سادتى لا باس ان تكون كلماتنا احيانا (لكمات) واحيانا اخرى (كدمات ) و احيانا اخرى قد تكون (ضحكات) في زمن عزت فيه اسباب الضحك!! فهذا (سيناريو) وان كان هزلى الا انه يمثل واقع حياتنا ومؤلمات تفاصيل حقائقها.. اقرؤوا معى سادتى سيناريو (زمن للبيع) و (استطلاعات عمله) وليسعد النطقُ ان لم يسعد الحال !!! زمن للبيع وكده !!! رايت فيما يرى النائم ان الشعب قد قام بخلع ال25 سنه الماضيه من عمر السودان وقرر بيعها في السوق العالميه وتوزيع عائد البيع كتعويضات معنويه للشعب وكده !! خمسه من الدول الكبرى رفضت رفض تام تشتري الزمن ده .كدي النشوف سبب الرفض ده شنو ؟؟؟ (1)_ امريكا :- عصابات الكيزومافيا الموجوده في الزمن ده بتلحق المؤسسات والاقتصاد الامريكي امات طه !! (2)_ المملكه المتحده : هذا زمن دون وابن غير شرعى كمان لعلاقه مشبوهه بين العسكريه والحزب لا يلائم البلاط الملكي !! (3)__ فرنسا : رائحة الفساد في هذا الزمن تزكم الانوف تعجز ارقى البرفانات الفرنسيه عن تعطيره !! (4)_ ايطاليا : زمن يعاني من امراض سوء التغذيه بصوره مفرطه نتيجه للجوع والفقر المزمن , تعجز اجدع المطاعم الايطاليه مجتمعه عن اشباعه ومعالجته حتى لو تم استخدام كل المخزون الاستراتيجي من البيتزا الايطاليه !! (5)_ المانيا : زمن موديل كنكشه بيتشي محظور من الفلوكس فاجن الوطنيه !! واخيرا (الصين) ابدت موافقه فوريه وترحيب شديد بشراء ال24 سنه وقالت : انا امك يا تايوان زمن مغشوش من اوله لاخره ! حرم كمية غش ذي دي الا يكون made in chaina ! وصحيت من النوم وانا اردد made in chaina , made in chaina , made in chaina !! استطلاعات عمله وكده !!! بمناسبة الكميه المهوله من الاموال التي يتم (نهبها) و (اختلاسها ) و (تجنيبها ) ووووو قررنا نجري استطلاع وسط المسؤولين ما عشان نسالهم وين قروشنا ؟؟ حاشا وكلا ! ولكن عشان نعرف منهم انواع العملات التى يفضلونها في البيزنس بتاعهم ! وكذلك نعرف منهم انواع العملات التى تتكون منها (حساباتهم المصرفيه) !! من نتيجة الاستطلاع وجدنا انه المسؤوليين انقسموا الي ثلاث مجموعات .كدي النشوف المجموعات دي شنو ؟؟؟ (1)_ المجموعه الاولى قالت انها بتعشق (الدولار) والاخضر رمز الدولار والمكنه ذاتها البتطبع الدولار ! وقالوا انهم ما بيتنازلوا عن الدولار في حساباتهم ابدا مهما يكون ! وطلبوا اغنية (لمحتك وقلت بر آمن وبديت احلم ) واهدوها للدولار !! (2)_ المجموعه التانيه قالت انها بتهوى (اليورو) وامان اليورو , وبتحي كل الدول الاتحدت وغيرت عملتها لليورو كمان !! وطلبوا اغنية (عجبوني الليله جو .. سرقوا البلد نهبوا .. عجبوني اولاد الكيزان .. لبسوا البدل والقمصان .. سحبوا اليورو بالكيمان لمن فلست خزنة السودان ) !! (3)_ المجموعه التالته قالت انها بتعشق (الاسترليني) واستقراطية الاسترليني و فكة الاسترليني ذاتها كمان !! وطلبوا اغنية (استرليني يامطر الرشاش الجنيه ياكده يابلاش ) !!! اما بالنسبه للعمله الخليجيه (ريال _ درهم _ دينار ) فقد اكد جميع المسؤولون ان العمله الخليجيه عمله( للاغراض المنزليه) البحته ولا تدخل في عملياتهم البيزنسيه وان الكوز الحر لا يخلط الريال بالدولار !! وفي ختام الاستطلاع سالنا جميع المسؤوليين طيب وين العمله الوطنيه من حبكم ؟؟ وين الجنيه السوداني من البيزنس بتاعكم ؟؟!! فرد جميع المسؤوليين بلسان (شيخ) واحد : : تبا لكي انستبدل الذي هو خير بالذي هو ادنى ؟؟؟؟!!!!!!!!!!!! موده عزالدين... [email protected]