التى ظلت تطلقها (قحت المركزي) فلم استطع ! وهذه عادتها كلما اقترب موعد (كرامة) كلما اكثروا من الاشاعات بهدف التثبيط والاقعاد بهمم اهل و دعاة مبادرة نداء السودان . فيسعون جاهدين لاشعال (الميديا) على قلتهم بان (التسونجية) والعسكر يمسكون بالقلم للتوقيع ويبدأ كاتبهم لاهثا كانما يصف مباراة لكرة القدم ... ياخ .... اليوم بس عرمان (قال ليك) خلال (72) ساعة سيتم التوقيع ! وكلام عن (قطع الطريق) على الفلول وحاجة من مثل هذه (الهضربة) ! (بسسسم الله) الواثق البرير (بتاع) حزب الامة قال ليك (لا) الحكاية ستكتمل خلال (48) ساعة و سيتم التوقيع ! واشار الى الحركات المساحة الرافضة وقال ممكن يكونوا حضور وقد يلتحقوا (بالتسونجية) لاحقا (مش عارف) منظمة محامون الطوارئ تكتب عن الافراط فى القوة الذى يتعرض له المتظاهرون . المحامي المعز حضرة يقول (متفائلون بالتوقيع السبت) ! والقائد مناوي قال ليك نرفض (حكاية اركب معنا) رافضا لاي تسوية ثنائية والعدل والمساواة خارج اطار التسوية والاتفاق الاطاري . ومالك عقار خارج الزفة . وعرمان (اصبح) المتحدث الرسمي لقحت واحد وهو رجل بارع حد الضحك بكم الجلابية فى اللت والعجن والفبركات والخيال الواسع فى رسم السيناريوهات ذات الابعاد الثلاثية . والعم (فولكر) بحسب بيان حركة عبد الواحد من (جوبا) عاد بخفي عبد الواحد ! فالشغلة (بتاعت ام العروس) البعملو فيها القحاطة اصبحت ممجوجة وغير مستساغة خااالس . قولى انت عاوز شنو يا استاذ عشان تقتنع ؟ ايواااا انا عاوز ياصاحبي بيان مشترك (متلفز) عديل اشوف فيهو البرهان وناس (قحت) يعلنوا الحكاية دى بشجاعة امام الشعب السوداني عشان نعرف المتعوس من خايب الرجا وكل زول يشوف شغلتو واللا شنو ياجماعة؟ لكن حكاية (ود ام بعلو جاااكم) البعملوا فيها القحاطة دى ما بتمشي على وعي الشعب السوداني . واذا عندهم اتفاق وتسوية (هداااك) الاعلام الرسمي امشوا عليهو لكن حكاية (كان قمت عليك بكتلك) وانت راااقد فوق عنقريبك البتسوا فيها كلما ما اقتربت (مليونية كرامة) دى ما بتخوف ليها شافع الايامات دي ! فاهمني يا سطى؟ قبل ما انسى :—- ايها الناس الخبر الاكيد (الكرامة الرابعة بكرة) فثوروا واغضبو لكرامتكم والحي ما بدوم .... والزول بموت (فد) مرة .... صبري محمد علي العيكورة صحيفة الانتباهة مواضيع مهمة علاج الحمى في الطب النبوي مشكلة مص الإصبع التفاح الأخضر .. فوائد الضغط في العمل كيف نتناول الكزبرة؟ ميكب خدود البشرة الداكنة
