تحصلت مصادر (من الغلاف للغلاف)...على مسودة اجتماعات مجلس اللوردات (لجنة التسيير)...وتوقعنا من باب (الخيال) ان ذلك هو ما تم في اجتماع مجلس المريخ. عشان بعدين ما تقعدوا تغالطوا فينا ساكت.
اللوردات ...قاعدين في الاجتماع ...كل واحد لابس ليه (بطاقة) مكتوب فيها اسمو ...واسم شركتو ..عشان الحكاية ما تتلخبط على جمال الوالي.
باقى الجماعة كتار ..(17) لورد ...ديل يفرزوهم كيف؟...عاملين كدا (زي الحرب العالمية التانية).
زي الصور الزمن ...(ابيض واسود)..ابوك ما بتعرفوا لاّ يوصفوا ليك.
بتاع (الفراخ)..بدأ الاجتماع ...دخل ليك طوالي في المفيد ...المختصر..اصلو زول (مزرعة الفراخ) ما عندو وقت يضيعو ساكت.
بتاع الفراخ ..حسب نظرتو ...قال والله يا جماعة ...(الفسحة) القدام نادي المريخ دا ...فيها (حلاة) مزرعة دواجن.
حاجة ما تخلص ...احسن شيء نعمل لينا (مزرعة دواجن)...قدام النادي ..عشان الفراخ وبيض الفراخ يكون قدام عيّنا.
بتاع الغاز ....الكلام دا ما عجبو ....قال يا جماعة ...(الفسحة) القدام النادي دا ..احسن مكان يكون فيها (محل غاز)...شارع العرضة كلو ما فيها (غاز)...نحن نستثمر الحكاية دي ...ونعمل لينا (محل غاز) قدام النادي ...على الاقل ممكن نستفيد في الحتة دي من مكسيم وسليمانو ..يحرسوا ليكم المحل ..ويعتلوا الانبوبات للزبائن.
لورد تاني ..قام وقال والله يا لوردات ...احسن نستفيد من الفسحة في (بوتيكات).
لورد اخر ...قال (بوتيكات) شنو كمان؟ ...البوتيكات دي بتجيب لينا (البنات)..والكلام ...وناس الجرايد ما بريحونا...نحن احسن نعملها (صوالين حلاقة).
صوالين الحلاقة دي ..اضمن استثمار.
اي لورد بفكر في نفسو...(خلوا المريخ).
جمال الوالي قال ليهم دا شنو الكلام الفارغ البتعملوا فيه دا...نحن لو عملنا لينا (صوالين حلاقة)...ناس بلة وناس موسى ديل بين الشوطين بمشوا يحلقوا ..ويرجعوا...لا ...لا الاستثمار دا ما بنفع.
في النهاية كدا ...(اللوردات)..قرروا يعملوا (ضريبة) على المسكول ...(دا نظرية بتاع الاتصالات).
بتعرفوه طبعا ..(قال ما بقرأ جرايد).
لو بتقرأ جرايد ..ما كنت بتخش اللجنة ...(زي بتوع البنوك).
يعني تاني اي واحد يمسكل ..يخصمو منو (قرش).
طبعا دا بالنسبة للمسكولات ...الرسائل والمكالمات دي ..نظامها براها ..بنجيها في يوم تاني.
اما بالنسبة للفراخ ...ح نعمل قانون جديد للفراخ ...يلزم اي (فرخة)..تبيض بيضتين في اليوم.
بيضة لصاحب المزرعة ..وبيضة لي (لجنة التسيير).
اي فرخة ما تبيض بيضتين في اليوم ...بتكون هذه الفرخة (معارضة).
اما انبوبات الغاز ...سوف يكون هناك (تخميسة) من اي انبوبة ...يخصم (كيلو غاز) لصالح شركة نادي المريخ.
الاجتماع ...انتهى ...على هذا النحو ..ورفعت التوصيات للوزير من اجل (تنفيذها). الاهداء
واقفين نتكلم.
وقعت مننا (صحكة).
رفعناها ..لقيناها ...(هدف) كاريكا التاني..
كاريكا دا قرب يشيل (لوز) الجيلاني حارس الموردة برة.
الحراس ديل كلموهم ..يعملوا حسابهم على (لوزهم).
الايامات دي في موضة شيل لوز.
محمد
بالحساب قاعد يعد من (1) الي (17)...قلت ليه بتعد في شنو؟....لوردات...
