* مريخ المناسبات العظيمة لايخذل اهله افتتحنا جامعة جوبا بالهلال سامي الثواني اللهم ارحمه واغفر له ونهائي الكاس في الدمازين الجماعة هربوا وفي دنقلا الجماعة عملوا زغبير وفي قمة بلاتر وزيارة الاتحاد الدولي برضو الضرب كان مبرح وكان العجب وما ادراك ما الملك وفي موسم الفيضانات دعم المريخ خزينة السودان بالريالات السعودية وغيرها كاس الدوق هيرور وكان رجعنا الى الوراء الكلام كتير واخيرا وليس اخر قمة دعم صندوق الطلاب او قمة بكري والادهم . * جماعة العرضة شمال صفر على الشمال في حضرة مريخ الكأسات المحمولة جوا . * جماعة الهجين والعجين دة حجمهم الطبيعي في حضرة الكبارولاعزاء للشكاوى. * المرة الشكوى في عاشور الادهم عشان مصري وفي بكري المدينة عشان فقري وقونو بدري. * ترقبوا اول قرار للاتحاد الجديد ممنوع تسجيل الاهداف في الدقيقة الثانية وممنوع التعاقد مع لاعبين محترفين مصريين وممنوع الفوز على طريقة الريمونتادا وممنوع الفوز بالبطولات المحمولة جوا. * غايتو الجماعة محتاجين يكتروا من حبوب منعالخجل في الايام الجاية. * قطع المريخ العظيم كل الطرق والحيل على الهلال الذي قرر الانسحاب من قمة صندوق دعم الطلاب ولكن المريخ رفض التفريط في ضرب الحمام . * وافق الزعيم على شروط الهلال التعجيزية ووافق على ان يلعب ابوالهل بالهجين والعجين ولكن الزعيم تفنن في خلطة العجين مع الهجين وعمل منها خبز لماكسيم بيرغر . * عاشور على شاكلة ايداهور والضرب بالدور وبكري الفقري قونو بدري بدري . * الهلالاب محتجين قالوا بكري سجل سريع قبال مايلبسوا نظاراتهم ويعتدلوا في قعدتهم. * قالوا خالدونا كان يتمر في النضارة لما رفعها حالة المكسيم بيرغر كانت زي حالة حارس الريفرز . * الكورة بيجيهو والبريغر في جيهة ومكسيم وين انا غايتو ماعارف اسالوا جمهور شكوى باسكال. * اسالوا الريمونتادا وااسالوا الريفرز واسالوا حارس الريفرز واسالوا مسكيم بيرغر. * في قمة الصندوق مريخنا فوق فوق. * بكري عبدالقادر بابكر محمد مجلي من ابناء قرية ديم المشايخة وهي مسقط راسي وبلدتي الواقعة اقصى جنوب الجزيرة وهي اخر نقطة حدودية بين ولايتي الجزيرة وسنار. * لم يستغرق انتقال بكري من المريخ الى الهلال سوى دقائق معدودة كانت مسافة الطريق من منزل بكري الى منزل جمال الوالي ولم يجلس بكري مع الوالي سوى دقيقتين وانتهى كل شيء وكنت شريكا عبر التواصل من مقر اقامتي في الشارقة بدولة الامارات العربية المتحدة مع متوكل احمد علي احد ابرز مهندسي الصفقة ومع عبده ابراهيم مجلي عم بكري وكذلك الاخ والصديق العزيز الشفيع عبدالقادر الشقيق الاكبر لبكري وبالمناسبة كان الشفيع ايضا مرشحا للعب في المريخ ولكن الظروف لم تخدمه. * حسم بكري عبدالقادر امر انتقاله للمريخ بنفسه وبسرعة فائقة لانه فقط مريخابي مريخابي على السكين وبحد السيف. اخر الكواليس * بكري معانا وماهمانا. * سمعنا ان الهلال يشكو المريخ في عاشور الادهم لانه مصري الجنسية وليس خمسيني واتحرك ياخالدونا وياحسونة وشغلوا الاذاعات والفضائيات. * يلا العبوا بجمهور الهلال والعبوا بمشاعر المساكين والغلابة. * عاشور علمهم من الذي طفا النور. * وبكري الفقري قونو بدري جدا. * معقولة ده هلال شنو دقيقتين مايصمد. * طيب هدف شرفي ساكت كدة مافي. * طبعا ناس الهلال بطلعوا اشاعة انو المريخ اشترى المباراة. * مش قالوا اشترينا الريفرز واشترينا الريمونتادا . * لكن بس دايرين حاجة واحدة بس يورونا اشترينا مباراة الصندوق من منو . * من كردنة طبعا كردنة مامحتاج قروش اصلا من مين طيب افتونا ياخالدونا. * الشكوى كيف وباسكال كيف والريمونتادا كيف ودة كلو كوم والتوام بتاع بكري وعاشور كوم تاني . * هدفين ولا اروع حرام عليم يابكري ما احترمت العشرة معقولة تبصر من دقشا بدري. * قون بكري داير فتوى . * قون بكري محتاج تحري توقيت. * قون بكري دة اختلفوا العلماء في توقيتو . * في علماء قالوا اسرع من رسالة التويتر. * وفي واحدين قالوا اسمه هدف انستغرام. * وفي جماعة قالوا عليهو هدف واتس اب. * وفي مفكرين اجمعوا على انه هدف فيس بوك. * وفي عباقرة قالوا لسة دة ما اونا ليهو. * ونحن كمريخاب متنازلين للهلالاب يختاروا التسمية المناسبة. * الجماعة الصفراب اقصد البكراب والعاشوراب والادهماب عجبهم قاسي. * معقولة بس في بيرغر كدة وفي مكسيم يتبهدل بالشكل كدة. * ماكسيم قال محتاج اقمار صناعية لانه اسرع من الرسالة التويترية. * .نختم بنكتة المباراة التي وردتنا من اخونا الجيلاني مبارك وهو هلالابي ولكنها قوية واحد قالوا ليهو المريخ غلب النيجيري في الريمونتادا بالاربعة وغلب الهلال اثنين صفر بس فرد قائلا طبعا عادي لانو مباراة الهلال تابعة لصندوق دعم الطلاب والمريخ خلص من الهلال نصف القيمة . * عصام هجو * [email protected]