وازدحم هواء الاسافير بتصريحات مناوئة لأمل هبانى بسبب تصريحها القائل بما معناه بأن الضر حار وفى حال حدوثه على الزوجه الواقع عليها أذى الضر الاستعانة بصديق يعنى بالدارجى حقنا (تصاحب ليها واحد ) حتى ترد للزوج المعدد الصاع صاعين والصاع صاعين دى منى انا !!! غايتو يا هبانى يا بت امى بالغتى بوليييغ شديد فى نضمك ده !!!بعدين انتى ماعارفه إنو فى ناس قاعدين علي الهبشه يعنى انتى قاصدة ماقاصدة ارجى الراجيك فى منابر المساجد يوم الجمعة القادمة إن شاء الله اديتيهم موضوع من مافى كتر خيرك !!! على العموم حكاية إنه الضر حار وفيه اذى نفسى لاى واحدة يعرسوا فيها دى مادايرة نقاش امهات المؤمنين مااتحملوا الضرائر منو طيب بتحملوا وطبيعة الإنسان اصلا حب التملك وكراهة الشراكه والآن انا بسال اولاد آدم لو كان مسموح لزوجاتكم التعدد هل بتتقبلوا فكرة إنه رجل يشاركك زوجتك؟؟ والله كان قيامتكم قامت وافتكر ده القصدتو أمل هبانى بكلمة الاستعانه بصديق وده تصريح كلام زعل مابتقصدوا اكيد لأنه بغض النظر عن الدين الحنيف والشرع المجتمع السودانى معروف مجتمع محافظ المساخر دى ماحبابه انا ما بقول نحن مجتمع ملائكى ابدا واقولها بصراحه السلوك المعوج وسط المتزوجات وغيرهن موجود حتى فى عهد الرسالة وإلا ماكان نزلت احكام ربانية رادعة لكل من يحيد عن جادة الطريق ،،،،، ولكل من استل قلمه من مغمده وطرررق لسانو مستنكرا تصريحات بت هبانى بقول ليكم رئيس جمهورية كاودا عبدالعزيز الحلو جرابو مليان بالفارغه وكل يوم طالع بفن جديد وماشى فى سكة التصريحات المابتتبلع يمد طيب وين انتو من الحلو المر الحجازى ده ولا عشان مركب ماكينة رئيس وكده ؟؟!! خطر الحلو داهم لو كنتم تعلمون شخص مستفز ومركز مع العقيدة بشكل غريب يللا خليكم عادلين فى هجومكم ،،، ومن الآخر كده اى واحدة زوجها يتزوج عليها بدون اسباب منطقيه وهى عدم الإنجاب أو سوء أخلاق يبقى سبب واحد يخليك تقعدى فى عصمتو وتحرقى اعصابك مافى اطلبى الطلاق عشان تتزوجى غيرو وتوريه العرس كيف يكون (بت محمود) [email protected]