* كثيرة هي الملاحم الجميلة في تسجيلات المريخ عبر التاريخ. * قوة جذب الكوكب القاهر للنجوم لا تقاوم، وعراقة المريخ واسمه الجميل وجماهيريته الطاغية وبطولاته المتفردة وروعة مجتمعه النقي وجمهوره الوفي تجعله هدفاً كل موهوبي كرة القدم في بلادي. * المريخ المقصد الأول لكل موهوب.. مهما قلَّ المال، وتعقدت الظروف الإدارية، ولا أدل على ذلك مما حدث في التسجيلات الحالية. * لا غرابة، فاللعب للزعيم يعني الشهرة والمجد والبطولات الجوية الحصرية على كوكب الأرقام القياسية. * ارتداء شعار الفن والرجولة والفتوة كان وسيظل حلم كل لاعبي كرة القدم في السودان، وشيبوب (كواي القلوب) ليس استثناءً من تلك القاعدة الراسخة. * ذا السحر لا فخر ولا عجب.. هو المريخ سُر القوم أو غضبوا. * عندما يتعلق الأمر بالتسجيلات فالأمر محسوم بالقاضية الفنية.. المريخية.. عبر جسر الملكية!! * ملاحم تسجيل سكسك أسامة أم دوم وأسعد التوم وفاروق جبرة وجاديكا وطلاق عنتر وصلاح الأمير وعبد الكريم الدافي وكوبري طمبل وصفعة العجب وقرصة العقرب تشهد على صحة ذلك الحديث. * الضربة جديدة.. لكنها شديدة! * ما حدث في عملية (الذراع الطويلة) يؤكد من جديد أن عشق المريخ الجميل يذل المستحيل.. وينتصر! * خُيِّر شرف في لحظة غضب، فاختار البعد عن المحبوب، لكن فورة العشق الأحمر سرعان ما تملكت القلب الندي، وتسيدت الدواخل النقية. * هل تملك الفراشات إلا أن تعانق الزهور؟ * وهل يملك النسيم إلا أن يداعب الغصن الرطيب؟ * الحب في ذاتو مبرر كافي يا شرف. * عاد الابن لحضن أبيه، طالباً العفو والغفران. * لن نصفنه في زمرة العاقين، لأنه كفر عن خطئه بدمعه. * من شاركوا في عملية إعادة شيبوب للنادي المحبوب توزعوا بين السودان والسودان وجنوب السودان ودولة الإمارات وإثيوبيا ويوغندا. * ترددنا في حصرهم، خوفاً من أن نسقط أحدهم. * عندما يتعلق الأمر بخدمة المريخ فمن الطبيعي أن يأتي الغالي الوالي في مقدمة الركب الأحمر، ولا غرابة، فعشق جمال للزعيم لا يجارى، وسعيه لخدمته بالجهد والمال ليس خبراً جديداً. * الحبيب آدم سوداكال، ما لجأنا إليه لخدمة الزعيم إلا وجدناه حاضراً بماله وحبه الدافق للمريخ. * ونسي والعميد عامر واللواء مدني الحارث واللواء كمال شقاق ود.أسامة وبقية أعضاء مجلس المريخ.. وقبلهم عادل أبو جريشة (كابيلا) أحد أبرز قادة ملحمة إعادة شيبوب.. كلهم كانوا كالعهد بهم.. خُداماً للزعيم. * من بريطانيا لعب ابن المريخ وفارسه الدكتور ياسر صلاح دوراً محورياً في تحديد مقر إقامة شيبوب، والاتصال به لإقناعه بالخروج من المخبأ (بأشهر نطة)، بعد أن ربطه بمكالمة جماعية مع الوالي الغالي. * خرج شرف ليحتضنه بعض عشاق المريخ من أبناء الجنوب.. وما بين (النطة القصمت ظهر البطة) والوصول إلى سلم الطائرة ما لا يحكى ولا يروى، لأنه يشبه (أفلام الآكشن)، وأشهر روايات الجاسوسية. * يا مقبول.. أصلو ما معقول!! * بدءاً نذكر أن اختيار دولة جنوب السودان لتصفية الحسابات مع المريخ كان خطأً ساذجاً، يضاف إلى سلسلة الأخطاء الكبيرة التي دفع وصيف دنيانا ثمنها غالياً. * الجنوب أرض المريخ، وموطن العشق الأحمر. * غالبية أبناء الجنوب مريخاب، من أيام جوبا مالك عليا.. وباقي دقيقة وسامي بجيبها! * جوبا الحلوة كانت وستظل عاصمةً المريخ قبل أن تكون عاصمةً دولة جنوب السودان، ومحبة أبناء الجنوب للكيان الأحمر كانت وستظل أقوى من كيد الساسة، وتداعيات الانفصال. * ابتعدوا عن السودان، واكتسبوا