ساخر سبيل واااسطة الفاتح يوسف جبرا هروباً من السخانة بتاعت الأيام دى والكهرباء المرات بقت تقطع يوماتى .. والفلس والزهج .. خرج المواطن (أيوب) ليجلس على ضفة النيل .. إتخذ له موقعاً قريباً من طرف المياه التى كانت تصطدم بأرجله مما جعله يحس ببعض الرطوبة والإنتعاش .. فجأة ارتطدم برجله جسم صلب .. كانت زجاجة غريبة الشكل ما أن فتحها حتى خرج منها دخان كالإعصار سرعان ما تشكل له فى هيئة مارد ضخم ... - شبيك لبيك أطلب أى حاجه فى الدنيا وأنا أحققها ليك! - طبعن يا مارد ح تحقق ليا تلاتة أمنيات مش كده؟ - إنتا يا زول ما مواكب واللا شنو؟ - كيفن يعنى؟ - مع التضخم وإقتصاد السوق الحر والأزمة العالمية إنتا ما عارف إنو بقت أمنية واااحدة بس؟ - لكن ياخى المارد البطلع لى الناس دى كووولهم بيديهم تلاته فرص إشمعنى يعنى إنت عاوز تدينى فرصة واااحدة بس؟ - شوف يا زول قلنا ليكا فرصة واحدة بس والله تطول كلامك هسه أدخل تانى فى القزازة دى ما أطلع كولو كولو.. - خلاس خلاس ما تزعل ياخى فرصة واحدة فرصة واحدة .. الزول أصلو يعنى ما يهظر معاكم؟ - يلا أطلب طلبك وخلصنا .. - عاوز واسطة - بتقول شنو؟ - قلتا ليكا عاوز وااااسطة - إنتا باين عليك زول على نياتك سااكت ومسكين .. يابنى آدم أطلب ليك فيلا بى حوض سباحة فى المنشية .. عمارة سبعة طوابق فى قاردن سيتى .. مليون ريال حاجة زى دى ! - لا بس أنا عاوز واسطة ! - خلاس واسطة واسطة وأنا مالى الجنى يقوم ببعض الصرخات .. والتعاويذ بصوت عال ثم ما يلبث أن ينضم إليه جنى آخر.. - أهو جبنا ليك (جنى واسطة)؟ - أيوه أنا الواسطة ؟ أطلب عاوز شنو؟ - شوف يا واسطة أنا عاوز ليا فيلا فى المنشية فيها حوض سباحة - بسيطة (يخرج الموبايل ويتصل) : آلو ..سمكمائيل ملك الأراضى الأرضية؟ ياخى عندنا ولدنا (أيوب) ده .. أمرو بيهمنا وكده وقال عاوز ليهو فيلا فى المنشية يكون فيها حوض سباحة؟؟ - ما مشكلة ثوانى وأخلص ليهو الموضوع ( ينزل الجنى سمكمائيل من السماء وهو يحمل فى يده ورقة).. - البنى آدم العاوز الفيلا الفى المنشية الفيها حوض سباحه وينو؟ - ........... أنا ... ده أنا يا مسئول الأراضى الأرضية ! - طيب أهو دى شهادة البحث بتاعت الفيلا فى المنشية بى اسمك .. أى خدمة تانى؟ - أيوة عليك الله يا الواسطة كلمو ليا عاوز ليا عمارة سبعة طوابق فى قاردن سيتى - بالله شوف ليهو يا سمكمائيل ملك الأراضى الأرضية عمارة سبعة طوابق فى قاردن سيتى.. - ما نشوف ليهو فى حته تانية .. قاردن سيتى دى الجماعة ما خلو فيها حته فاضية - لا بس أنا عاوز فى قاردن سيتى دى ذاااتا - طيب نحاول مع إنو الفرصة ضيقة - (يختفى لبرهة ثم يعود) : أهو دى شهاده البحث .. عمارة سبعة طوابق وفى قاردن سيتى بى اسمك وكمان جارك وزير! - أنا أمشى بعد ده! - تمشى كيف يا واسطة .. لسه عندى كم حاجة عاوزة ليها واسطة - طيب قول.. - عاوز ليا مليون ريال! - بسيطة .. أجيب ليك جورج قرداحى هسه ! - إنتا بتهظر؟ - أهظر دى شنو .. عاين ده منو؟ - وفاز معنا فى حلقة اليوم المواطن السودانى (أيوب) بمبلغ مليون ريال وإذا بدكم إنتو كمان ممكن تفوزو بس طالعو الأرقام اللى فى الشاشة وإتصلو فينا ... (قرداحى يسلم أيوب شيك بمليون دولار ويختفى) .. - شكراً يا واسطة أنا ما عارف أشكرك كيف .. بس عندى ليك طلب أخير - شنو؟ - أنا عاوزك تتوسط ليا عند المارد ده يدينى تلاتة أمنيات تااااانى ! كسرة: أنا عاوز ليا (جنى) يتوسط ليا عشان (ناس الشرطة) ديل يردوا على مقالاتنا ويورونا الحاصل !! الرأي العام
