مشيت أمس الصباح لفرع بنك الجزيرة (فوري) بشارع إبن العميد تقاطع هارون الرشيد… البنك يفتح الساعة 9 صباحاً… موظفيهم راقين جداً جداً… من الباب من برَّة تقول لي حضرة الصُول (موظف الأمن) عاوز أفتح حساب فوري جديد.. وهُو بكل لطافة يوجهك للكاونتر المعني… الأوراق المطلوبة منك عشان فتح الحساب هي: 1/ أصل إقامتك 2/ العنوان الوطني – ممكن ورقة وممكن تطلعها ليهم من جوالك… 3/ رقم حساب ببنك الخرطوم العاوز تحول فيهُو المرة دي، الحساب الطويل المتكوِّن من 16 رقم.. 4/ تكون شايل المبلغ العاوز تحولو للسودان المرة دي بس كاش… يفتح ليك الحساب في أقل من خمسة دقائق.. يديك ورقتين واحدة بتاعت التحويل.. والتانية بتاعت بطاقة الصرَّاف.. تشكروا وتمشي على كاونتر الصرَّافين… تدِّيهم الورقتين ومبلغك العاوز تحولو.. يحول ليك المبلغ في لحظة ويديك سند بذلك *(أحفظ السند وسنداتك اللاحقة عشان تنفعك في برنامج حوافز بعدين)*.. وفي دقيقة واحدة يجيب ليك بطاقتك بتاعت الصرَّاف… تمشي للصراف الآلي بصُحبَة حضرة الصُول تفعِّل بطاقتك، تشكرهم وتبقى مارق… نجي لي مزايا بنك الجزيرة (فوري) شنو؟؟؟؟ أولاً: تعاملهم راقي جداً جداً.. ثانياً: رسوم التحويل رخيصة جداً مقارنةً بنوافذ التحاويل الأُخرى.. وهي كالآتي: رسوم المرة الأُولى الفوق دي = 25 ريال.. من هنا ولي قدام أي تحويل = 5 ريال فقط.. طيب في سؤال: كيف أنا أضيف المُستفيدين عندي عشان أحول ليهُم؟؟؟ تقوم بتحميل تطبيق الجزيرة اسمارت من GOOGLE PLAY.. وهناك تقدر تضيف أي رقم ببنك الخرطوم وتحول ليهُو مباشرة برسوم بسيطة جداً 5 ريال بس… سؤال تاني: الحوالة تصل في كم يوم؟؟؟ 24 ساعة بس وتصل حسابك ببنك الخرطوم.. آخر سؤال: كيف أنا أغذِّي حسابي في فوري دا؟؟؟ عن طريق بطاقة صرافك الآلي الأدُّوك ليها فوق ديك.. وعن طريق حوالات من بنك الجزيرة.. أي إستفسارات أُخرى نحن جاهزين… *ملحوظة مهمة:* حوالتي دي تمت عن طريق بنك الخرطوم شامل ضريبة التحويل ال 25 ريال الذكرتها ليكم فوق ديك: الريال = 97.30 جنيه
