قبل يومين تابعت برنامج في قناة الشروق استضيف فيه السفير السوداني في الامارات ..طبعا طمام البطن حاصل بس الحمد لله .. تعالوا اسمعوا سعادة السفير قال شنو ..وانا عشان اتأكد انو ما لقطت لي (شمار) بالغلط حضرت الاعادة الفجر ! اولا المذيعة .. الحلوة ديك .. مدللة الشروق واضح انها كانت بتجامل في السفير زيادة عن اللزوم وانا شايفة انو يا سلمى تخليك في الكابلي وحمد الريح والبرامج البتحتاج ابتسامات ومجاملات احسن لكن اللقاءات الزي دي ما بتناسبك واي واحد ما حيكون في مستوى الأستاذ خالد ساتي مافي داعي يتهور ويستضيف وزراء ولا سفراء والا تحول البرنامج لمجرد زيارة عادية لا طعم لها ولا رائحة نجي لسعادة السفير : الحديث كلو كان عموميات وأشياء معروفة عن العلاقات بين البلدين واواصر الصداقة وكده ..وانا طبعا مستنية انو المذيعة (تزنقوا) بسؤال على الأقل نعرف فهم الزول شنو .. غايتو في النهاية سألتو عن الطموحات والآمال ..اها تتخيلوا قال شنو ؟ طبعا الطموحات والآمال (بناء السفارة وبيت السفير ) ؟؟؟؟؟؟؟؟؟؟؟ احححييييييييي انا .. بس الحمد لله والدوام لله .. لك ان تعرف يا سعادة السفير ال (17) زي ما انت قلت في اللقاء انو الآباء ظلوا يدفعوا لبناء السفارة دي منذ الثمانينات وعندما اتينا نحن (ورثنا) الشغلانية وبرضو بندفع رسوم بسموها (خدمات) وانا لما سألت خدمات دي شنو قالوا الفضائية وبناء السفارة ..دي لو دولة كان اتبنت.. وفعلا في دول اتبنت في المدة الطويلة دي فأين ذهبت اموال (بناء السفارة) خاصة انو قطعة الأرض ال 9000 متر موجودة ؟ وال (16) سفير الفاتوا ديل ودوا رسوم بناء السفارة دي وين عشان نعرف بس وتعرف سعادتك انو في مال تم دفعه على مدار سنين مشى وين ؟ ولو راح زي ما كتير راح السفارة دي حيبنيها منو وبحق منو ؟ وبعدين احنا مالنا ومال بناء السفارة وهي السفارة اساسا بتقدم لينا شنو عشان تتبني ؟ وهل احدثك يا سعادة السفير عن سفارات وقنصليات عادية جدا لكنها تقدم الخدمة لمواطنيها على مدار اليوم واديك مثال : القنصلية الهندية عاملة فرع في احد (المولات) للمراجعين في الفترة المسائية وهو عبارة عن صالة عادية جدا مسورة بالزجاج والناس تجي تقضي امورها وترجع فهل احنا افضل من الهند ماليا عشان نصرف في بناء يذهب الناس اليه قسرا لأنه مركز للجبايات ليس الا ؟؟ وهل موظفينك على استعداد لأن يعملوا في الفترة المسائية مراعاة لظروف عمل من قاموا ببناء السفارة ؟ طبعا مستحيل لأنو ديل بعد الساعة واحدة بقولوا ليك الخزنة قفلت يبقى ما فائدة مبنى لا يقدم لمواطنيه شيء ؟ والحاجة القاطعة قلبي نصين دخلنا شنو احنا ببيت السفير ؟ دي ما قضيتنا ولا مشكلتنا والسفير ده جايي هنا عشان يسكن في بيت حدادي مدادي وللا يحل مشاكل الناس وانا ما عارفة مرضة السودانيين بالبيوت شنو الخفير على الوزير وكأنهم ما مولودين في (حيشان ) !! يعني احنا لو كنا دولة صغيرة كنا عملنا شنو ؟ انا ما سمعت لي بي سفير بقابل الناس في بيتو بعد العمل لحل قضاياهم يبقى البيت ده ما بهمنا حتى لو تسكن في غرفة في السفارة الأهم مراعاة قضايا الناس وديل رعيتك ربنا بسألك منهم طالما ارتضيت المنصب ده لنفسك وزي ما انت ذكرت في كلامك انو في (16) وزير قبلك واترحمت من المات منهم لك ان تعرف انو الموت سبيل الأولين والآخرين فمن الأفضل ان نعمل لأجله واعتقد انو المغتربين منتظرين منك حلول لمشاكل كثيرة ومعقدة في التعليم والاستثمار والعودة وغيرها وهذا ما يؤرق المغترب السوداني يا سعادة السفير وليس بناء السفارة وبيت السفير !
