المعلق: ٭ اللاعب مرة كويس وسدد كويس ولكن في سوء طالع ظاهر في الكورة الماضية وادي الإعادة. شوف المرور الناجح من المدافعين والكورة في طريقه غريبة تطلع أوت. موسيقى المذيع: ٭ أهلاً بيكم وان شاء الله طيبين.. الليلة حنكون في ضيافة الشيخ هارون، والفكي هارون علاقتو مع الكورة علاقة قوية جداً ومشهور عند الاداريين بمعرفتو بالجن الرياضي معرفة تامة (وبيخت) الخطط اللازمة لتلافي الهزيمة وتحقيق الفوز.. في مرة من المرات جاهو إداري وأظنه نائب الرئيس لشؤون الفقرة عنده مباراة صعبة شديد وسألوا: - الإداري: يا شيخ هارون الحاصل شنو؟ هارون: ختيتو البياض؟ - الاداري: ايوه.. وكتبنا ليك شيك. هارون: شيك بقى ما بغطي مع الجماعة.. كاش يستلموا. - الإداري: ما مشكلة كاش كاش. هارون: ايوه كاش بقلل النقاش اسمع المباراة دي حتكون مسخنة شديد وكلها ضرب ودفر. - الإداري: يا ساتر. هارون: وبعدين لعبوا اللاعب رقم 33 دا براهو حيجيب 5 أقوان. - الإداري: رقم 33.. ما عندنا لاعب بالرقم ده. هارون: خلاص قطع شك يكون في الفريق الثاني. المعلق: قوووووووون. المذيع: ٭ الفكي هارون تشجيعوا للكورة بقوم على المادة فقط وشغلوا بقوم على حجم البياض وهو محظوظ جداً ومرات كتيرة صدقت معاهو عشان كده يكون مقنع جدا وسط الإداريين عشان كده فكروا يعملوا شيخ هارون مدرب الفريق لأن المدرب في نظرهم قاعد ساي والدليل انه أي تشكيلة للفريق بتعرض اول حاجة على الشيخ هارون يشوف بتاعته حتى بعد داك يدوها المدرب وطبعاً المدرب بعد ده بياخد مرتب عالي جداً وشيخ هارون برضو بياخد بياض كبير، وعليه وترشيداً للصرف تم تعيين الشيخ هارون مدرباً للفريق. المذيع: ٭ وفعلاً اتفقوا مع الشيخ هارون على تدريب الفريق وعدم التعامل مع أى ناد تاني كفكي وفي المقابل تم تحويل البياض الى مرتب وبقى للشيخ عربة خاصة وشقة وامتيازات اضافية في حالة الفوز والتعادل. وكخطوة ايجابية طلب الشيخ هارون ان يتعرف على اللعيبة. موسيقى: ٭ هارون: ما شاء الله كلكم لاعبين... وين حارس المرمى (أصوات حركة أرجل). هارون: د ا شنو ده؟ القون مش واحد بس انتو كتار كده ليه؟ الاداري: لا يا شيخ هارون ده الحارس الاساسي وديل الاحتياطي. هارون: (يعني ده الكان بقى عيان؟ يلعب ده طيب وين المدافعين). (أصوات حركة) ٭ ما شاء الله كتارب برضو نظام لو مرض واحد يكون في واحد مرضان وكده وبعدين انتو مالكم شينين كده؟ وكبار شديد.. آه يا جماعة انتو القون عاوزكم تقفلوها يعني انتو الغفير بتاع الفريق والغفير لو نام معناه الفريق اتسرق، وبعدين المدافعين يكشوا حتى لو رجل الخط ساب خطو كشوه وين يا ناس النص.. انتو هدو اللعب وبردوا الشغل وبعدين داير باصات كتيرة زي موقف بحري الحاج يوسف وين ناس الهجوم.. تكابسوا تدافروا عشان تجيبوا الاقوان وكلو ما تجيبوا أقوان الجمهور حيكون مبسوط ويختكم في حنانو. الاداري: آه يا شيخ هارون حا نلعب بى كم؟ هارون: ما اتفقنا قبيل!! الإداري: لا أنا قصدي الخطة حتكون كم يعني حا تلعب بي كم؟ هارون: ما بلعب باللاعبين كلهم! الاداري: انا قصدي حا نلعب ب 4/4/2 أو 3/5/2 أو 4/3/3. هارون: انا كده فهمته.. انا حا العب ب 22/12/1. الاداري: كم....؟ ودي تجي كيف؟ هارون: ما تخاف كل ما تلقاهو مشغول اعمل ليهو (ريدايل)! المعلق: قووووووووووووون. المذيع: ٭ ما معروف حصل شنو؟ بعد داك.. لكن احتمال شيخ هارون بقى رئيس النادي او بقى حارس المرمى او مسك البوفيه بتاع النادي والله أعلم؟ موسيقى: هدايا الحلقة: 1/ واحد ضغط على نفسه ( اتخفجت). 2/ واحد ( زُهجي) عرس واحدة ( زُهجية ولدهم ساعة الولادة وهو نازل من بطن امه قال للدايه - زحي كده انا حا أنزل براي). 3/ صاحب خيال ولد سبعة اولاد سمى نفسه ( سفن اب). 4/ صاحب خيال قال لصاحبه ليه المخطوبين بيمسكوا يدين بعض؟ قال ليه علشان الدبل ما تقع. 5/ المريض قال للطبيب النفسي انا عندي ازدواج في الشخصية، الدكتور قال ليه طيب اقعد علشان نتلكم نحن الاربعة. 6/ قروي مشى يخطب جابوا ليه كباية شاي ليبتون (Tea bag) قال ليهم قبل الخطوبة عايزين تكتبونا؟. 7/ واحد مشى شاطيء النيل يستحمى- العسكري قال ليه ممنوع الاستحمام. الراجل قال ليه طيب ما قلت لى ده قبال ما اقلع هدومي ليه؟ قال ليه لأن قلع الهدوم ما ممنوع!! 8/ واحد من أهل الخيال بشاغل في واحدة شينة جداً قال ليها يا شينة يا شينة قالت ليه امشى يا مسطول قال ليها بكره (سطلتي) بتفك لكن انتي حتعملي شنو؟ 9/ واحد عنده زهايمر قال للجماعة بمناسبة عيد الام المبارك اهنئكم برمضان جعله الله عليكم زواجاً سعيداً وكريسمس خير وكل عام وانتم بخير والسنة الجاية مع تحيات جمعية مرضى الزهايمر!! 01/ سائق تاكسي من اهل الخيال اوقفته واحدة سألها قال ليها رايحة وين؟ قالت ليه الملازمين قال ليها امشي بش ما تتأخري. 11/ صاحب خيال قالوا ليه رأيك في الزواج المبكر؟ قال ليهم يعني حوالي الساعة كم. خاتمة: ٭ طبعاً الدجل والشعوذة نحن ضدهم ومطلعين ليهم كرت احمر، وهذه الحلقة جزء من المحاربة. مع تحياتي احمد دولة