جاء من قرية (جابر) بوحدة (المحيريبة) ولاية الجزيرة...وهو معطون بحب فريقه المريخ... فقد نشأ في أسرة تدمن عشق المريخ...منذ عهد عمه المرحوم (مالك حامد)...الذى علمه حب المريخ وحصر ألوان الاسرة مابين... أحمر (قاني)...وأصفر (برتكاني)...هما اللونان الرسميان لنادي المريخ السوداني...زعيم أندية العاصمة وريحانة ملاعب رياضة كرة القدم...أسمه (الجنيد)...ذلك الاسم الذى عرفه المشجعون فيما بعد... بعد أن اطلقوا عليه الكثير من الالقاب...أبرزها (مجنون المريخ)...(السوداني) التقته خلال زيارته لمباني الصحيفة بعد تكريمه من لاعبي المريخ وتكريمه من برنامج جماهير العرب...فماذا قال في بوح خاص للسوداني التى يعتبرها منزله (على حد تعبيره)... * الجنيد..بصراحة يتردد انك بدأت (هلالابياً) ثم تحولت للمريخ؟ (بإنفعال)..هذه من المستحيلات..أنا منذ نعومة أظافري مريخابي..وكنت مريخابي من زمن الجرايد دي كانت جريدتين بس (الايام والصحافة)..حيث كانت الصحافة تعبر عن المريخ..بينما كانت الايام تعبر عن الهلال..وكنت أحفظ كل اسماء لاعبي واداريي واعلاميي المريخ عن ظهر قلب..فهذا الاتهام لااساس له من الصحة. * طيب متى كانت أول زيارة لك لنادي المريخ؟ في الثمانينات..واذكر انني ضللت الطريق إلى الأستاد أكثر من مرة..حتى تمكنت من الوصول إليه. * ماهو أول هتاف لك في تشجيع المريخ؟ كان هتاف (سكسك وباكمبا وأبوعنجة)..وأصبحت بعد ذلك الهتاف أقوم بتأليف بعض القصائد والاهازيج التى تمجد المريخ، مثل أغنية (ود القوز نزل ياالله..وصواريخ مطر ياالله). * الجنيد..ماهي حكاية الطبلة؟ اول طبلة امتلكتها كانت من الطين وجلد الماعز، وكنت احمل معي (طبلتين تلاته) خاصة في فصل الخريف لان الامطار عندما تهطل اعاني بشدة وتبتل الطبلة. * هل اتتك أي أغراءات لتشجيع الهلال وتغيير لونك الرياضي؟ ابداً..لكن اقابل كثيرا منهم ويقولون لي: والله ياالجنيد بنتمناك هلالابي. * بصراحة..رأيك في التشجيع مابين الامس واليوم؟ والله زمان كان عهدا جميلا..لما بديت اشجع لاقيت مشجعين كبار وقفوا معاي..زي الملك النعمان..الذى تعلمت منه الكثير، حتى انه قال لي ذات يوم: (يالجنيد انت حتكون خليفتي)..والكلام دا اتحقق فعلاً. * ألم تجد إي إعتراضات من قبل المريخ عندما تذهب لتشجيع الهلال..خصوصاً أن مشجعي الهلال نادراً مايبادرون بهذه الخطوة؟ ابداً والله..حتى انا في آخر مباراة دولية للهلال أخذت الاذن من مجلس الادارة بقيادة الدكتور جمال الوالي الرجل النظيف والمهذب والوطني حد النخاع، والاخ محمد جعفر قريش الامين العام، واللذان سمحا لي فوراً بتشجيع الهلال. * هل تشجع الهلال في كل المباريات عدا التي يكون فيها المريخ طرفاً؟ لا..انا اشجع الهلال عندما يلعب بأسم الوطن فقط..اما محلياً فأنا اشجع أي فريق يلعب ضد الهلال. * بصراحة....هل لاحظت في ابنائك إي ميول زرقاء؟ (بإنفعال)..ابداً..انا بيتي كلو مريخابي..ومابسمح بي غير كدا. * بس دي حريات شخصية؟ حريات..حريات..بس (مافي بيتي). * حكاية الملاريا البتجيك الساعة ثمانية دي شنو؟ (يضحك)..والله ملاريا غريبة..ومرة جاتني وانا بشجع في المريخ ضد الاكسبرس اليوغندي..وفي الشوط الثاني ماوعيت إلا وانا في مشتشفى الشرطة ببري. * الجنيد..من الذى أطلق هتاف (الماسورة) في المدرجات؟ شوف..دي حاجات بعيدة خالص عن المريخ وكيان المريخ ومشجعي المريخ..انا شخصياً لدي هتافاتي الخاصة والتى تمجد كل الاندية..وهذا الهتاف هو تفلتات من (قِلة). * لاعب قريب منك جداً؟ فيصل العجب..دا لاعب مهذب بطريقة غير عادية..(ياخي العجب دا لو ضربتا ليهو وماردا..برجع ليك طوالي)..وانا من هنا بشكروا على التكريم الاخير من اللاعبين. * بمناسبة التكريمات الاخيرة حدثنا قليلاً عن تكريمك من قبل برنامج جماهير العرب؟ البرنامج هو يهدف لتطوير اللعبة في الوطن العربي عامة، وله شروط خاصة لتكريم المشجعين، وأنا تم إختياري من السودان، وهنالك مشجعون من كل الوطن العربي..واحمد الله انا هذا التكريم جاء في عهد الرجل المفضال الدكتور جمال الوالي. السوداني
