كشف المخرج المصري عمرو سلامة، مخرج فيلم «أسماء»، أن أنف الفنانة التونسية هند صبري، الذي ظهرت به في هذا الفيلم، لم يكن طبيعيا. وقال سلامة، في تصريحات له: «في فيلم «أسماء»، كنت مصمم على إني أغير شكل الفنانة هند صبري اللي قامت بدور أسماء، الفيلم كان مستوحى من قصة سيدة حقيقية، وكانت الفكرة إني عايز أخلي الفيلم واقعي وحقيقي على قدر الإمكان، وعلشان كده كنت عايز أنسي الناس شوية إن دي هند صبري اللي هم عارفينها». وأضاف: «كنت عايز من هند موهبتها الخارقة في التمثيل، من غير شكلها المعروف للجميع، وعلى هذا الأساس أصريت نجيب واحدة من أفضل خبراء المكياج في العالم، اسمها «Jo Allen»، هي اللي عملت أفلام «Gladiator»، وهي اللي غيرت شكل نيكول كيدمان في فيلم «The Hours» وغيرت شكل هابيير بارديم في فيلم «Mar Adentro». وتابع: «طلبت منها تغيير أنف هند زي ما غيرت قبل كده أنف نيكول كيدمان، وعملت كده فعلا، لكن الحقيقة إن تقريبا ماحدش خالص في الكوكب خد باله، هند كانت بتقعد كل يوم قبل التصوير اكثر من ساعة علشان تعمل مكياج يخليها أكبر في السن وتحط الانف التركيب، طبعا لما ماحدش خد باله في الآخر، هند صبري ومحمد حفظي بالذات كانوا مش طايقني، طبعا مع اللوكيشن كله اللي كان قاعد مستني الانف». ثم وجه اعتذارا لهند ولفريق عمل الفيلم بقوله: «وأنا بستغل هذه الفرصة السعيدة علشان أشكرهم، وأعتذر لهم نص الاعتذار، لأن غرضي كان شريف والانف هي اللي طلعت نص كم». وقام بنشر فيديو للفنانة التونسية، وهي تقوم بخلع الانف الصناعية في كواليس الفيلم، وسط ضحكات الجميع.
