ساخر سبيل نحنا فاضين ؟ الفاتح يوسف جبرا بينما كان المسؤول يقرأ في صحف الصباح فجأة امتقع وجهه وأمسك بسماعة التليفون يخاطب مدير مكتبه طالباً منه الحضور على وجه السرعة. -قريت الخبر ده؟ -ياتو خبر سعادتك؟ -الخبر بتاع توقف مراكز غسيل الكلى، (مواصلاً)أيه البيحصل ده؟ أتصل فوراً بالمسئولين عن الصحة والمالية والضرائب والزكاة وخليهم يجوني هسه. في الإجتماع : -أنا يا جماعة حزين جداً للشيء البحصل ده؟ -تقصد التلاتة الماتوا عشان أكسجين مافي ديل ! -لا .. لا بقصد التوقف بتاع مراكز الكلى .. معقولة الناس دي تموت عشان ما دفعنا للمراكز دي مستحقاتها الكم مليون دي! -مسئول الصحة: لكن نعمل شنو؟ الناس دي عددها كبير وعاوزين يغسلوا 3 مرات في الأسبوع والمكنات العندنا ما كفاية والمالية ما قاعده توفر لينا قروش! -مسئول المالية (مقاطعاً) : لكن بس معقول 3 غسلات في الأسبوع؟ نجيب ليهم قروش من وين؟ -(في حزم) : والحل شنو؟ الناس ديل ربنا بيسألنا منهم. -مسئول الضرائب: والله أنا بفتكر إنو الحل واضح نعمل (ضريبة غسيل) على (المغتربين) أصلو دى الضريبة الوحيده الما ختيناها ليهم ! وكووولها يوم يومين ولو عاوزين بعد داك العيانين ديل تغسلوا ليهم بالبخار ذاتو ممكن . -أنا أفتكر ده ما حل؟ المغتربين ديل خلاس خليناهم أباطهم والنجم ! (ملتفتاً نحو مسؤول الزكاة) ما عندك لينا حل يا مولانا؟ -بسم الله الرحمن الرحيم وبه نستعين أما بعد .. الحل قادم بإذن الله إذ أننا نعمل على إستعادة الخمسين الف دولار التي سبق أن تبرع بها الديوان لأحدي القنوات الفضائية (الوهمية) قبل خمس سنوات وأعدكم يا إخواني أن نضعها تحت تصرفكم حال إستلامنا لها . -أها وبعدين يعني نخلي الناس دي تموت قدامنا كده ونقعد نعاين ليهم؟ -والله يا سعادتك فعلاً الكلام ده ما بجي وحقو نشوف لينا طريقه نوفر بيها علاج للمواطنين ديل! -مسئول المالية: لو كان في قروش مالو لكن نجيب ليهم قروش من وين؟ القروش الفي دي ما بتكفي المرتبات والمخصصات والبدلات والسفريات و(علاج أولاد الوزراء) نحنا (طبل ساااكت) عاوزين لينا الشئ الفلانى كل سنة ، والله مافي حل إلا نشوف لينا زول يسلفنا! -طيب ما نشوف لينا صندوق! -(في حزم) : هي حصلت كمان عاوزين الحكومة تخش ليها في ختة؟ -لا ما بقصد سعادتك .. أنا بقصد يعني نشوف لينا صندوق تمويل دولي يدينا قرض وكده! -مسئول المالية: قرض شنو؟ نحنا هسه ديوننا العلينا قادرين ندفعا؟ -(في دهشة) : والديون دي جات من وين؟ -كيفن سعادتك جات من وين؟ مال الكباري والسدود دي عملناها من (الصادر) يعني؟ -المهم هسه أنا عاوزكم تفكروا لينا في طريقه نجيب بيها كم مليون كده عشان ندي المراكز دي مستحقاتها وموضوع توقف المراكز ده ما يتطور .. كل زول فيكم يفكر ليهو في حل ونجتمع بكره في نفس المواعيد دي! الاجتماع : بدأ المستشارون والمسئولون التوافد إلى قاعة الاجتماعات الوثيرة وهم يرتدون الجلابيب البيضاء الناصعة والملافح والعصي الما خمج وقد وضعت أمامهم على طاولة الاجتماعات قوارير المياه الغازية المثلجة وثرامس الشاي وصحانة التمر والفول المدمس .. -أها يا جماعة إن شاء الله