قال لي : بعد في (حمام) ساكت.
احتمال مدافع الموردة الكاميروني ( سي ايون) الفرتكو (ترواري)...قالوا بعد المباراة ...شالوه ودوه الدكتور ...الدكتور قال ليه عندك شنو؟.
قال ليه والله يا دكتور ما عندي اي حاجة ...بس (البوابة) القدامك دي شايفها (تلاجة).
الدكتور طلع (النضارة)..وقال ليه : وانا شايفني شنو؟.
(سي ايون) الكاميروني قال ليه : شايفك (تسلل واضح يا دكتور).
هسع دا احتمال دا.
حوار من طرف واحد
= واحد ضرب تلفون غلط ...قال الو معاي منو؟.
- قال ليه معاك موسى الزومة.
= الزول قال ليه طيب (اقفل) برجع ليك.
- موسى الزومة قال ليه : انا لو بقفل كنت (قفلت) بشة.
المباراة كلها سارح ...موسى الزومة دا ..فوّتوه (جرة).
الاولو شرط
قالوا فيصل العجب ..قال لمجلس اللوردات ..لو عاوزين تشطبوني في يونيو ..اشطبوني ...لكن بي شرط : (تبقويني مدير الشركة الرأس مالها 500 مليون دولار).
يا ابقى (لورد) تحت التدريب.
غايتو الستة في اتنين بي (12)
الحاجة البعرفها ..وقريتها زمان في المدرسة ...(من زمن جدودنا زمان) زمن كانوا بوصونا على الوطن ..هو ان (2) في (6) بي (12).. لكن هسع ما عارف بقت بي كم؟..قالوا المحلية عندها نسبة في حاصل (الضرب) هذا ...وقالوا (اللوردات) ديل برضو عندهم (حصة) في المجموع. عشان كدا لو جاملنكم ...ممكن (2) في (6) ...تطلع معاكم بي (7).
اقتراح ايام (تقشف) عصام الحاج تذكروا ..وقت قطعوا (الكهربة) من النادي ..قالوا ليك في (مشجع) طقتو كهربة في نادي المريخ.
الجماعة شالوه وجري على عصام الحاج.
عصام الحاج قال ليه الحاصل شنو؟.
قالوا ليه المشجع (الشفت) دا طقتو كهربة في النادي.
عصام الحاج قال ليهم : هو لقى الكهربة وين عشان تطقو؟...الزول دا يا بمثل علينا يا كان في نادي الهلال.
هسع امانة فيك ..دا اقتراح.
فيصل العجب في يونيو هل يتجه الي التدريب ام التحكيم؟ هيثم مصطفى عندما ..قرر الاعتزال ..قرر الاتجاه نحو المريخ ..عشان هيثم مصطفى عارف انو بي اعتزالو دا ح يكون النجم الاول في المريخ ..وقد كان.
يعني هيثم مصطفى دا ..لو قعد في بيتهم ...ممكن يفوز بنجومية مباريات المريخ.
ما في (لجنة) عاقلة كدا ...ممكن تدي الطاهر سادومبا ...او سعيد السعودي نجومية المباراة في وجود هيثم مصطفى.
من الله خلقكم ...حصل سمعتوا ليكم في يوم من الايام ...ان سعيد السعودي فاز بنجومية مباراة.
هذا عن هيثم مصطفى...فيصل العجب ..واضح ان (اللوردات) عاوزين يتخلصوا منو.
وفترة السماح حقت العجب ح تنتهي في (يونيو).
السؤال الذي يفرض نفسه ...الي اين سوف يتجه فيصل العجب ..بعد ان يشطب من المريخ؟.
هل سيتجه الي التدريب ..ويبدأ مساعد مدرب في الحرية او في الشجرة ..ويجي المريخ مدرب عام بعد (10) سنوات.
ام ان فيصل العجب ...ح يتجه الي (التحكيم)...ويبدأ (حكم راية).
انا غايتو حسب وجهة نظري ...شايف ..فيصل العجب دا فيه حتة (حكم رابع).
العجيبة وقت يرفع الزمن البدل الضائغ ...الاستاد كلو يشوف (اللوحة).
بالشباك عندنا زول دخل فيه (قندران)...خلاهو ليك متل (ام فتفت) قبل ما يغسلوها.
شلناه وجرى على الدكتور.
يعني عاوزين نجري بيه على (الاستديو).
