* الواحد بالجد ما عارف يبدأ المقال من (شارع المطار) ولا يدخل علي أشعار محمد طه القدال ..! * مع إشراقة كل صباح جديد يخرج فتية الزعيم لرفع رأس ناديهم وأخذ الثأر لأندادهم من منافسيهم ..! * وفاق (تشطيف) الذي هرب منه الوصايفة قبل سبعة أعوام لم يجد أمس مفراً للهروب و(من دخل القلعة حتماً مضروب) ..! * انتصار مريح وما اعظمك يا مريخ ! * لم نضع أمس الثلاث نقاط هماً بقدر ما أننا كنا حريصين على عكس صورة جيدة عن السودان بعد ما لحق به من (زوغان) .., * (زوغوا) حلاوة انتصار الأبطال الأشاوس، و(المطار بي وين المطار بجاي والصفر بي وين الصفر بهناك) ..! * ومع القدال نغني : نحنا أهل الفرحة جينا لا المدامع وقفتنا ولا الحكايات الحزينة لما درب القلعة جابنا جابنا (لبكري المدينة) ..! * بكري مرة يصنع ومرة يسجل ومرة (ضربة جزاء) ومرة يفتح للوصايفة (بيت بكاء) ..! * وجرح العقرب في كل مرة بتجدد، ولازم يا وصايفة تتعظوا ويبقى ليكم عبرة، و(دا جرح غائر لا بروح لا بدور يبرا) ..! * انتوا العقرب دا لو ما اتشقلب في الاحتفال بالقون بتشقلب جوه الخط وبعمل بلنتي وبدخل الجماعة الزون ..! * قلتوا يا محمد عبد الماجد : بكري كورتو فكت ..(يا حمادة واجهوا جمهوركم بشجاعة وما في داعي لتصدير الأوهام والتخدير وكسير التلج، والفكت دي ما كورة العقرب الفك البنج) ..! * الصفر (مبنج) سنين وناس المطار فرحانين ..! * يا سلك : ريحة المطار دي فاحت شديد، واحتمال شارع العرضة يسموا شارع المطار و(لا عزاء للأصفار) ..! * وبمناسبة الأصفار نرجع لشعر القدال بتصرف (صفري) ..! * يا (وصيفنا) الدروب شقاقا بحر التيه ليك (صفر) ولا (كأسين) مساك الدروب ضهاب وليك ماتش قديم ومتين يا وصايفة كورة الإياب * كورة الإياب كانت امبارح ..و(المتعة حاضرة وبدل القون اتنين والصفوة يكيلوا العين) ..! * زلزال الملاعب عمل للسطايفة المتاعب ..! * ضربنا السطايفة وجهجهنا الوصايفة ..! * والذين انتظروا هزيمة الزعيم أمس سنردها لهم يوم مازيمبي ، فلا أمل أبداً في أن يلعبوا مع السطايفة حتى نردها لهم مع ذات الفريق ..! * الزعيم قادل فوق عديلو .. (انتوا خليكم مع مازيمبي ودفن المقبرة) ..! * بعد هزيمة الوصايفة من التطواني لا خوف عليهم من مازيمبي، (فالجماعة تعودوا علي الضرب واكتسبوا مناعة) ..! * ومع القدال نواصل ونقول : انبليتا اختا الرمله ما تقع البكان الهش هى الممطورة ما بتبالى من الرش * الممطورة .. (طولة لسان بدون كورة) .! نقوش متفرقة * يا شُمات وفاقكم مات ..! * يا مزمل : البركة في الجميع، وبعد (وفاة) سطيف جهزوا نفسكم ل(مؤودية) العلمة ..! * (لو) سموحة غلب التطواني، و(لو) مازيمبي اتغلب من التطواني، و(لو) الهلال غلب سموحة، و(لو) سموحة ما غلب تاني، هل بإمكان الوصايفة خطف بطاقة (ولولة) التأهل من تاني ؟ * قال محمد عبد الماجد في بكائيته أمس أن دخول الهلال في (ولولة الحسابات) أمر جيد فالحسبة تمثل (متعة) كرة القدم، مما يعنى أن الوصايفة على أهبة الاستعداد لتلقى هزيمة جديدة من مازيمبي لزيادة رقعة الخسارة بالبطولة ورفع سقف الإمتاع بحسابات (ولولة الكورة) ..! * ما دايرين (نتلول) معاكم لكن نديكم الإحتمال الأرجح : * بعد تصدر مازيمبي بثماني نقاط أصبح الاحتمال الأرجح وداع الهلال للبطولة بالخسارة من مازيمبي (دون الحاجة لنتيجة مباراته مع سموحة التي ستكون أداء واجب مثلها مثل مباراة التطواني مع مازيمبي بلوبمباشي) فهزيمة الهلال المتوقعة من مازيمبي بالخرطوم بواقع ما شاهدناه في لقاء التطواني ستجعله يقف في خمس نقاط، وكسب التطواني لمباراته مع سموحة سترفعه لثماني نقاط وعندها يتوقف سموحة في نقاطه الثلاث ويغادر المنافسة ويتبعه الهلال في الخروج قبل الجولة النهائية، فإذا انتصر الهلال على سموحة في مصر (خمسين/صفر) يصبح في رصيده ثمانية نقاط، ولو هزم مازيمبي التطواني (خمسين/صفر) أيضاً يبقى في رصيد التطواني ثمانية نقاط، ليصعد الحمام المغربي ب(المسامير) المباشرة ..! * لسه ما كتبنا عن متعة امبارح ودايرين نلحِّق العمود والمطبعة والوقت و(بكرة نرجع من تاني نعود) نقش أخير * وبكرة نرجع تانى للكلمة الرحيمة شان هنانا شان منانا
