بسم الله الرحمن الرحيم (1) قلق منام الناس سؤال داير في آفاق المحال أنه النظام كان راح في ستين.. وتشيعه اللعنات وزال منو البديل ..دا المستحيل.. وعشان كده..لوكو الصبر.. شان تستقر للدولة حال خلونا نرضى بأي حال لا ثورة لا عصيان .. ولا حتى اعتصام.. يمكن يبلغنا المنال والله عال..والله عال..والله عال !! كدا بالرواقة نفكفك أصحاب السؤال (2) خلونا مع اول صنوف الاحتمال وارد تكون..لا بل اكيد.. أنك من أنصار النظام شغال تخذل فينا بي هذا الكلام في الحالة دي..نحنا بنعيد ليك السؤال.. أها بشه قال..إما الزيادات .. أو كمان الدولة تمشي على الزوال!! والله عال ..والله عال..والله عال !! دايرنا بين نارين نعيش..شان االنظام.. حار بيهو في الآخر دليل..؟ فقد البدايل ..ولسه ماسك في ضروع الدولة.. بالتمكين .. بإسم الدين يواصل الإحتيال؟ دي قديمة والعب غيرا يا ود الحلال ما فينا قمبور.. اتلهي.. وارجانا يوم الغضبة ..داك يوم النضال يوم النساء الثائرات ..يوم الصناديد الرجال (3) وارد تكون..وكمان أكيد من بيننا...شايل همنا ..وكاره النظام خوفك على البلد الجميل .. خلاك تعيش رعب المآل تلقى المخرب في ديارك صال وجال لا رؤية تظهر في الأفق.. واحزاب تعود شايلة الفشل.. صمنا وفطرنا على بصل.. ونكون تعبنا بلا نبدل فينا حال يا بتي..يا ولدي العزيز.. يا خوى .. نوضح ليك تعال واجابتي برضها بي سؤال ما شفت(كومنتات) (وبوستات) رشحت.. ما بين بروف.. ومثقفين.. او من ذوي اعمال ومال ؟ وسألت نفسك .. كيف ده في خاطرنا جال؟ صحصح معاي.. الثورة من جواها بتطلع قياداتا .. وتفرز في الحراك..اصلب معادن للرجال والنهر كان حبسه الجليد.. بنفك موجه و يوم يهيج..يكسح زمان الانحلال وكمان سؤال.. يوم كنت عارف قادة للشارع بلا ناس النظام؟ من قبل ما العصيان يزلزل عرشهم.. بقيادة غير..وثقافة غير..وامانة غير.. وبوعي غير..وتكاتف الغير في جلال ؟ ودع متاهات الحضيض.. يا صاحبي فُوق حلق مع الثوار..على قمم الشوامخ والجبال (4) أهو جينا للصنف الأخير ووصلنا للنوع الخطير في عدده باين هو الكتير خالف كراع فوق الكراع.. لا راضي بالاحزاب ولا حكم القشير لا بجيب حجارة ولا كمان.. حاول يجدع يوم ولا ممكن يشير والحكمة لو شاف القناديل لبنت تلقاهو سابق الناس يطير اهو ده الخطير ما فيهو خير.. لا قبل عصياننا بيفيد.. لا من كفاية شره من بعد القشير لو مرة ما رضى بالنصيب حيقول حليل حكم البشير لو كنت من ديل يا بشر حصل قطارات الشرف سيب الرصيف.. أو ترضى لي وطنك ضياع.. ويصيبو شرٌ مستطير معمر حسن محمد نور 13/ ديسمبر 2016 [email protected]
