الثلاثاء الماضية 27/ ديسمبر الجاري اجرى الزميل (محمد جمال قندول) حواراً عبر (الانتباهة) مع السيد جعفر حسن الناطق الرسمي باسم الحرية والتغيير. برأيي .... ان اجابات الاستاذ جعفر لم تكن موفقة فى مجملها لما شابها من استعلاء واقصاء واطمئنان دعنا نسميه، فقد بدأ لي السيد جعفر (مالي يدو خااالس) من موضوع التسوية، بل بدأ لي وكأنه جعل من نفسه فرعوناً لهذه التسوية يعطي ويمنع ويصنف كما يشاء، وهذا ان دل انما يدل على فقر تجربته السياسية التي وصلت للغة مبتذلة من التهديد والوعيد، وهذا ما يدل على انه مازال (شافع سياسة) ساكت. ويجب ان يُشكى لاولياء امره حتى يربوه سياسياً ليرعوي ويعود لجادة الصواب فى ممارسة العمل السياسي وبالادب السياسي المعتاد الذى عرفه اهل السودان، فلربما يصنع منه قائداً مستقبلياً (ده لو كان اجتهد لذلك). ولكن لغة السبابة لم تعد تجدي نفعاً مع جيل اليوم. السيد الناطق الرسمي للقحاتة (ون) واللي هو اساساً ينتمي للحزب الاتحادي المعارض جماعة محمد الفكي وبابكر فيصل وغيرهما قال فى اللقاء.... ان الاتفاق الاطاري محدد الاطراف ولا يمكن (إغراقه) ولن يتم التحاور مع (اى زول) سوى جماعة مناوى وجبريل. طيب ياخ وجماعة اردول؟ ناس (قحت توو)! قال ليك (لا) لانهم دعموا الانقلاب! طيب يا (ولدنا) كمان جبريل ومناوي دعموه ايضاً. قال ليك (لا) ... ديل بتحكمنا معاهم اتفاقية سلام (جوبا) ولازم نبقي عليها. (شفتو اللولوة دى كيف)؟ طيب يا استاذنا... انتو ذاااتكم ما قلت لا تحاور ولا تفاوض لا شراكة مع العسكر (الجد شنو)؟ (قال ليك) .... نحن نتحاور معهم لانهاء الانقلاب وارجاع العسكر للثكنات..! ايواااا (فهم برضو)! يعني سعادتك (حا) (تكشكش) العسكر للثكنات مش كده؟ غايتو يا (ابو الجعافر) مش البرهان الشايفنو ده؟ لو ما وداكم البحر وجابكم عطشانين (احلق شنبي). (اهاا) ... وتاني يا ابو الجعافر.. السيد مبارك الفاضل قال عاوز يوقع ليه رفضتوا توقيعه؟ قال (ليك) السيد مبارك من عرابي الانقلاب! (شفتو الفرعنة دى كيف)؟ عزيزي القارئ ... اعمل معروف ركز لى رأسي (ابو الجعافر) ده بى جهة يقول انقلاب وبى جهة يتفاوض مع الانقلابيين! نحن نمشى مع جعفر (ياتو) فيهم؟ طيب يا (ابو الجعافر) سؤال من الحوار... بهذا الاسلوب الا تمارسون الاقصاء لجبهة عريضة من الشعب تعارض هذه التسوية؟ قال ليك (لاااا) ... فإن معظم السودانيين راضون عن الاتفاق الاطاري! واظنه كان مدنقر رأسو ويطقطق فى اصابعه. (معظم) دى قدر شنو ونوزنها بالكيلو واللا بالطن؟ قال ليك ما شغلتي المهم (معظم) وخلاس. يا أستاذ... (معظم شنو ياخ) وانتو لغاية هسي داسنو.. ياخ حتى الوقعوا قالوا ما شافوه بعينهم! يعني وقعتوا على بياض واللا شنو؟ اخرجوه للرأي العام (ده) لو كنتم سياسيين صادقين بحق. انا ما عايز اقول ليكم ولو (كنتو رجال بحق) لكن غيري من الشماشة ممكن يسمعكم ليها. داسنو ليييه؟ اذا كان عملتوه من اجل الشعب برضو.... كان هناك سؤال عن هجومه على التلفزيون القومي واتهامه له بعدم تغطية مناشط (جماعتو القحاطة) فلا ارى داعياً للتوقف عنده، لأن التلفزيون كان قد اصدر بياناً فند فيه مزاعم (ابو الجعافر) وبالتواريخ والمناشط (القحطاوية) التى غطاها له شخصياً. (ولدنا) جعفر سألوه (اهاا) يا المبروك ومتى تتوقع ان يتم التوقيع النهائي على هذه التسوية؟ وطبعاً (لانو ما ناقش ابو النوم) قال (والله) لا استطيع تحديد موعد لذلك. ولكن اتوقع بنهاية شهر يناير! (مش بقول ليكم) .... لو ما ساقهم البحر وجابهم عطشانين لوموني! وأخيراً: فى ظل صمت الطرف الآخر وهو المكون العسكري عن الكلام الا من عبارة (لا توجد تسوية ولا اقصاء) تظل مثل تصريحات ولدنا جعفر (حلاوة مصاصة) ليس إلا .. لكن الحاجة المحيراني.... الزول العاوز يكشكش الجيش للثكنات ويقرب هذا ويبعد ذاك ويتوعد (كيزان التلفزيون) ويوزع صكوك الوطنية ويمسك (مفاتيح) التوقيع ويتحدث بملء فيه بلساننا جميعا ولا يبالي و.... و..... تفتكروا الزول ده مركب مكنة شنو؟ طيارة مثلاً؟ قبل ما أنسى: كدي يا (أبو الجعافر) امشوا املوا ليكم خمسة بصات من عضوية خزبكم وبعدين تعالوا نتفاهم فى حكاية التسوية، و (ما حا) نختلف خااالس!