الدكتور عاين ليه كدا ..قال لينا الزول دا بالع ليه (لغم) وإلا شنو؟...مالو عامل كدا (زي جدول الحصص).
قلنا ليه : انت دكتور وإلا ناظر مدرسة.
عارفين الدكتور بعد كلامو دا ...كتب للزول الداخل فيه (قندران) دا شنو؟.
كتب ليه (حبوب بندول).
قلنا ليه دا شنو يا دكتور البتعمل فيه دا ...نحن لو على البندول ما كنا شلناهو وديناهو على (قسم الله) سيد الدكان.
الدكتور قال اعمل ليكم شنو يعني؟.
المستشفى السبع طوابق دي ...ما فيها شيء غير (حبوب البندول)..وست الشاي القاعدة تحت الشجرة ديك.
قلنا ليه : طيب ما تودينا لي ست الشاي ...بدل (حبوب البندول) الكتبتها لينا دي.
الغريب ..زولنا الداخل فيه (قندران)..وقت سمع سيرة (ست الشاي)...هو ذاتو قام يتنفض ..وقال : (نمشي نشرب لينا قهوة).
بيني وبينكم ...القهوة افضل ليه من البندول.
سمعت وما جابو لي في لوردات مجلس المريخ ال (17) لورد ..قالوا حوالي (5) ضباط امن سابقين.
قالوا ناس جمال الوالي وعبدالباسط حمزة ...عاوزين يحوّلوا المريخ الي (شركة).
غايتو بالفهم العادي دا ..فهم السوق (الطبيعي) حقنا ...لو عاوزين تحوّلوا المريخ الي (شركة)..إلا تحوّلوه الي (شركة امنية).
غير دي ..ما عندكم فرصة.
معليش ..اجمعوا الورق.
الامين العام للجنة التسيير مركب ماكينة (بنطون) لاحظت ان الامين العام للجنة التسيير اصبح اصعب من عصام الحاج...واذا كان الاخير .. (اي عصام الحاج) بكتفى ب (الشروق) وقناة النيل الازرق فان الامين العام الجديد للجنة التسيير (والله العظيم ما عارف اسمو)... الى جانب الشروق وقناة النيل الازرق اضاف قناة قوون ليصبح برنامج الامين العام للجنة تسيير المريخ على هذا النحو.
الكوكي باقى ليه (4) فرخات و(7) انبوبات من ان يترك فريق المريخ.
طبعا بعد بتاع الدواجن الدخل ضمن لجنة (اللوردات)...الحساب في المريخ بقى ب (الفرخة).
يعني حافز (الانتصار) في المباراة عند ناس سعيد السعودي وكلتشي ...(فرخة).
حافز التعادل (بيضة).
اما الفوز ببطولة محلية فحافزها عند ناس ضفر هو (انبوبة غاز) لي اي لاعب.
قلت ليكم الحساب في المريخ بقى ب (الفرخة) ما صدقتوني.
حصة انشاء اتخيلوا في الدورة الثانية للممتاز ..سيدي بيه وتراوري ونزار (الصاقعة) وكاريكا في تشكيلة واحدة.
الحكاية دي زي (اوركسترا) الاذاعة سنة 80...وقت كان فيها برعي محمد دفع الله والله جابو.
سيدي بيه دا ...قالوا الكورة عندو زي (شاي المغرب)...حاجة في منتهى السهولة.
جهزوا الشالات والجلاليب والعمم عشان تحرقوها في الدورة التانية في استاد الهلال.
اي (عمة) جديدة ...كدا ...ما تدخلوا بيها الكورة..تقوموا (تحرقوها) ساكت.
والله زمن من (حرق العمم).
اشتهينا لينا زول يحرق (عمتو).
الايامات دي الهلال بحرق (اعصابك) بس.
بالوصف
قال ليه اول شارع خليه ..تاني شارع خليه ..ثالث شارع خليه ..رابع شارع بتلقى (بلة جابر)..قول ليه (الحركات) دي في فرنسا ما بتنفع.
تقيف ليك في شارع في فرنسا ...من الاسبوع الاول برجعوك.
في سرك
انهى الهلال اتفاقه مع لاعب (كبير)..سوف يتخلص منه فريقه في يونيو القادم.
الهلال انهى الاتفاق مع اللاعب من اجل العمل في الجهاز الفني ..والاستفادة من خبرتو الطويلة.
