[email protected] حبوبه حجينا تجر البمبر و ذي وردة نشكل حبوبه تصنقع ترفرف عويناتها و ببسمة عريضة تحكي تقول حجيتكم ما بجيتكم خيرا جانا و خيرا جاكم في سألف العصر و الآوان كان في سلطان حكم السودان كان راجل طيب و زين و ما سجمان قصرو قطية بالرملة مفروشة ما فيلا افرنجية في كافوري مبنية كرسيهو برش من سعف نخيلنا صنع ما كرسي امريكي مستورد سريرو عنقريب هبابي من حطب غاباتنا صنع ما سرير بريطاني مستورد حديقتو راكوابه ما ورود ياسمين من باريس بتستورد حرسو معذاية ديك و دجاج ما بودي جارد في بلد الموساد ادرب ................................ كان راجل طيب و زين و ما سجمان ما كان بنتظر الناس تتلم تجيهو شأن بالحاله المره تشكيلو كان من بيت لبيت لافي يكوس يسأل عن حال الناس و هل في من بات جعان أو عريان أو مظلوم لافي يكوس لا محروس بحرس و جيوش لا في عربية التاتشر راكب يلوح بعصاتو تلويحة تقول : (هذه العصا في قفا كل من عصی) ............................. كان راجل طيب و زين و ما سجمان ما شمينا في عهدو ريحة البمبان و لا شفنا العسكر بضرب بعصاتو و طلقاتو النارية زول زهجان او قرفان و لا سمعنا بزولا مات من تعذيب السلطان و لا كان في سجون و بيوت اشباح و لا مسجون و لا مظلوم و لا مقهور ......................... كان راجل طيب و زين و ما سجمان و كانوا الناس زينين و بالحق ليهو مجاهرين ما مندسين أو متخاذلين أو خائفين .............. أنا من نص الوردة قمت صرخت يا حبوبه أنا من قمت بعرف أنو الريس لازم يسكن في قصور و يكمل دينو الناقص بي اربعه نسوان من احلي الحروم و أنو الريس زول شبعان من كرشو الكبرت بحق الحرام حاميهو المرقه علي الشعب الجعان و أنو الريس من غير العسكر حرمانه عليهو الطله علي الشعب القرفان و أنو العسكر لازم يقتل يضرب يقهر كل زول مظلوم في شأن حقو يحوم في شوارع الله الواسعة و ما يندسها و أنو........ و أنو........ و أنو........ يا حبوبه احكي حكاية فاطنه السمحة و الغول فهذا عهد السلطان الغول عفيف الدين 11/12/2012 https://www.facebook.com/afeifaldeen.modwi
