اولا رسالة للسيد / موسى محمد أحمد شغال باقي ليا مساعد لريس الجمهورية ايها البجاوي البطل ( كسير تلج ) نخاطبكم من داخل الاحراش البجاوية من بلدكم التي نشاتم فيها وترعرتم كل زول في الكون دة عندو دور معين بيقوم بيهو ونفسي اعرف موسى دة بشاورو في شنو ؟ المهم ما علينا ونعود لي نص الخطاب بتاعي اها يا موسى او يا سعادة المساعد انا واحد من ابناء البجا وما تقولي وطن واحد ومافي عنصرية والحنك دة وانا يا سعادة رئيس البجا عاوز ابقى تمساح او تميسيح في شلتكم العامرة والداخلة الجنة انشالله يعني مساعد لمساعد ريس البلد المهم عاوز مكتب فاخر وسكرتيرة حلوة ( ودي اهم حاجة بالواضح كدة ) ومرتب معقول يعني خمسمية الف مافي مشكلة بس نجي للمهم عاوز اكون مساعدك لعمليات اعمار الشرق بتاع الكويتيين دة ( انشالله فيزا حرة بتاعت سائق للكويت) وعاوز ابقي مساعدك لمساعدة تعلية خزان المدينة الرياضية ( خزان الروصيرص من اختصاص قبيلة نيلية تانية ما حقنا يعني ) وعاوز بيت في الخرطوم وعاوز غفير وعاوز يا سعادتك لامن ادور الصباح يكون في عربيتي علم ( أي علم يا اخوانا ) انشالله علم الدين حامد زاتو وداير ناس المرور وبتاع الموتر يدور قدامي عشان في كبري المك نمر ما يكون في زول ماشي بالنسبة للبدلات وزي ما عارف انو كلو من اموال الجماعة مافي مشكلة بدل لبس ما ضروري بدل زمة ( وهو في زمة زاتو ) ما ضروري بس يا السيد المساعد ارجو ان تدي مساعدك ( مساعد ياي ) بدل مامورية لانو شغلنا كلو في الخرطوم مع البلويت ( كلمة بجاوية تعني الافراد غير البجا ) وعاوز بدل كسير تلج لانو لوح التلج بقى بي شي وشوية وعاوز بدل ريحة لانو انفي اونخرتي بالعربي كدة شامة روايح الله يعزك وعاوز وعاوز ............ اقول ليك الشغلانة مش راس مالا طلقتين في اسمرة وبعدين ادريس مفاوضات وبعدين صندوق اعمار وكدة .....ارتريا جاكي زول بالمناسبة ما هي اخبار المدينة الرياضية تانيا رسالة لاخ باراك اوباما يا جماعة ما تستغربو وتفتحو خشومكم كدة العبد لله صحي زول مجنتر لكن ما للدرجة دي كمان المهم يا ود اوباما قالو السودانيين انو اصولك كينية وانا بجاوي افريقي يعني ممكن نتلاقي في الجد العشرمية وكدة لذا عليكي اتجاهي واجبات ومسئوليات يسالك منها الله وهي باختصار انو ياخي نحن اتاكدنا بما لا يدع مجالا للشك انو حيكومتنا دي حتسلما لنبي الله المسيح عيسى ابن مريم او المسيح الدجال ايهما اقرب المهم انا لا ادعوك لضرب مصنع اليرموك ولا الحنك الانت سعادتك ما فاضي ليهو بتاع الجماعة دة بس يا ود عمي العزيز كل الحنك عاوز كرين قارد لبلدكم يعني سياحة وزوغة وكدة وما بقدر اديك معلومات عن جوازي لانو الجماعة صلاح قوش زاتو قبضوهو تقول ليا CIA يعني يا عمك انا كاتب ايميلي ممكن ترسل فيهو واذا لقيتو خارج الشبكة حاول الاتصال مرة اخري لانو احتمال ابقى وزير ولا والي ولا حاجة كدة يسكتونيي بيها عموما ما تاكل هم جاييكم جاييكم تالتا رسالة لمولاى خادم الشريفين الملك عبد الله : والله الليلة رسائل لاعمامكم الكبار زاتو مالي ومال الشعب والحمام الميت خلونا في اللحم الحي مولاى خادم الحرمين عارفك ما فاضي ليا لانو مزحوم في حربك مع بشار الله يعينكم ( لو عاوزين انتحارييين نحن جاهزين بس نقبط الربط اول) وما تفهمني غلط يا مولانا تقول هاذا السوداني يبقي اقامة ولا عمل ، دي يا مولانا راس مالا عمرة وزوغة وكدة خلينا في المهم عاوز اسالك سوال انت شرق السودان دة سمعت بيو؟ ممكن تسال سعادتك السعوديين البيجو يصطادو الغزلان من هنا بدوك الخبر ، المهم في حتة غرب جدة بعد ما تقطع البحر اسما بورسودان وهي تابعة بالرجالة كدة للسودان واكون معاك واضح مافيها بترول ولا منجنيز زاتو ، طيب حتقول ليا اها ايش تبقون ؟ اقول ليك انت المملكة دي يعني بس جا البحر وفرملت وحتى البحر زاتو بيحب الزيادة كدة فكر فيها وسيبك من حلب سوريا ديل وبالمناسبة ما تخاف لافي حرب ولا طلقة واحدة زاتو ( اسال اشقائنا المصريين في حلايب )( واسال اخوانا في النضال في الفشقة ) اها حتقولي يا زول انا حاستفيد من ولايتكم دي شنو اقول الفايدة مذدوجة انت حتلاقي شعب طيب عاطل عن العمل جاهز لتنفيذ توجيهاتكم وتاخدو فينا اجر كمان اما نحن عووووووووووك اول حاجة عمرة وحج بلاش وتاني هام الجماعة بتوعين الخرطوم ما بيقطعو العقية الا بي تاشيرة وكدة وتالت حاجة نضرب معاكم البترول دة واهم حاجة نخش في دعوة ابوكم سيدنا ابراهيم ملحوظة : توجد لدينا وظائف شاغرة طباخين وسواقين وعمال في محافظة الغربية – مدينة بورت السعودية للتقديم الرجاء الاتصال ابي على جوالي الما تشمو ريحتو التقديم في القنصلية السعودية فرع بورت السعودية وشكرا اخوكم ابو اوهاج الحربي mohammed musa [[email protected]