* بتضحكوا قبل القراية مالكم ..(كورة امبارح ما حنجيب سيرتها) ..! * كورة شنو يا جماعة أعقلوا .. (ما قلتوا الكورة ما قايمة وشالكه اعتذر وكأس العالم لكرة اليد وشعر وحلمنتيش وشماتة ما ليها حد) ..! * الكورة ما قامت مش كده .. لكن قام نفس محمد عبد الماجد ..! * يا حماده لو باريت العالمي دا بتقطع نفس الرشيد معاك ..! * الليلة الجماعة ديل ما عندهم نفس للقراية يا مزمل ما تعصروا عليهم ..! * طيب بدون مقدمات وبصراحة شديدة لانو الليلة ما يوم مقدمات الطرف اليمين بتاع شالكا الألماني مفروض يسمو الطريفي ..! * يا جماعة إستهدوا بالله ما الطريفي نائب رئيس اتحاد الاستهداف العام لكرة القدم لانو داك اسمو الطريفي الصديق، ونحنا بنتكلم عن الطريفي البقول البغلة في الإبريق ..! * لو ما عرفتوا الطريفي أسالوا الألمان و(بلاش لف ودوران) ..! * الألمان وصلوا و(الوصايفة فصلوا) ..! * (الألمان وصلوا) دا ما إعلان بوهية دا سيخ وأسمنت رأسو عديل للمنتظرين الشماتة و(ماسكين المواسير) ..! * قالوا شالكه ما بجي يلعب مع المريخ، و(ود البشرى عاملة قصيدة كلها خستكة وتنظير، ويا ولدنا كان تصبر للخميس الشفقة تطير) ..! * غايتو يا ود البشرى بشفقتك دي ليهو حق الشاعر النحرير بشرى البطانة يتبرأ من قصائدك، ويقول في مية جريدة : (يا عالم انا بشرى انا ما ود البشرى) ..! * بمناسبة الطرف بشرى البطانة قال انا دا طرفي من اي كلام بكتبو زول اسمو ود البشرى ..! * بطولة (كأس العالم لكرة اليد) المنظمة في قطر وقعت لإعلام الوصايفة في جرح، وما صدقوا انو الدوحة طالبت بوقف كل المباريات التنافسية والودية وبقت منطقة مقفولة للبطولة، وبدأوا للأسف في السخرية من عدم قيام الكورة . * هلّلوا لبطولة العالم لكرة اليد، ونسوا انو العالمي (يدو طويلة) ..! * سيبكم من قون عنكبة العالمي ونتيجة التعادل وخليكم مع الطريفي ..! * لا يا حبايب ما الطريفي الحكم الجاتو ثورة حجارة يوم (ملصة جمعة) للقونين في إستاد الوصايفة مع أهلي شندي ..! * الطريفي القاصدو ليكم يا وصايفة بتاع المثل .. (انتو بدل تضيعوا وقتكم في المباريات المحلية دي ما أحسن تمشوا تقروا ليكم حكم وأمثال احتمال تنفعكم في الفجيرة او تجيب كأس خارجي للهلال) ..! * ايوه .. قاصد (الطريفي زول نصيحة)، ويا بله جابر نفذت ضربة الجزاء بطريقة ساهلة ومتقنه ومريحة ..! * بمناسبة بله (طرف العالمي الأيمن) نرجع لطرف شالكه الأيمن لانو الألماني دا زول نصيحة و(طريفي بي خشم الباب)، ونحنا ما عندنا يمة أرحميني لأي طرف و(بنضرب من طرف) ..! * (طرف شالكه) بعد كورة امبارح قال لراجي : (انتوا يا كابتن مضيعين زمنكم ساي في الدوري السوداني، انتو بصراحة مكانكم معانا هناك في الدوري الألماني) ..! * (العالمي) مطلوب بالدوري الألماني على سبيل الإعارة ..! * نحنا يا مجدي شمس الدين موقعنا ما هنا ..و(الماني لا تكلمني) ..! * معقولة قاعدين في دوري كلو تواطؤ وشكاوي .. دوري مليان مشاكل حتى في البرمجة والقرعة والبث ..(نحنا يا جماعة مفروض نكون في الدوري الألماني بس) ..! * الفرق بين البايرن وشالكه (قونين بله جابر وعنكبة) ..! * واحد وصيفابي متأزم نفسياً من مباراة امبارح قال لي : (انت بكري المدينة ما جاب قون في شالكه ليه) ؟ .. قلت ليهو : (أقوان بكري موفرا للريال ومباراة درع الاستقلال) ..! * غايتو مريخ شالكه دا لو لاقاكم في الدرع بفصل الرأس والدرع . * إني لكم من الناصحين : العالمي دا ما تجوا يوم اربعة وعشرين في مباراة درع الإستقلال (تندرعو) فيه ..! * الانسحاب أفضل وسيلة لبقاء كردنة زعيماً للأمة الزرقاء ..(ودا ما معسكر هلال دي دراما ولعب عيال) ..! * الزعيم في المباريات العالمية، ومعسكر الوصايفة من تقسيمة لاعتزال، و(مرة عيد ميلاد ومرة حفل ومرة سماية ومرة وصل) ..! * وبكرة الوصل ممتد ..! نقش أخير * يا عينيا يا عينيا (صفرك) طال متين الجية شالكه ضاعف لي الأذية