خاص ب [الانتباهة اونلاين] استمعت لمقطع (فيديو) لجزئية من لقاء سعادة الفريق عبد الفتاح البرهان رئيس مجلس السيادة الذى اجراه معه الاستاذ المسلمي الكباشي مدير مكتب قناة الجزيرة بالخرطوم . وان كان المقطع لم يتطرق الا لثلاثة او اربعة اسئلة بُعيد توقيع الاتفاق الاطاري او ما عرف بالتسوية إعلاميا الذى وقع بين المكون العسكري (البرهان/حميدتي) و ضع خارج القوس ركن او (ما ركن) اذا شئت او كنت موجوع (خااالس) من الذى تم بين العسكر و مركزي (قحت) بعد اجراء عملية (الفكة الحزبية) المهم هذا لا يهمنا من وقع مع من فالشارع والكيانات المعارضة للتسوية وقد قالت كلمتها ومازال مرجل الهواء يغلي بالتصريحات الساخنة . البرهان (كما بدا لي) .... عند اجاباته على اسئلة المسلمي انه كان مرتبكا متهدج الصوت لا ادري ارهبة ام انه كان متوترا مرهقا من شئ ما قبل بدء المقابلة ولكن قطعا لمن يستمع باصغاء سيكتشف ان (الجنرال) كان صوته (ما ياهو) و مرتبكا . المسلمي ساله إن كان يرى ان هذا الاتفاق كاف لتسليم السلطة للمدنيين رغم المعارضة القوية مستنطقا الفريق الا يرى .... ان هناك انقساما واضحا بالشارع حوله ؟ البرهان ..... قال ابدا لا يمكن ان تحل مشاكل الوطن الا بالتوافق التام واسهب فى الحديث عن استصحاب اصحاب المصلحة فى جميع الامور وقال كلام (كتيير) فى هذا الصدد . اعتقد ان (المستشار الاعلامي شايف شغلو) .. وغايتو انا لم اطلع بإجابة من كلام الفريق ! و ده فهمي يا المسلمي . المفاجأة التى لم يكن يتوقعها الفريق اعتقد جاءت عند سؤاله عن فقرة (ان تقف الحكومة على مسافة واحده من جميع الاديان) ! رغم ان السودان بلد مسلم بنسبة 98% الا يعد ذلك استهدافا لعقيدة وهوية هذا الشعب ؟ الوضع الطبيعي للاجابة (برأيي) هو .... طالما اننا نعلم ذلك وان اى رئيس سيأتي عبر الانتخابات حتما سيكون مسلما لذا كتابة (الوقوف على مسافة واحده) لن تغير من الحقيقة شيئا فدعها تكتب حتى لا تؤلب علينا العالم الخارجي ! ده شنو ؟ ده كلامي انا لو كنت فى محل البرهان . (لا) البرهان قال ليهو .... حقو ما نطلق الاحكام المسبقة وتعالوا نجلس ونتفاوض وبعدين كل زول يقول رايو؟ يا سعادتك تتفاوض فى شنو ؟ فى نسبة الاسلام دى صحيحة او (ما) صحيحة واللا شنو ؟ مش ده الكلام (الحا) يفضي ليهو (القعاد) والتفاوض ؟ ومش ممكن جدا الكلام يجرجر ويفتح لينا باب برعاية الاممالمتحدة لاجراء تعداد (ديني) وليس سكاني ويفتح الباب على مصراعية للجمعيات النصرانية ونبدأ فى الكلام (الماياهو) ؟ مش الكلام ده ممكن جدا يحصل ؟ بعد ما كنا فى تشكيل حكومة (نبقى) فى اثبات اننا مسلمين ام لا ؟ يا سعاتك يقعدوا ويتناقشوا فى شنو ؟ اها ياخ .... افرض (تب) بكرة طلعوا ليك النسبة (56%) تموها ليك موية و دولار وتنصير وكده مع الجوع الحاصل ده بتمشى وين من ربك؟ قال نقعد نتفاوض قال ؟ سؤال المسلمي عن تجاوز الشرق وكده الفريق(ختفو من خشمو) وقال (ابدا ابدا) الشرق مشار ليهو بفقرة كاااملة ان تحل مشاكله مع اصحاب المصلحة هناك ! (طيب) ما تجيبوهم من (هسي) وتقنعوهم وتتفقوا عشان يوقعوا معاكم لزوم (خمارة العجين) شنو؟ كل حاجة سيتم التفاوض حولها لاحقا ! (لاحقا لاحقا دى حدها وين)؟ الكلام ده يا سعاتو (معناتو) ... انتو ما عندكم لا اتفاق ولا اطار و (عد) معاب من الان و قدامك سنة كاملة لو شكلتو حكومة يتوافق عليها (جميع) اهل السودان .... (احلق شنبي) فهمتا علي يا سعاتك؟ قبل ما انسى :— واضح من اجابات سعادة الفريق البرهان ان هذا الاتفاق ارادوا ان يقولوا للناس من خلاله (والله ياهو ده الموجود فى السوق) ! وما عندنا غيرو والعجبو عجبو والماعجبو يجي يستلم شهادة عدم الوطنية والارتهان للخارج ! مااا كده ياجماعة (قالوا الفيك بدربو) وطالما انه غااالى كده والغالي مالوا ياجماعة ...؟ متروك (صاح) ؟ والبدائل رااااقده . واللا شنو يا (عب باسط)؟ الاربعاء 7/ديسمبر 2022م صحيفة الانتباهة مواضيع مهمة علاج الحمى في الطب النبوي مشكلة مص الإصبع التفاح الأخضر .. فوائد الضغط في العمل كيف نتناول الكزبرة؟ ميكب خدود البشرة الداكنة
