وهذا سيناريو ساخر اخر (لفقرات تلفزيون حكومى ) . لا يحتاج الي تركيب (ايريال) في راس مقدمته لكي يصفِي نيته فيما يهدف اليه ويرغب فيه !!! فاشارة البحث في هذا السيناريو قوية جدا تخبر الكل بان رغباتى في الدنيا قليله .... فقط وطن يتسع لاحلامى لا يحكمنا فيه نظام كل شريف فيه حرامي !!! نشرة الاخبار.... بمناسبة زيادة الاجور (المزعمه) فقد تم تقسيم الماهيه الي خشم بيوت ولكل بيت مانوى ! وكما تدركون ايها الساده المشاهدون فان كل ماهيه و ليها (كيال ) وكده!! وفيما يلي اقسام الماهيه حسب الميزانيه الجديده ... (1) الماهيه العفريته :-- تذهب الي حسابات غير (مرئيه) الا لصاحبها وتصرف بطريقه لا يجيدها الا (عفريت حكومي ) !! (2)__ ماهية( 555) ماركة مليون او مليار ! حسب نوع الكولونيا ! اقصد المناسبه ودى ماهية (مسؤول) من فئة الرد الرد (كباري وسد ) !!! (3) __ماهية اكل العيش بحب الخفيه :-- ودي ماهيه صغار (الكوادر ) الشبابيه !!! (4)__ماهية السيع صنايع والبخت ضائع ! ودي ماهية( طلاب ) الالزاميه !!! (5)__ ماهية امشي (جنب الحيط ) وابعد عن المحمر والمشمر وغنيلو !! ولو لزم الامر امشي جوه الحيط ذاته ودي ماهيه (المعذبون ) اقصد (الموظفون ) في الارض !!! (6)___ ماهية (مات الكلام ) و ح تحصلوا لو مادفعت الدين العليك اسه ناو ودي ماهية (العمال ) !!! وسلام مربع (لاتحاد عمال) طلع اي كلااااام !!!!!!!! النشرة الجويه ....حالة الطقس حالة لا تسر عدو ولا حبيب حالة تغم النفس و قوانين محاربة فساد (مخرومه) تخر علي (قفاه )البلد !! ( 1 ) __ ارتفاع حاد في سعر ( الدولار ) ادي الي انصهار (الجنيه ) و(تحلله) من قيمته تماما !! و نتج عنه ارتفاع (جنونى ) في درجة حرارة (الاسعار) ادت الي نشاط (رياح )الفقر والجوع (الشعبي ) وتحولها الي رياح (دائمه) غير (مؤسميه ) !!! (2) __ علي الصعيد الجامعى يسود طقس (ظلم وبؤس) واعتداءت (جائرة) من فلول طلاب (المؤتمر الوطنى ) يؤثر علي طلاب جامعة الخرطوم ويؤدي الي تلبد السماء بالاعتقلات مع احتمال سقوط شهداء نتيجة للرصاص المنهمر علي الجامعه !!! (3)_ فساد وتجنيب و وفقه ضروره وجوديه و تحلل من سرقة المال العام يسود كل المرافق الحكوميه شتاءا وصيفا !!! و في نهاية النشره نتوقع هبوب (رياح شعبيه) تقضى علي الحراميه والمجرمين واكلي اموال الشعب وترطب حرارة (الفساد) وتطهر الحياه !!! الفقره الاعلانيه .... يعلن البرلمان عن فتح باب الترشيح عبر الدوائر الولائيه لشغل وظيفة نائب برلمانى وذلك حسب الشروط الاتيه ... 1_ ان يقوم النائب بجمع غنائمه السياسيه من دائرة تريشحه ثم يفارقها فراق الطريفي لجمله . 2_ ان يلعب دوما دور الكومبارس السياسي لكل مسرحيه حكوميه تعرض علي مسرح الدوله ولا يفكر بدور (بطوله) ولو حتى في (الحلم ) !! 3_ يريق كبريائه وهيبته تحت اقدام (السلطه) عسى ان تشمله بنظرة رضى ويؤيدها دوما (بيده) و(لسانه) و(قلبه) ويثنى عليها (بشده و بجنون) وحتى (ساده) !!! 4_لا يدوم مفعول الاسف لديه فترة طويله علي حال المواطن المكدوح فيقوم بايقاد اصابعه ال10 تبرير لاي زيادات ثم يبصم (بلسانه) حتى (لقاليقو )موافقا عليها !!! 5_ شعاره دوما امشي جنب حيط ( التجاهل ) و ابعد عن المسائلات البرلمانيه لاي وزير او مسؤول هي الوظيفه (بعزقه) !!! علي كل من يأنس في نفسه الكفاءة ان يتقدم باوراق ترشحه فورا !!!. المسلسل اليومي (بارانويا وسواس قهري زهج قلق وكده) !!! قالوا الجماعه جابو ليهم فكي يعالج ليهم حالات الزهج والقلق والوسواس القهري والبارانويا الانتشرت وسط عدد من القاده والوزراء والولاه والمسؤوليين .مع اول خمس بواكي الفكي عرف الداء وهواء وصف الدواء وقال الجماعه ديل اصابتهم :----- (1) __ عين (دوليه حاااااااااره) اصابت بيزنيس المسؤوليين بالتقشف المالي والتشفير الحسابي في اوربا ! واداهم علاج يزيل التقشف البزنسي ويخلي الارصده نازله في مصارف (كوالالمبور ) ذاتها !!!!!! (2)__ عين عزابه (حاسده) ! اصابت كل مسؤول في عصمته زوجه رابعه !! وقال لازم كل مسؤول يقرؤا ليه بالفقرا عشان من عين العزابه يبرأ سيادته جاب الرابعه قمرا قيامه وقايمه نار حمرا !!!! (3)__ الفكي عاين كدددده وقال القاده ديل عاملين ليهم عمليين واحد (مدفون) في لاهاي جنب عتبة (المحكمه) بيتجدد مع كل سفريه خارجيه لدوله الضمانات البتقدمه ما 100% !!! والعمل التاني (مرسل ) عامله فلاتى نيجيري كما دعاء السفر والمعوذتين السودان كان تاني (يشمو قدحه ) جوه المحكمه !!! الجماعه كووووولهم بلسان رجل واحد قالوا ليه والحل شنوووووو؟؟؟؟؟!!! الفكي قال ليهم الحل حاجتين ما عندهم تالت ! اول حاجه تعملوا حجامه في 25 موضع عشان (سحر السلطه ) ده يبطل من قلوبكم !! والحاجه التانيه كراسي الحكم (المصبوبين ) فيها دي تقوموا منها تقوم قيامتكم وتسلموها الشعب بعد تغسلوها (بالتراب) السففتو الناس سبع مرات عشان تزيلوا منها الرجس ! وكما عملتوا كده (نيهاو ) بالغلط ماداير اسمعها منكم !!!!!!!!! موده عزالدين.. [email protected]
