الحكومه قالت بتثمن دور حزب الامه في الحوار الوطني وقالت كمان مادايراهم ينسحبو منه لانهم مكون اصيل فيه. بس رئيس الحزب مقبوض ومتهم بي حاجات ممكن تلف حبل المشنقه في رقبته بسهوله والانصار فايرين عديل كده. يبقي التثمين فايدته شنو؟ سيبك من حزب الامه وفوران الانصار, المعارضه ذاته الاتفقت مع الحكومه علي الحوار من يناير الفات وكانت بتجهز في نفسها ليه, قبل يومين بس من اعتقال الامام, وعشان توري جديتها اعلنت مرشحيها في لجنه الحوار والامام شخصيا علي راس القائمه, معقول تشطب اسمه وتكتب اسم تاني بالسهوله دي؟ الغريبه المؤتمر الوطني كان فرحان جدا بمرشحي المعارضه واعلن طوالي بمجرد اجتماعهم, حايتنازل من اي شئ ليه علاقه بالموضوع دا. يعني يفترض مع اول اجتماع للجنه (الفيها الصادق المهدي) يكون ملف الحوار بالكامل تحت تصرفه بدون تدخل من اي جهه. ودا معناه اللجنه حره في وضع اجندتها بالطريقه البتريحه. الحكومه عشان كمان تمشي خطوه اسرع قالت اي حزب ماينضمه للحوار لغايه 29 من الشهر الجاي, القطر حايفوته ومافي انتظار اكتر من كده لغايه هنا والاخبار حلوه ومطمنه. بس فجاه ورغم الطابع الحواري للجو العام قامت الحكومه قبضت الصادق المهدي. بالخطوه المفاجاه دي نحنا والمعارضه والعالم كلو الكنا مستنين بداية الحوار حصل لينا هبوط مفاجئ وبدت مئات الاسئله تظهر. هل دا معناه اللجنه حاتبتدي من غير الامام وحايتغير اسمها لي لجنة ال 13 بدل ال14 بامرالمؤتمر الوطني؟ دي مشكله كبيره الا اذا استطاعت الحكومه اقناع المعارضه بسحب اسم الامام وتجيب اسم غيره. دي من سابع المستحيلات لانو المعارضه اصلا بتفتش لي فرصه تعضي الحكومه دي في راسا وماحاتقبل تغير اسمو لانو طبيعه الحوار بتديها الحق تختار ممثليها بدون تدخل من اي جهه عشان كده ماوارد تناقش الموضوع دا خصوصا الشخص المعني الصادق المهدي بي كارزمتو وصلابة ووزن حزبه. الحل التاني, الحكومه ماتقبل بالصادق ودا حاينسف الحوار لانو المعارضه حاترفض الحل دا حتي لو الحوار اتنسف. الحل الوسط المتوقع طبعا الاتنين يوافقو علي مشاركة الصادق من داخل السجن. بس هل ناس حزب الامه حايوافقو علي الحل دا؟ الملاحظ انو موقف حزب الامه بالنسبه للكيزان إتغير من حاله كانت عاجباهم لي نقيضه تماما. وبمرور الايام الموضوع دا حايرفع ضغطهم بالتاكيد حتي لو ورونا عكس كده. الملاحظه التانيه ناس التلفزيون اليومين ديل تقاريرهم عن حزب الامه بقت شامله وطويله لمن (امنا ذاتو). بس هل دا بخلي حزب عملاق زي حزب الامه يشارك في حوار ورئيسه رهن الاعتقال؟ اشك في ذلك. والكيزان عارفين كده كويس جدا. المصيبه لو المؤتمرجيه إتقدمو بي اقتراح لي ناس الامه يرشحو زول تاني غير الامام لمواصلة الحوار. غايتو لو عملو كده يكون فعلا عالم الكيزان عالم جميل ونكون نحنا الدراويش الخلينا الناس ديل يحكمونا الزمن دا كله. غايتو لو منتظرين حوار واطاتكم اصبحت. و ناس المؤتمر الوطني ماعندهم مزاج اليومين دي لي حوار وطني ولا غيرو لانو حكايه ملفات الفساد دي تاعباهم شويه. والظاهركل الحركات الكان بعملو فيها الفتره الفاتت دي كانت مضيعه للزمن ساي. حزب الامه علق الحوار وماحايتراجع. المعارضه ماحاتغير الصادق المهدي بي شخصيه تانيه حتي لو زادو ليهم العدد في لجنه الحوار, والكيزان كمان ماحايطلقو سراحه لانهم عودونا علي اتخاذ قرارات دون التراجع منها ونيفاشا دليل علي ذلك. المهم الميدان مسخن جدا والمعارضه مبسوطه وحزب الامه سالي سيفو وافتكر ناس المؤتمر الوطني اكلو نيم. Follow me in twitter@elrazi_elrazi [email protected]