يا مشير .. لو تبقى حاوي.. أو جيتنا بالإنكار تلاوي .. كيف تنفي موفور البلاوي.. يوم قلت لا عمولات لا رشاوي.. دي غايتو من بيت الكلاوي .. *** طيب الجوك زمان عريانين .. حفايا .. لا قرش لاعمة لا شال لا ملايه .. غشونا بي تكبيرتين .. وآيه .. وختفو عطاز العمايه .. و قامو ناطين في الحكايه.. والليلة مالكين كم بنايه.. أوليس هذا دليل كفايه .. *** وتعالى شوف أهل النظام.. كيف عاثو في ظلم العوام .. القابعين خلف الالام.. وحيث الكلام جاب الكلام .. حبينا نسال باحترام .. قول لينا يا قايد الانام .. من أين للست المدام .. التانية .. بس قول لينا كيف.. سر قصرها العالي المنيف.. من بعدِ هجرها للجريف .. بعد إحتساب ذاك العنيف .. وقد مات فقير معدم عفيف .. *** ياالعين رضاك في العيب كليله .. لانو من غشوك هم دليله .. ما خلو قط للحق وسيله .. وبالله بس لو طفت ليله .. ناحية بيوت عادمة البليله.. وفي الدنيا ما عاد ليها حيله.. وكيف عايشة بالإحباط ذليله *** كان تشوف وجع العباد .. الهايمة في طرف البلاد .. ما لاقية حتى عضم جراد .. ناهيك عن لحم الجداد .. والعتمة في عيونهم حداد.. وما سمعت يا ريس العباد .. بالكانزين خير البلاد .. خارج حدود أرض الجهاد .. لي يوم يكون حالك سواد .. ويبقى الخلاص هوّ البعاد .. *** فساد جماعتك شائع هواء .. أعيا الحكيم وغلب الدواء .. وهل في بلادنا الناس سواء.. عايشين في نفس المستوى .. أم صاروا مابين عطشان هوى .. أو كوز من الزير إرتوى .. ومسكين من الهم إكتوى .. ومصران من الجوع قد عوى .. ومترف بهموم الغير ما لوى .. *** لو كنت منصف وجد زعيم .. ومسكت في درب الكريم .. كان جبت من سرقو النعيم .. في ساحة العدل السليم .. وبقيت رئيس للناس عموم .. وما يهمك البزعل يلوم .. حيث الحكم ما راح يدوم .. ودي الآخرة فيها جنس سموم.. لكلِ حاكم كان ظلوم .. *** يا مشير .. لو تبقى حاوي.. أو جيتنا بالإنكار تلاوي .. كيف تنفي موفور البلاوي.. يوم قلت لا عمولات لا رشاوي.. دي غايتو من بيت الكلاوي .. *** 4/7/2015 [email protected]