شكراً جميلاً لكل الأعزاء والعزيزات الإتصلوا بي تلفونياً مستفسرين عن غيابي عن شاشة هارموني وغيرها في رمضان ! شكراً لمن راسلوني من خلال الايميل ورسائل الإس ام إس وعبر الوسائط الأخرى ! شكراً لأنو أديتوني إحساس جميل بالمحبّة والحُب والألفة والقُرب منكم ومن قلوبكم وعيونكم النجيضة والمهتمة والمتابعة شديد !! غبت عن (هارموني) لظروف خارجة عن الإرادة زي ما بيقولوا ورغم حبي الشديد لهذه القناة لكن يبقى التغيير سنة من سنن الحياة ودوام الحال من المحال !! غيابي عن أي شاشة تانية في رمضان هو بسبب وجودي في (وطني) التاني مصر أم الدنيا أيضاً لظروف خاصة جدا ومهمة كمان لتقرير المصير في البقاء في القاهرة أو الإنتقال للسودان نهائياً ولا اقول الإنفصال لأن اللي بيشرب من موية النيل (بتاعنا) لازم يرجع لمصر تاني !! دعواتكم انو ربنا يوفقني في انجاز مهامي بنجاح والعودة لطيبة البلد قريبا يارب !! القناة الجديدة اللي هلتحق بيها باذن الله وتوفيقه ماعاوزة أبوح باسمها الآن عشان بس مابحب أسبق الاحداث وكلو بيد ربنا وبرضو دعواتكم لي بالتوفيق وأكون شاكرة والله !! تابعت بعين المشاهدة بعض برامج قنواتنا الفضائية في رمضان لهذا العام وسعيدة وفخورة كالعادة باستاذي المبدع السر قدور وبرنامجو الرائع والمُشاهد بصورة خيالية على قناة النيل الأزرق ( أغاني وأغاني) وعجبتني حلقة كمال ترباس شديد وعذبتني دموعه على ذكرى والدتو واتذكرت أمي الله يرحمها وبكيت معاه شديد !! سعد الدين حسن مذيعي المفضل وبصحبة الجميلات رشا الرشيد وتسابيح خاطر وزميلي في هارموني ( سابقا) سوركتي عبد العزيز المجتمعين في سهرة ( ليالي) في النيل الأزرق إبداع منقطع النظير ! برنامج ( تواشيح النهر الخالد ) على قناة الشروق والبقدمو الأستاذ حسين خوجلي بالجد موبالغة وحنين ومليان وذاخر بروائع الحقيبة وبعمل لي حالة من الاسترخاء والراحة بشكل عجيب وبرفعني لمصاف المتصوفة في حضرة العشق النبيل وكل مرة بتمنى لو عندي ذي ذخيرة الاستاذ حسين وغزير معلوماته عن هذا الفن الساحر والراقي (فن الحقيبة)!! عودة الزميل الجميل الطيب عبد الماجد لتلفزيون السودان في شهر رمضان مكسب مابعدو مكسب .. مبروك لتلفزيون السودان ولتحافظ على هذا المتفرّد الطيب عبد الماجد !! قناة قون بتدهشني شديد بجمال صورتها وتنوع أفكار برامجها ووأضح جدا الصرف المالي الكبير عليها من خلال استديوهاتها وفخامة ضيوفها فكل التحية للاستاذ رمضان أحمد السيد مدير ومالك القناة وبالتوفيق والى الامام دوما ! زعلانة لأنو قنوات هارموني والامل وابوني مابظهروا عندي في الطبق بتاع تلفزيونا للاسف لكن أكيد برامجهم حلوة مافي شك وربنا يوفق الجميع يارب. حزينة لأني بعيدة عن الشاشة التلفزيونية في رمضانكمقدمة برنامج وسعيدة في نفس الوقت انو اتيحت لي الفرصة بعد زمن من الانقطاع الطويل عشان اشاهد التلفزيون براحتي وبدون قلق واشوف الزملاء وبرامجهم الرائعة شديد والله وربنا يوفق الجميع ! ويسهلها علي أكمل أشغالي في القاهرة وأرجع قوام للكميرات لأنو وحشوني المشاهدين البحبهم وبحبوني وربنا يجعلني عند حسن الظن دائما يارب العالمين بحق هذه الأيام المباركات من شهر رمضان الكريم ! نادية عثمان مختار