تكونوا لقيتوا لينا حل للحكاية دي! -والله في كم اقتراح كده سعادتك وعاوزين نشوف رأيك فيهم - (إقتراح 1) : زيادة تعريفة تذكرة الدخول للمستشفيات ! - (إقتراح 2) : زيادة ألف جنيه في كل فاتورة كهرباء ! - (إقتراح 3) : زيادة كم قرش كده في شركات الإتصالات ! بعد تم طرح هذه الإقتراحات من قبل المشاركين في الإجتماع أعطي المسئول الذي يدير الاجتماع الفرصة لمستشار (شئون التنظير) والذي بعد أن قام بتصليح الشال وتثبيت النضارة وضع أمامه الورقة التي عليها الاقتراح، ثم خاطب الجمع : -أنا أقترح يا جماعة تكوين لجنة تسمى اللجنة القومية العليا لدفع استحقاقات مراكز الكلى تنبثق عنها لجان أخرى هي : -اللجنة الفرعية للجنة القومية لدفع استحقاقات مراكز الكلى للتحصيل، ومهمتها تحصيل أي رسوم أو ضرائب أو تبرعات تصل باسم اللجنة . -اللجنة الفرعية للجنة القومية العليا لدفع استحقاقات مراكز الكلى للاستثمار، ومهمتها استثمار المبالغ والأموال المتحصل عليها بواسطة اللجنة الفرعية للجنة القومية لدفع استحقاقات مراكز الكلى للتحصيل، وهذه اللجنة تنبثق عنها لجنتان هما اللجنة الفرعية للجنة الفرعية للجنة القومية لدفع استحقاقات مراكز الكلى للاستثمار الصناعي، ومهمتها استثمار الأموال المتحصل عليها بواسطة اللجنة الفرعية للجنة القومية لدفع استحقاقات مراكز الكلى للتحصيل في القطاع الصناعي واللجنة الفرعية للجنة الفرعية للجنة القومية لدفع استحقاقات مراكز الكلي للاستثمار الزراعي ومهمتها استثمار الأموال المتحصل عليها بواسطة اللجنة الفرعية للجنة القومية لدفع استحقاقات مراكز الكلى للتحصيل في القطاع الزراعي وتنبثق عن هذه الأخيرة لجنتان هما اللجنة القومية لدفع استحقاقات مراكز الكلى للاستثمار الزراعي المروي واللجنة القومية لدفع استحقاقات مراكز الكلى للاستثمار الزراعي الآلي!! على أن يشتمل الهيكل الإداري للجنة القومية العليا لدفع استحقاقات مراكز الكلى وما ينبثق عنها من لجان على المناصب التالية : مدير عام الهيئة ،نائب للمدير العام،مجلس إدارة،عضو منتدب،مدير إداري، مدير مالي، مدير للتخطيط والمتابعة ،مدير التحصيل ،مدير الاستثمار،مدير الاستثمار الصناعي،مدير الاستثمار الزراعي،مدير الاستثمار الزراعي المروي،مدير الاستثمار الزراعي الآلي،عدد من المحاسبين. عدد من الموظفين، عدد من السائقين. -طيب ح تسألوني القروش نجيبا من وين؟ بسيطة .. إنتو من قبيل قاعدين تقترحوا.. القال ندفع العيانين البمشوا المستشفيات يتعالجوا تذكرة بي ألفين؟ والقال إنو نكلم شركات الاتصالات تزيد التعريفة بتاعتا حاجة شوية كده نشيلا نديها لي ناس غسيل الكلى والاقترح إنو نتفق مع ناس الكهرباء وأي مواطن يمشى يشتري كهرباء نخت ليهو ألف جنيه في الفاتورة وده كلام يا جماعة كلو مقدد ساااكت وما بجيب نتيجة والعائد بتاعو شوية و.. -(الجميع يقاطعونه) : طيب والكلام الما مقدد وبجيب قروش كتيره شنو؟ -أيواا .. الكلام المظبوط إنو نفرض على أي نادي يسجل ليهو لاعب محترف من بتاعين الكم مليون دولار ديل رسوم 10%!! كسرة : ما لازم مراكز غسيل الكلى تتوقف نحنا فاضين من تصنيع الطائرات !!
