كيف اجتمعت؟ بدر موسى [email protected] يا رمز العفة القديسة ويا نور الشمس الطالع بي صوت الغضب الخافت وبالهمسة بلغت رسالة مفيدة ومختصرة قدر ما إني حزينة بحس بي إني قوية بشكركم كلكم على وقفتكم معاي الناس الزاروا أسرتى وطمنوها زيارتكم لى بيتنا أدتنى دفعة قوية من يوم 13 فبراير وانا حسيت انه حياتى اتغيرت بقيت زولة أقوى رغم الكارثة والحزن الا انى لسه متماسكة بى تشجيع الحولى ودعمكم لي بشكر كل الزارنا في بيتنا ووقفوا معاي كلماتك من نار تحرق حرقة لأنو الدار دارنا قبل ما تكون دارك لو ما بنعز مقدارك كيف بنطولو مدارك وكيف ناخد تارك لو ما بنخوضا معارك معنى كلامك إنو الواجب هسة المرقة دروب العزة الوعرة بنمشيها وبنسلك طرقا كلماتك زي منشور الطوفان بيها تهدي عروش الفجرة تطيري من عينا النوم وتزيدي في أرقا يا ضي القمر الساطع ونار الوجع المحسوسة بالجرح الغور في صدرك وبي كلماتك ودمعاتك أشعلت لهيب الثورة وفي كتاب التاريخ الخالد بتسطري أنصع ورقة ***** حكيتي القصة وفصلت دروسها لو ما يفدوا الأحرار الأمة ببقى الحال ياهو الحال وبتفضل دايماً مهزومة تلهث مطحونة تعيسة ما بشرق نورا ولا حاجة بتبقى كويسة بت اسحق الصافية الحرة أرفعي راسك طولي النجمة وأصلبي قامتك سامقة اتفجري قدرة علمي شعبك بالهمة مافي سبيل للمقهورين غير الثورة كان لازم تحكي القصة وترسمي باللون الأحمر من دمك أروع لوحة صيغي التاريخ أعيدي كتابتو وفصلي بالصوت والصورة أرفعي سيرتنا السمحة علمي كل جاهل ما بقرا السيرة ولا بعرف قدره بما فيهم ريسنا العرة هبنقة.. البشرب في دم شعبو مصفى وفي كافور بانيلو قصور لي خلانو وأحبابو لا خايف ربو ولا حسابو طيري من عينو النوم وزودي أرقو أكتوبر كانت أول ثورة فيها الشعب الأعزل بكسر قيدو بي عزيمتو وبكفاحه قاوم بغي السلطة وجورا وطاح بالعسكر هد قلاعه وشل سلاحه وأهدى العالم معنى الثورة البيضا الحرة وفي أبريل شعبك تاني هدر زمناً قبل العالم يصحى نحنا الأول ونحنا التاني ذكري شعبك بالحصة شعبك عملاق ومعلم خبرة لا بغفل لا بنسى يا نبض القلب الدق بفكر في سرك وأتأمل يا بت يا صفية كيف اجتمعت فيكي أصايل الخلق السامي وصلابة الوقفة مع إنك في فنك وتلوينك بتذوبي عذوبة ورقة وفي كتاب التاريخ الناصع بتسطري أنصع ورقة ***** وكيف يا بنية بي قوة زندك وسلامة النية بتوالي الطرقة ورا الطرقة على باب الحرية وبي عنادك وعزيمتك بتكسري حاجز الخوف وتزيلي الرجفة وتوقدي نيران الغضب الحية وبتحرري أمة وتدوسي على الهيبة المزعومة تكشفي أكاذيبا وزيفا ***** مقهورة.. ليل مأساتك حالك ضلمة وجرحك نازف من جوة مغلوبة ومليانة أسية وجوة عيونم منتصرة تبشّري بالفجر الصادق ونوره الأشرق بقة في عويناتك يبرق قبلي ومن غبنك من الضيم والحرقة بتدفعي مهر العزة الغالي تمام ومكفى وبترفعي راسك عالي وتحملي راية الزفة وتقودي سفينة الشعب العابر للبر الآمن والضفة كيف اجتمعت فيك السطوة وجسارة العين الحمرة الحارق لهبا وزايد ألقا كيف ترفعي صوتك هادر وأنفاسك مكبوتة وبالشدة بتتحدي فتوة وإيدك مربوطة كيف اجتمعت فيك القوة مع الألفة مع إنك في فنك وتلوينك بتذوبي عذوبة ورقة؟!
