غيب الموت في هذا الصباح شاعر آخر بقامة هذا الوطن الاستاذ الهرم / عوض فضيل الشاعر المعروف واستاذ اداب اللغة الانجليزية بالمدارس الثانوية . الابن البار لاهل قريتة البركل بمحلية مروي . رحل الاستاذ عوض فضيل متعجلا اللحاق برفيق دربه وصديقه الودود الشاعر محمد الحسن سالم حميد رحل الاستاذ الفذ عوض فضيل بعد ان شارك الجميع شقي اعمارهم ليتوقف وجيب قلبه لسودان الخير الذي صاغه غناء جميلا ..توفي الاستاذ الشاعر الضخم عوض فضيل بعد ان اثري المكتبة الشعرية والغنائية بالادب الرصين وهو رائد للقصيدة الشعرية واول من دون بلاغ في مواجهة بص شمبات في قصيدته حماد ودسعيد التي الهمت صديقه الشاعر حميد ان يقتفي آثاره برائعته عم عبدالرحيم . الاستاذ عوض فضيل كاتب متميز له عدد من المؤلفات بالغتين العربية والانجليزية ومنها كتابة (بدون تابلت ) والبحث القيم بالانجليزية عن دور الاسلام في محاربة الرق والعديد من القصائد المغناة، سيفتقده الجميع خاصة اهله في قريته البركل تحت الذي وقع عليهم الخبر غير مصدقين حيث توفي الشاعر الهرم عوض فضيل بالخرطوم صباح اليوم وسيواري الثري بمقابر ودالكرسني بموطنه البركل بمنطقة كريمة محلية مروي عصر اليوم والعزاء لكل اهله واصدقاءه في جميع انحاء الوطن وخارجه وانا لله وانا اليه راجعون قصيدة (سودان الخير ) للاستاذ / عوض فضيل سلام يا ناس سودان الخير سلام .. يا ناسا بتصل الزول حفاية على حدود السيف ويا ناسا تقاسم الزول شقى عمرو ومعاهو تقيف ... ويا ناسا فناجرة تمام ويا ناسا تمامة الكيف رائعة شاعرنا الكبير الأستاذ / عوض فضيل حماد ود سعيد ( بلاغ ضد بص شمبات ) زول إسمو حماد ود سعيد بلدو الصغير إسمو أم بكول ميلادو ما معروف متين لكن كبار ناس أم بكول بيقولو ساعة البحر غطى الجروف وسنة المدير ( ميجر صنب ) زار أم بكول والعمدة كان عازم العمد وضابح خروف أعظم تواريخ في سجلات المواليد في الوجود إتوفى قبال عشرة يوم إنتو أضحكو الدنيا أيه غير المسرات والضحك وكلام على الهاتف مع أحلى البنات وأشعار غزل .. ليل وشوشات وهدية من أغلى البنات قارورة من أرقى العطور وهدية لي نفسك براك قارورة من أرقى الخمور عشان الليل بيك ما يطول وأنا بعتذر يا أصدقاء حماد شنو وبلد أم بكول ؟ ناس في غاية الضحك والإنبساط ذكر المسائل الما بتسر حدثنا عن بهجة مدن تضحك على رنة وتر من الفجر وحتى الفجر حدثنا عن نهدين حلاوة البرتكان واقفين بيتحدوا النظر حدثنا عن ليل البنات ليل الخدر لكن !!! برجع وبعتذر يا أصدقاء ماله باكية أم الحسن أختو اللي من أربع سنين لابسالا توب واحد قديم وجد تمشيبو للبكاء والفرح تمشيبو للجار والبعيد والله ... أبداً ما اشتكت وقالت قدم ودايره الجديد كيف تشتكي ؟ وهي العارفة بي مغص القرش تاراً قديم من زمن أبوه وجدو والجد الكبير في لحظة ما بتصادقوا ويصعب على حماد شقى أم الحسن يتعب شديد ويكدح شديد وبرضو القرش ما يوصلو ولمن خلاص ضاق عليهو الحال باع التور وإشترى توبين جداد لأم الحسن ونعلين جداد وأداها من باقي القروش عشرين ريال من خوفوا من قدر الزمان وحماد نزل جاء العاصمة كايسلو أعمال حماد طلع حماد نزل عذابو ضاق بيهو الجبال يقولوا أمشي تعال ... وبعدو كأنهم بختارو في صبر الرجال ولمن خلاص الدنيا غنت وزغردت قبلوهو في البوليس نفر قالوا لو تقدر تمش وتستلم الشغل آخر الشهر حماد فرح وتمنى لو يطير عشان يمشي البلد يودي الخبر وحماد سرح ( والله يا أم الحسن والله يا ما تسعدي والله لا تسقي البهم لا تحشي قش وسماحة ساكت تقعدي شطح الخيال قدامو وشاف أم الحسن في أحلى توب زي العروس متحننة ومتعطرة وفي اللحظة ديك لاقاهو بص شمبات وحماد طار على الأرض إنطرح والدم بحر سال في التراب وقليبو يا دوب محتضن الفرح والدم كتب فوق التراب والله يا أم الحسن والله يا ما تسعدي والله لا تسقي البهم لا تحشي قش وسماحة ساكت تقعدي والرادي بعد الكافينول يعلن عن الجثة ويقول: زول بي شنب وخدود أفقي مفصدة وفي الجيب خمسطاشر قرش وحجاب عشان عين العدو [email protected]
