صديقتها من قامن شافعات قالت لها وهي تنصحها" وحات الله النذير دا اخير منو ما بتلقي.. عرسيهو.. مالو اريتو ولد السرور.. يا اختي عندو كاروتييين شغالات.. وعندو عوضة في بيت ناس أبوهو.. عوضة جااااااهزة العناقريب مو عناقريب والدولاب أبو مراية مو دولاب.. والهناية البيقعدو يسروحو فيها الشعر ديك، شوف عيني بي بنبرها.. اصلو اخير منو مافي.. وفااااااااالح ونجيييييض جنس نجاض.. وحات الله افلح من جَنْون الحِلة ديل جت" أخذت تميلها وتنقنق فوق راسا إلى أن اقتنعت بنصيحة صديقتها وتزوجت النذير.. بعد عام من الزواج قالت لها" لا اصبري يا دي.. لي حسي ما ولدتي مالك؟.. البنات العرسن معاكي ولدن جت.. ما مشيتو الحكيم؟" ثم بعد ان ولدت مولودها الاول في عامه الأول قالت "يا اختي مالك لي حسي ما جبتي لي وليدك دا اخو واللا اخت؟.. ما تقعدي عليهو كدي.. ويكبر ويقعد يتلفت براااااهو كدي.. والعمر مااااااشي انتي قايلة نفسك صغيرة ؟حسي تكبري وتقعدي تكوسي للولادة وما تلقيها.. وبعدين المثل بيقول لك (إن بقيتي دايرة تمسكي الراجل من ايديهو.. امليهو ولادة لي اضنيهو).. انتي ما سمعتي بالاستنزاف واللا شنو يا اختي؟" ثم بعد تمانية سنوات كان عندها خمسة من الأطفال وحامل.. قالت لها:- "لا انتي يا دي اصلك ما بترتاحي يا كافي البلا.. الحول بي زول؟.. اقيفي شوية.. اطلقتي ولادة,,وحات الله حيلك اتهدا وقلبك اتقطع من الولادة وعايني لي نفسك دي مبشتنة وغبشا كيفن؟.. نان تتجيهي بي وين مع كوم الشُفع دا؟ وكملانة من لحم الدنيا، نان تسمني بي وين؟ صحن الاكل تخوتيهو ليهم من دوب ما نهرتي الكديسة تقبلي عشان تاكلي معاهم تلقيهو كِمِل.. و الشي المستعجبه ليهو.. انتي وحمارة النذير الزرقا دي، قاعدات تلدن سوا.. جنياتكم كلهم نددة.. وحات الله تنظيم النسل عندكن انتي وهي.. الحُصبِّن الله". ثم بعد شهر.. وصادفتها وهي زعلانة وعندها مشكلة مع زوجها النذير وقد رمى عليها يمين الطلاق قالت لها "اصلو قبييييييييل النذير دا ما راجلن ليكي.. علا القسمة بس!!.. مطرطش من يومو، وما عندو طعم!!.. اليطلقك كان مطلقك.. هي يا يمه اطلقت عفراء بت ستنا ،اطلقت في سنتها.. كانت معرسة راجل متل صباح العافية.. النذير شنو المتل ابو الدردوق؟ وكمان عليهو قلة ادب وطلاق؟أحي الليلة.. انت وقت لقيت لك واحدة تتصابح بك وتتماسا بك ما تحمد ربك.. عان الخليّقة؟" ثم بعد سنة من الطلاق قالت لها:- "انتن الواحدة فيكن تخرب بيتها بايدها.. وتقعد تجرّس.. أها خُمي وصُري تراكي اطلقتي وقعدتي"!! الباب البجيب الريح- صحيفة اليوم التالي