[email protected] مثل إنقاذي " أنا اسي كنت هناك ... ومافي أي حاجة " حكمة الخميس : الكان دا كان داكا سيدي سيد الطاحونه الكان داك اب قره عندو المونه الكان داك كان ده ولد ريّا الكان داك بر عندو الفضيه سيد أبوي وينو النحاسو البنتل الجدري الحبس البازنجل هَييي بمدح فوق المسيد واقع فوق للحدود يوم تِِجلى ويوم تزيد مالوا مدح الرشيد سيدي الوارث الشيخ ود بدر (1) البشير : الساعين لإسقاط الحكومة" عايزين يرجعوا حلمية لقديمها " يا ريت ترجع حليمة وعشة ورقية وفاطنة والزمن الجميل، يا ريت ترجع لمة الناس في بيت واحد وصينة واحدة في الفطور والغداء والعشاء، يا ريت ترجع الصفات الجميلة التي كان يتحلى بها هذا المجتمع، يا ريت لو يرجع التعليم زي ما كان .. البيت الواحد بكون شغال فيهو زول واحد وشايل الحمل براهو وبعد ده بكون مرتاح والخير باسط.. انتو جيتو على الشعب السوداني بالساحق والماحق .. ما فضل اي حاجة في البيت .. الملح بقا مسيخ.. السكر بقا سلعة نادرة في البلد دي.. العيشة قدرالأضان ... القهوة بقت نص كباية بي (2) جنيه ، مصانع الحكومة تمت تصفيتها،مشروع الجزيرة لحق آمات طه، دارفور أصبحت من المناطق المدمرة، عليك الله نقول شنو ونخلي شنو ياخي .. عليكم الله من محل ما أنقذتونا رجعونا .. ونحنا راضين. (2) الوطني: أسهم انفصال الجنوب في قيام دولة مخربة!! بالمقابل أسهم إنقلاب 89م في الكثير من الكوارث التي حلت بالمجتمع السوداني، وقادته إلى المرض والجوع، نهبت أموال الدولة .. عطلت المشاريع الزراعية – أغلقت المصانع – تم تدمير التعليم – أنتهت أخلاق المجتمع – الدولار بقا بي (5000) جنيه تقريباً – هجرة العقول والكوادر البشرية .. أصلوا الجمل ما بشوف عوجة رقبتو .. (3) دخول سلع ومستحضرات تجميل غير مطابقة للمواصفات بواسطة التهريب المقنن عبر الجوكية (تجار الشنطة) والحمير!!! أخيراً تم إستخدام الحمير في التجارة القذرة ... يعني بعد شوية الحكومة ترفع الدعم عن الحمار وسعروا يطير السماء .. بلد هاملة ساااااااااي .. حتى الحمير بقت تشتغل فيها تجارة شنطة ... أكيد حمير تربية كيزان !!! (4) المؤتمر الوطني ينتقد محاولات المعارضة إستغلال المصلين بمساجد الخرطوم !! انتو 23 سنة بتستغلوا مساجد الله لأغراضكم الدنية في زول قال ليكم حاجة .. واسي لما بقت أحد الوسائل التي يرفض بها عباد الله الظلم بقت أستغلال.. طيب أنتو زعلانين مالكم .. ما دام هجرتوها وخشيتوا السوق، وبقيتوا تأكلوا أموال المساكين والفقراء وأبناء السبيل .. على كل حال المساجد مساجد الله ... شوف عليك الله يدخلها المعارضون عراءة النفوس لا يملكون شئً غير تهليلات وتكبيرات .. وهم بوجهوا الشرطة والأمن عشان يضربوا بمبان في المساجد .. من الذي يستغل المساجد .. يا دكتور بدرالدين.. (5) قصة الحساب بالثانية القائمة فيها شركات الإتصالات.. أقترح أن نحولها للحكومة وأن نحاسبها بالثانية طيلة 23 سنة التي قضتها في الحكم .. عشان نكون متسقين مع الحالة .. وتساعدنا الشركات دي بالكشف عن حساب أفراد الحكومة الذي يمتلكون خطوط عندها .. لانها دي برضو بتدخل في الحساب بالثانية .. (6) د. بدر الدين أمين إعلام المؤتمر الوطني في تصريح صحفي ::: ربيع عبد العاطي .. لا يمثلنا ... بمثل منو يا أخوي ... تعريفوا المستشار الإعلامي للحزب الحاكم ... انتو بتمثلوا وين ... في مسرح البقعة .. وهو في المسرح القومي ... اهلنا بقول ليك الشيييييييييييييييينة منكورة ... (7) كرتونة الطماطم = 180 ج – الكيلو =12 ج . جوال البطاطس = 130 جنيه . شوال العجور = 130 جنيه . صفيحة البامية = 45 جنيه كيلو الضان = 32 جنيه طبق البيض = 18 جنيه الراجل منو البشتري الحاجات دي ... إلا يكون متوسط دخلو في الشهر (1800) دولار. (8) تستحق جامعة الخرطوم للكتابة بشكل يومي وتحتاج كذلك إلى التوثيق لنضالها الذي تتصدى فيه لعصابات الحكومة، من أمن وشرطة وموالين للنظام ، فهي تقدم أروع دروس الوطنية في تفاعل رهيب مع ماضيها في مقارعة أنظمة الفساد الديكتاتورية، فحقاً كانوا أفذاذاً في نضالهم ضد الطغيان.. فقط لأنهم طلاب جامعة الخرطوم . موقف بايخ جداً : دخول الأمنجية إلى داخليات الطالبات بجامعة الخرطوم ... في إنتهاك صريح للحرمات .. لماذا نسكت عن هذا الإجرام .. موقف بائخ .. اكتر من الفات: قصة " يعدون على أصابع اليد " داير اعرف اليد دي فيها كم أصبع ...
