[email protected] أطلعت علي صورة من عقد عمل مدير سوق الخرطوم للاوراق المالية بموقع الراكوبة يعني شنو 2% يستأثروا بثروة البلاد وباقي العباد يلقطوا ليهم الفلة !! يعني شنو 1% يستأثروا بالسلطة والباقي بالسطلة والرعية راضية مرضية .. وهي لله هي لله ولا للسلطة ولا للجاه .. يعني شنو لو اشتروا ليهم عقارات في الخليج ولا فتحوا حسابات في بنوك بلاد برة ولا درسوا اولادهم في ماليزيا والهند وأوكرانيا وبريطانيا .. يعني شنو كامين فيلا في كافوري للريس وأخوانه مش من شغلهم ورواتبهم وواحد فيهم شغال 4 شغالانيات يعني يتقطعوا!! يعني شنو يتعالجوا بره في مصر والأردن وأمريكا .. بعدين ده عقد واحد وقع في يد واحد صحفي وهو عقد واضح مافيه لف ولا دوران شنو المانع الباقين يعملوا عقود مع الحكومة في سوق الله أكبر .. وبعدين شوفوا الناس ديل حاكمين من بتين من 30/6/1989 وحتي الآن فاضل ليهم زي شهر وتلاتة يوم ويكملوا ال 22 سنة يعني ما افسدوا ولا حاجة ولا اغتنوا بالثراء الحرام مش زيهم زي بعض من بعض المغتربين البيشتغلوا 30 سنة خارج السودان ويقروا اولادهم في امريكا وبريطانيا والهند وبعدين يشطبوا ليهم عمارة في السودان وسيارة ليه وواحدة للمدام وباقي التسهيلات لعودة المغترب للسودان ده لو عاد!! بعدين الريس قال ليكم الزارعنا غير الله يجي يقلعنا!! وواحد قال ليكم الحسوا كوعكم وانا لي مده بحاول الحس كوعي وبحاول اجد طريقة عن طريق الفوتوشوب وبعدين اصورها واديها ليه لحس كوع الكتروني! يعني لو ما عاوزين تغيروا السلطة دي علي الاقل طالبوهم بتقاسم الثروة والسلطة خلونا نشوف ميزانية العام القادم ونقسموا علي بعض وبعدين نعمل شيرنق ونسدد جزء من ديون السودان وقبل ده كله نحل مشاكل اهلنا الطيبين في دارفور والشرق والشمال ونديهم الدايرنو وهو ما كتير يعني يا حكومة غالبك توفري مسكن وملبس وتعليم وعلاج لكل مواطن وجه ممكن لو قاسموكم الثروة والسلطة دي موضوعها تاني يا قسمناكم فيها ولا شلناها الضحي الأعلي يا شعب السودان لك الله
