في خبر عاجل من الفضائيات ووكالات الأنباء ان المنظمة الاقليمية للأزواج الضعفاء Weak Husbands Organization والتى تختصر ب W.H.O قد دعت الى اجتماع طارئ بعد الاحداث التى جرت في تونس ومصر وما اعقبها من تظاهرات في ليبيا واليمن. تبادل اعضاء هذه المنظمة والتى تعد بالآلاف الشفرة عبر الانترنت عن طريق موقع «وش الكتاب» او «كتاب الوش» الذي يسمى بالانجليزية Face Book وموقع «تويتر» وطبعاً علشان نحن في السودان ما عندنا ميدان تحرير علشان كده اتفقوا يلتقوا في ميدان «جامسكا» بالثورة وذلك لبعده عن تجمعات النسوان ذوات «الاضنين» الخفيفة والايادي الثقيلة. الشعارات التى رفعت من الازواج كانت: 1. لا لتغسيل للعدة بعد اليوم. 2. لا لتوريق الخضرة او فرمها. 3. لا لتشطيف الشفع. 4. لا للمراسيل انصاص الليالي او فى الهجير. أهم شعار رفعته المنظمة بتغيير المدام «المنظمة تريد تغيير المدام» من جانب آخر كُوِنت لجنة مفاوضات بين اعضاء من المنظمة والنساء. علمت مصادرنا ان الجانب النسوي قد ابدى التنازلات الآتية: 1. السماح للزوج بالتعدد في حدود 2 زوجة في المرحلة الاولى بشرط ان تكون احداهن عزباء. 2. السماح للزوج بالخروج من البيت دون اذن او سؤال في المرقة والدخلة. 3. السماح له بالسفر متى شاء والى حيث شاء. 4. بيع نص دهب المدام للمساهمة في المعيشة. 5. التخلى عن الطلبات الكتيرة والاكتفاء بثوب واحد خلال العام. جاء من مراسل قناة توتي من ميدان جامسكا ان الوضع مازال متأزم والرجال حالفين ما يرجعوا الا اذا نُفذت طلباتهم، مندوب القناة شاهد اكثر من «مأذون» قرب الاستاد وهم يلوحون «بالقسائم» وأوراق الطلاق. مولانا المأذون المفوض قال القصة كلها هرشة ساكت لحدى اسي مافي زول طلب ورقة طلاق. هدايا الحلقة: 1. واحد سألوه ما هو الفرق بين المتزوج والعازب؟ قال العازن حيتزوج والمتزوج حيتعذب!. 2. بخيل عزم اصحابه على لحمة قدم ليهم شوربة بس، سألوه من اللحمة قال ليهم يعني شاي العروسة بتلاقو فيه عروسة؟. 3. المرة المريضة جات للدكتور في الحلة قالت ليه دايراك تحولنى البندر علشان هناك قالوا الدكتور بكشف بالسماعة، الدكتور رباطابي قال ليها امال المعلقة في رقبتي دي «نبلة». 4. عجوز خيروها بين العرس والحج «دنقرت» وقالت هي مكة حتطير!. 5. سوداني سأل لبناني قال ليه بتقضى يومك كيف؟ قال ليه بالنهار سايق همر وبالليل حمب القمر. وانت، قال ليه بالنهار سايق «تيرلا» وبالليل جمب «الغوريلا». 6. واحد من اهل الخيال قالوا ليه «البنقو» يؤدى الى الموت البطئ قال ليهم انا ما مستعجل. 7. قال احد الحكماء ما رأيت اتعس من اربع: رجل يلبس القديم ولديه الجديد، ورجل يريد الانتحار وعمره مديد، ورجل يدعى للعشاء ويطلب المزيد، قيل ثم من قال: ورجل في هذا الكون لا يشجع ريال مدريد. 8. اصحاب خيال لاقاهم عسكري سألهم ليه كلكم عيونكم حمراء؟ قالوا ليه بنبقى لي بعض!. 9. صاحب خيال جابو ليه بت قالوا ليه حتسميها منو؟ قال ليهم حأسميها «هبة» على عمتها «علوية». 10. سوداني كذاب لاقى روسي كذاب قال ليه نحن السخانة لما تجي شارع الزلط بقعد في الضل!. الروسي قال ليه نحن من شدة البرد لما يتكلم معاك زول لازم تشيل الكلام تسخنوا وبعد ثلاثة ايام حتى تفهم قال ليك شنو!. 11. رباطابي ولده اكله تمساح جاءه واحد ثقيل يعزيه قال ليه ولدك التمساح أكله وين؟ قال ليه في مطعم «عوضية سمك». 12. واحد عايز يتزوج واحدة شغالة في سوداتل وهي ما عايزاه وقافلة منه الموبايل جاه رد «عفواً هذا المشترك لا يمكن الوصول اليه» قام طلبها من ابوها جاته رسالة «عفواً خطوبتك لا تتم حسب الطريقة التي اتبعتها». خاتمة: ما زال الوضع متأزم في ميدان جامسكا وما زالت المفاوضات تجرى بين مناديب الجانبين. وربنا يجيب العواقب سليمة. مع تحياتي،،،
