د.محمد عبد الله الريح: حسّاس محمد حسّاس ناس تكشر.. وناس تبشر.. ناس تثرثر.. وناس تأشر.. ناس تشخر. وناس تحمر.. ناس تمرر.. وناس تهجر.. ناس تكفر.. وناس تتدستر.. ناس تطرشق.. وناس تبنشر.. ٭٭ ناس ملافح.. وناس عباية.. وناس بتسكن في السراية.. وناس غلابة بدون قراية.. وناس حفايا.. وناس عرايا.. وناس هي ماشة.. وناس هي جاية.. وناس قبيل عرفوا الحكاية.. وقدروا يوصلوا للنهاية.. ٭٭ واللي قاعد في الرصيف.. كل همو يجي الخريف.. إلا ما يزيدوا الرغيف.. والموية ما تشيل الصريف ٭٭ ناس ورا.. ناس بتنده في أبشرا.. لو يكون راجل مرة.. برضو ينفع في الضرا.. ناس هلم.. وناس جرا.. قنطروهم قنطرة.. كيف بيعملوا يا تري؟ قاسوا الكلام بالمسطرة.. لقوها ساكت مسخرة ٭٭ ناس هي مفلوتة وتشاكل.. وعاملة لينا جنس مشاكل.. والمحرش ما بكاتل.. وناس هناك في البيت تمارس.. لعبة الفار والكديسة.. والكديسة كلاما ماشي وأصلو ما مردود حديثا و لما ترجع للمكاتب.. تبدأتبحث عن فريسة ٭٭ ناس بجوة.. وناس ببرة.. قاعدة بس تعمل مضرة من زمان أدوها شرة حالة صعبة ومستمرة ٭٭ ناس بتزحم في الزحام.. والنشل مظبوط تمام.. وناس هي عايرة بدون لجام.. وناس بتشرح دون كلام أصلو الكلام بيجيب كلام والناس بيسرحوا في الكلام ٭٭ ناس تركب في الزرارة.. وناس بتبحث عن وزارة.. قاموا شالوا البندقية وولعوا مليون شرارة ٭٭ ناس شمارات.. ناس سفاسف ناس بتبحث عن مواقف ناس تدقدق في الرفارف وناس بتشحد.. حالا واقف ٭٭ ناس تفتش للزبادي.. الكان هنا وأصبح بغادي.. ولا حياة لمن تنادي ٭٭ الجميع في جوة غابة.. والبعيد عايز حرابة وسوبا راجياها الخرابة مين بيشعر بالغلابة؟ ٭٭ وإنت بس قول يا لطيف.. لما الأمل يصبح ضعيف.. أصلو الهدم لو جابدوهو ينقطع في محل رهيف ٭٭ غايتو يا أخوي خلي بالك.. أقعد بعيد وأمشي في حالك.. وشوف حتعمل فيها إيه.. لما ترجع لأم عيالك
