نار هادئة عاطل ام معطل احمد مامون [email protected] لقب ( عاطل ) عندما يطلق علي من نال تاهيلآ اكاديميآ وادي الواجب الوطني علي اكمل وجه (واكتر كمان ).. تعد اجحافآ فظيعآ في حق شباب ينتظر ان يرتقي الوطن علي اكتافه ... من يحمل شهاده جامعيه او فوق ذلك ولديه حس وطني يكفي لرقعه ثلاثه دول ..هل يجوز ان نقول له يا عاطل ؟! الصحيح لغويآ معطل ( بضم الميم ) بل هو اهم عطل ينبغي علي المسؤلين معالجته دونآ عن باقي الاعطال لان ما يخلفه هذا العطل من الصعب معالجته .. هنالك من يصبح عقله في ثلاجه (المخدرات) .. وهنالك من يبحث عن نفسه في غرفه مظلمه (قاعد في بيتو) بعد ان ارهقه البحث عن وظيفه في كل المؤسسات الحكوميه والخاصه ، اليس كل هذه اعطال ! زمان كان بقولوا شريحه الشباب الان اصبحت شريحه بشريحتين شريحه عامله ومفعله ومتحكمه .. وشريحه محكوم عليها بالعطاله (شريحه المنشار) المقصود بالمنشار يعني الواحد لو (جازف ) شغل خاص (تحويل رصيد) اي بدعم مادي من الاقارب والاهل حتواجهوا مشكله الضرائب والمحليه والكهرباء والايجار .. تلمها يمين ياخدها شمال ) اكيد ح تريح البال انت سوداني ( مع العطاله اكيد ح تريح بالك فلسه عامه للجيوب الاماميه والخلفيه الركون لحاله من تفويض الحركه (العمليه) والمعطل يكون في حاله (زهجيه) غريبه طول اليوم زهجان وقرفان وما طايق زول .. ويتمني انو ينوم عشان (ينسي الهموم ) .. والغريبه في النوم برضو يحلم انو زهجان وقرفان وما طايق نفسو ذاتها .. يعني الحقيقه و الحلم عندو واحد !! كل شاب كانت امنيتو يلقي وظيفه (محترمه) عشان يقدر يتزوج ويعيش حياه سعيده .. الوضع اختلف والاماني اتغيرت .. الشاب (العاقل) بقي يفتش عن عروس محترمه ماديآ عشان من وراها يلقي شغل وطبعآ ( الما عاقل) يكون نسي عقلوا في الثلاجه (السجم) و (كنصل) حكايه الشغل والعرس .. شراره : ارفع راسك انت معطل وليس عاطل