بالقطارة
جمال الوالي في المريخ حقق كأس الممتاز مرتين فقط ..مقابل (8) مرات للهلال.
الناس كلها عارفة الكلام دا.
ناس المريخ هسع عاوزين يقنعونا ...ان جمال الوالي فى ال (4) شهور الماسك فيها لجنة تسيير ح يحقق كأس الممتاز (8) مرات.
يعني في الشهر المريخ ح يحقق الكأس مرتين.
الغريبة في ناس بصدقوا الكلام دا.
في ناس منتظرين (المول).
قصة في شكل (فرخة)
مشى السبور ماركت ..فتح التلاجة طلع ليه (فرخة).
مشى على الكاشير ...عشان يحاسب ويوزنوا ليه (الفرخة).
ساعة الحساب اكتشف (الفرخة) ما فيها (كرعين).
الزول استغرب ...قال لبتاع الكاشير ...انت الفرخة دي (كرعينها) وين؟.
بتاع الكاشير ..قال ليه انت ما عارف ...الفراخ دي ..من عيّنوا في المريخ (لجنة تسيير) بقت بتجينا بدون (كرعين).
ناس ضفر ديل ..لو قعدوا لي شهر اكتوبر القادمة ...تاني (الفرخة) بتجيكم بدون (صدر).
تاني الواحد يمشي السبور ماركت عشان يشتري ليه (فرخة)...بمنحوه مع (الفرخة) طلب فول ...عشان يتم فطورو.
بالله الفرخة بقت زي (حضرنا ولم نجدكم).
شولة هندية الكابتنية في المريخ زي (صرفة الصندوق).
يوم فيصل العجب.
ويوم هيثم مصطفى.
ويوم سعيد السعودي.
ويوم اكرم الهادي سليم.
تصوروا موسى الزومة ذاتو عندو يوم في (الكابتنية).
والله لا حارسكم ...لا كباتنكم ..لا نجيلتكم ...نجيلة لوردات.
قالوا واحد حاول يستفيد ...من الحتة دي ..انتظر ليك (لجنة التسيير) ومشى على (عبدالباسط حمزة)..وقال ليه يا عبدالباسط انا عندي (مبيد) للديدان دا.
عبدالباسط حمزة قال ليه (ديدان) شنو؟...نحن في لجنة تسيير المريخ ..وإلا في لجنة تقويّم مشروع الجزيرة.
طبعا زولكم ما عندو اي خليفية حول (الديدان).
ما بقرأ جرايد طبعا!!.
الظاهر لسع ما كلموه بيه.
خطين تحت الجواب حلمت ...(يعنى الكلام دا حلم ساكت).
حلمت الوكيل الغاني ..ضرب لي (بلة جابر)..واستعجلوا عشان يرسل (الصور)..وال ( سي دي)...عشان ناس فرنسا ديل ما بنتظروا اكتر من كدا. بلة جابر قال للوكيل الغاني : اسمع ادوني (4) شهور مع اللوردات ديل ...وبجيكم..عندي (بيت) ببني فيه.
شوال غتاتة مجلس ادارة نادي الموردة اعفت (عبدالمجيد جعفر) بعد خسارة فريق الموردة من الهلال بسداسية.
ان جينا للحق.
بعد السداسية دي (لجنة تسيير) المريخ ذاتها مفروض يعفوها.
لجنة التسيير ذنبها شنو؟.
بالمناسبة
المول بتاع المريخ ..قالوا لا ح يجيبوا فيه (طحنية)..ولا ح يجيبوا فيه (بسكويت).
عشان المول ما يخسر ساكت.
طحنية مع ناس (ضفر) ديل (5) دقائق ما بتقعد.
ملحوظة عصام الحاج بدل ما يقعد ساي ...بي (تقشفو) دا ..احسن يمشي يشتغل اداري في فريق النيل شندي.
على الاقل النيل شندي مؤسسة...لا فيه جمال الوالي ولا كمال دحية ولا صديق على صالح.
غير دا ...قروش عصام الحاج ..بتشغلو في (النيل شندي).
النيل قدر قروشو.
وفي شندي لو عاوز يقول دا موسم (الخبت) بي طريقتو.
لكن برضو مع ناس ساردية والحوش ومويس ما بلقى ليه طريقة (يخبت).
عصام الحاج دا ...ما في حاجة عملتها فيه غير تصريحو عن موسم الخبت.