جنسية دولتهم الوليدة، لكن عشق المريخ لم يغادر قلوبهم النقية مطلقاً. * معظم من تولوا شيبوب بعنايتهم في جوبا، واستضافوه في دورهم وأكرموا وفادته لم يسبق لنا الالتقاء بهم. * حملوه على كفوف الراحة، وفعلوا كل الممكن وبعض المستحيل ليخرقوا الجدار الذي شيده مدير مكتب الكاردينال في جوبا. * ما حدث خلال الأيام الثلاثة الماضية أكد حقيقةً ناصعةً، مفادها أن انفصال الجنوب لم يفلح في قطع وشائج المحبة الطاغية التي يتمتع بها المريخ في جنوب السودان. * أبراهام ألبينو.. ومثيانق شريلو.. وآخرون نعجز عن ذكر أسمائهم هنا لأسباب خاصة، حملوا شرف في المآقي، وتولوه برعايتهم، وأنفقوا أموالهم كي يعيدوه للمريخ، لأنهم يعشقون المريخ. * عشق الزعيم المتمدد في بلاد الأبنوس فتح الأبواب المغلقة، وأزال الحواجز الغليظة، * أبراهام ومثيانق يستحقان مقالاً منفرداً، لأن ما فعلاه لإعادة شيبوب للمريخ يستحق أن يدون بماء الذهب. * المحبة شديدة يا أهلنا!! * ألبينو وشريلو.. جماهير المريخ تريد رؤيتكما في بقعة المريخ قريباً. * صدق من قال: المريخ عالم جميل. آخر الحقائق * شاركت كل فئات مجتمع المريخ في ملحمة إعادة شيبوب، وكان قطب المريخ الشفيع عوض (شوشتا) في مقدمة ركب المساهمين بالجهد والمالي. * جيمس جوزيف.. صلاح خضر.. محمد خير ساريا.. وآخرون سنذكرهم لاحقاً. * أسد أديس.. والله ما ناسيك. * المهمة المقبلة لكوماندوز الزعيم (إجلاء الجوازين والكرت.. والشنطة)! * جواز ألوك.. جواز شيبوب.. كرت أكيج.. وشنطة كواي القلوب. * نحن ما بنخلي حاجة ورانا! * مثيانق شريلو.. يوم شكرك ما يجي. * أبراهام ديمة قدام! * ياسر صلاح.. تتجازي يا دكتورنا الخواجة! * من عاصمة الضباب أدار العملية بأعلى درجات الدهاء والاحترافية. * موعدكم مع كل الأعمدة الزرقاء التي تغزلت في جسر الملكية لاحقاً. * جسر الملكية.. شغلتو نيَّة.. ونارو حية! * نماذج من عناوين الصحف الهلالية في الأيام الماضية: * شيبوب في الملكية.. والفرحة هلالية! * شيبوب كواي القلوب.. يوقع اليوم في ملكية الجنوب. * شيبوب يوقع اليوم في الملكية تمهيداً للعودة إلى الهلال في التكميلية! * جزء من مقال الحبيب خالد عز الدين: (نشيل التذكرة ونمشي الجنوب.. ناس الملكية قالوا عايزين يدوا المريخ درس في انتقال اللاعب الهاوي.. يعني شيبون ده هاوي ما فيهو شق ولا طق يا مزمل.. لكن ألوك ده ما عندو أي علاقة بشيبون.. واحد ثقيل من القراء قال ناس لجنة التسيير بعد ضربة شيبون عايزين يقدموا استفسار للوزير يسألوهو هم هواة وللا محترفين.. ما تخافوا زول عايزكم مافي يا عبد التام)! * كلام يا عبد التام! * (شيبون مشى وما عارفين برجع متين.. اليورو وصل وما عارفين اتصرف وين.. والونسة في البكيات بي شيبون وفي الأعراس باليورو.. والقصة لسه.. سندريلا)! * عنوان عمود خالدونا: (العيون على اليورو وشيبون)! * كان ما كلموك اسمو شيبوب وليس شيبون يا خالدون! * اسمو ما عارفنو.. وعايزين تقطعوهو جسر المنشية؟ * أقصد جسر الملكية؟ * جوبا مالك عليا.. جوبا شلتي عينيا! * عمود خالد جزء من برنامج الكاميرا الخفية.. الشيبوبية.. قال أيه: (في بيوت البكيات الونسة كلها شيبون.. بكاء شديد.. كان لعاااااب خلاص.. مشى الجنوب وووب وووووب.. البكاء لزومو شنو.. أصلو مشى يحارب؟ لا مشى يلعب.. طيب المشكلة شنو؟ المشكلة إنو ما بجي إلا بعد سنهههه ونص.. وتعال بُص)! * يا خالد الليلة تعال المطار وبُص.. علي الساعة واحدة نص! * سنة يا هنا!! * أقول ليكم سر؟ ناس الملكية ذاتهم طلعوا مريخاب! * وحاة النعمة بت وراق مريخاب يكاتلوا!! * نقيف هنا ولا نطلع برة مع ناس أطلع برة؟ * وناس كتور (أهل جيمس جزيف) ذاتهم طلعوا صفوة! * الكتبوا خالدونا كوم، ومقال فطومة كوم براهو! * كوم جنوبي.. قالت أيه: (شيبوب في الجنوب.. يا وصيفاب أبلعوا الحبوب)! * حبوب منع الخجل؟ * هييييه.. فطومة تاني كتبت أيه؟ * قالت: (كردنة رد الصاع صاعين للمريخاب)! * صاع شيبوب.. وصاع ألوك! * وكتبت (شيبوب ضربة معلم وصفعة قوية من كردنة تؤكد أن التجارب عركته وأصبح أكبر خطر يهدد المريخاب)! * الصفعة القوية.. لفطومة والملكية! * جوبا مالك عليا.. جوبا شلتي عينيا!! * آمالي وآمالو.. شالوا ألوك قبالو.. هناااا! * الصفقة مالها تعبانة؟ * كتبنا قبل يومين (كرت ألوك يونس جواز شيبوب).. والصاح (الكرت يونس الجوازين)! * ألوك ذاتو عندو جواز بطرف مقبول! * سمعنا تحت تحت قالوا مقبول عايز يفتح متحف للوثائق الثبوتية.. المريخية! * تتجازي يا مقبول.. عدمت أولادنا الجوازات.. والبطاقات! * فطومة كتبت أيه كمان؟ (خلاصة الموضوع أن شيبوب لاعب الهلال والملكية.. نقطة ضربة جديدة)! * أمال فين جواز أكيج يا فطومة؟ * العفش داخل غرفة شيبوب على ذمة مقبول! * شنطة ولدنا ما بنخليها.. كلموا مقبول يبقى عشرة عليها!! * ننتقل من فطومة إلى الرشيد، هييييه الرشيد كتب أيه: (الملكية أعدت استقبالاً جميلاً لشيبوب وذهب الفتى من أريحية اللقيا وقضي يوم أمس يتعرف على الملكية الفخيمة ويتنقل بين أسواقها ويلتقط الصور التذكارية)! * تاااني جاب سيرة البحر.. أقصد تاني جاب سيرة الصور! * الكلام ده قبل النطة وللا بعد النطة يا الرشيد علي صور؟ * رشا قال تاني أيه؟ أصبروا علينا شوية يا ناس الملكية! * قال: (شفناهو شوف العين.. وحسدناهم عليه وهو يلعب بشعار المريخ، وتمنيناه سراً في الهلال وعندما حانت النطة.. أقصد الفرصة اقتنصناها لأن لدينا رئيس يعرف من أين تؤكل كتف الموهوبين)! * الغريبة نحن لقينا كتف شيبون سالم وكامل وشامل.. زول أكل منو حتة مافي! * كردنة ده أكلتوهو شنو يا الرشيد؟ * أيوووووه.. انا عرفت.. تاني أكلوهو مقلب! * كردنة الله عليه.. الرشيد تاني كتب أيه؟ * كتب: الملكية ستسجل شيبوب اليوم كمحترف وستعيره أو تهديه للهلال بصفة الاحتراف.. إذن هو لاعب مكتمل البيانات! * مكتمل البيانات أم مكتمل النطات يا الرشيد؟ * أول مرة نعرف أنو شيبوب ولدنا الموهوب مكتمل البيانات! * كنا قايلين بياناتو ناقصة.. ولمساتو راقصة! * يكونشي كملها ليهو مقبول؟ * أهم حاجة في كوبري الملكية ده أننا تأكدنا بعده من سلامة ركبة ولدنا تماماً! * شيبوب ركبو حديد.. بدليل أنه (نط) بيها من الطابق الثاني! * النطة القصمت ظهر البطة! * بطة يا بطة شيلي الشنطة. شنطة مين.. خالد ود عز الدين!! * خبر الغد: الزعيم يفاوض أحد نجوم فريق أطلع برة! * ألحقوا مقبول لا يشيل كرتو!! * مقبول حجاااااز.. ده لو ما لقى الكرت.. بحجز الجواز! * مقبول شاطر خلاص في الاحتفاظ بالكروت والجوازات! * ومشهور باحتكار الأرقام الوطنية والبطايق والجناسي! * يا كابيلا لو فقدت جواز أي لاعب من المريخ طوالي تتصل بي مقبول! * المشكلة تلقى مقبول.. درجو مقفول! * اصبروا علي.. انتو شفتوا حاجة؟ * أعمدتكم كلها عندي!! * بجيبها ليكم بالمهلة * خبر اليوم: كواي القلوب تلب! * خبر عاجل: كان الدرس قاسي اترصد.. من أب زرد! * خبر طريف: خديجة تاني وقعت من البلكونة! * آخر خبر: أكسح أمسح.. جيبو حي!
